Një nga atraksionet më të veçanta turistike në vend së shpejti do të kthehet në një kantier ndërtimi, duke humbur kështu edhe rëndësinë e saj si Monument Natyre.
Një hidrocentral pritet të ndërtohet së shpejti në Kanionin e Holtës në Gramsh, një vendim i marrë nga Këshilli Kombëtar i Territorit dhe me firmë të kryeministrit Edi Rama.
Siç duket edhe nga shkresa zyrtare, leja e ndërtimit për ngritjen e një hidrocentrali në këtë zonë turistike i është dhënë shoqërisë ‘Era Hydro shpk”, me administrator Nertil Gjata.
Kjo kompani nuk duket me shumë përvojë jo vetëm në këtë drejtim por edhe në sektorë të tjerë të deklaruar në QKB, pasi rezulton e themeluar në 05.11.2016.
Kjo kompani rezulton e shtrirë në disa aktivitete si import – eksporti dhe tregtimi me shumicë dhe pakicë, të artikujve të ndryshëm, industrial, bujqësor, blegtoral, ushqimor, materiale të ndërtimit, inerteve, të konfeksioneve, parkete e mokete, pajisje zyrash, duralumini, metaleve, hidrosanitare, elektro shtëpiake, elektronike, kondicioner, elektrike dhe hidraulike. Të kryejë aktivitete në fushën e energjetikës, me synim gjetjen dhe shfrytëzimin e burimeve energjetike, si dhe çdo ndërtim tjetër me karakter civile dhe ekonomik përfshirë dhe Hidrocentralet apo çdo objekt tjetër për prodhimin, shitjen e transmetimin e energjisë. Prodhimin dhe tregtimin me shumicë e pakicë të energjisë elektrike. Transport mallrash dhe materialesh për vete dhe për të tretët.
Ky projekt parashikohet të përfundojë në 2020-ën dhe ka një vlerë prej 460 milionë lekësh.
Discussion about this post