Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

‘Dosja 339’: Edhe për Ramën 7x7 bëkan 42

Politiko 28 Korrik 2020, 18:25

‘Dosja 339’: Edhe për Ramën 7x7 bëkan 42

Alfred Lela

Kryeministri e ka përdorur sipas oreksit një gafë në matematikë të kundërshtarit politik gjatë një fjalimi në Kuvend kur opozita nuk i kishte braktisur ende institucionet. Basha, i ngërthyer në disa veprime me shifrat, pat ngatërruar një shumëzim të thjeshtë duke përllogaritur gabim se 7x 7 bëjnë 42.

Një matemitikë të tillë ‘të keqe’ ka përdorur edhe vete Rama sot, në një tweet pas vendimit të SPAK për të bërë disa arrestime të disa prej personazheve të dosjes së shumëpërfolur 339. Duke i bërë jehonë arrestimeve, kryeministri ka dashur të godasë në disa shenja: të zhvlerësojë impaktin politik të arrestimeve mbi mazhorancën; të ndajë përgjegjësitë me faktorët e tjerë politikë në vend; të distancohet nga ‘dosja 339’ dhe aktorët e saj, duke përshëndetur lëvizjen e organeve ligjzbatuese; të përkëdhelë ndërkombëtarët duke thënë se ai nuk është kundër reformës, edhe kur ajo godet të tijtë; të shfaqet si kryeministër mbi palët, madje edhe mbi të vetët, duke treguar se nuk është i kompleksuar t’i lërë të bien kur ata bëjnë ‘gabime’.

Të gjithë këto simulime të z. Rama nuk mund ta fshehin megjithatë thelbin, pikërisht atë që ai u mundua të maskojë pas një veprimi matematikor që ka brenda politikë, por jo saktësi, as shkencë dhe as vërtetësi.

Katërmbëdhjetë komisionerë të PD-LSI dhe 8 të PS janë arrestuar nga SPAK, shkruante kreu i Partisë Socialiste. Shiheni përpjekjen për të ndërtuar një kontrast i cili krijon distancë, por nuk është i qëndrueshëm, duke qenë se ngrihet mbi një spekulim. Edhe pse 14-a vazhdon të jetë, sot e përjetë, më e madhe se 8-a, kjo e fundit është më e madhe se 14-a nëse e pjesëtojmë me 2. Sepse 14:2 baras me 7. Dhe 7 është më e vogël se 8. Nëse matematika shkencore nuk mjafton, mund të fusim në punë atë politike apo elektorale. Duke kujtuar se PD-LSI nuk kanë qenë në koalicion në kohën e aritmetikës së ‘dosjes 339’. Dy partitë sot në opozitë dhe në koalicion kanë qenë dy njësi të ndara elektorale dhe garuese. Faktin që ato janë bashkë sot nuk mund ta përdorësh për të ilustruar një ngjarje politike të së shkuarës kur ato kanë qenë, si të ndara ashtu edhe kundërshtare.

Nuk duhet harruar një gjë, që nuk është e rrafshit sasior dhe si rrjedhojë, edhe pse nuk rrëfen në numra, të mbyt me peshën e cilësisë. Fakti se, matematika e 2017 do të ishte më e saktë nëse në vend të mbledhjes PD-LSI të bëhej ajo PS-LSI. Të dyja partitë e kishin ndarë pushtetin së bashku për 4 vjet të plota (2013-2017) dhe, megjithëse koalicioni ishte shpërbërë politikisht inercia e tij vazhdonte në administratë, në logjistikë, në rrjet dhe në know how.

Në anën tjetër është e sigurt se faji nuk mund të ndahet barabar mes atyre që janë në pushtet dhe atyre në opozitë. Që do të thotë se nuk mund të vihen shenja barazimi, në planin politik, mes partisë që qeveris (dhe komisionerëve të saj) dhe partisë në opozitë (dhe përfaqësuesve të saj në komisione). Përpara ligjit, dhe në raport me shkeljet, ata janë të barabartë dhe duhen përgjigjur, por në rrafshin politik përgjegjësia për shkeljet, prishjet, moscilësinë e zgjedhjeve e ka së pari partia në pushtet. Madje asaj i takon të marrë pak edhe nga përgjegjësia e shkeljeve të kundërshtarit. Është ajo menaxherja e zgjedhjeve.