Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Dy dokumente: 'I miri Baba Taku' përballë 'të keqit' Anton Harapi

Politiko 9 Prill 2019, 18:52

Andreas Dushi

Nuk mund të mos, edhe mua si shumëkujt, të na bënte në veshë deklarata e deputetit Spartak Braho kundër shkrimtarit Agron Tufa. Që në fillim më duket e tepërt që dikush që akoma përdor epitetin “ballist” si ofendim karshi dikujt tjetër, duhet marrë seriozisht. Kundërshtia kolektive që e katranjosi Brahon me bojë më të zezë se 'çanta e sekreteve të tij' më bëri pak më kureshtar dhe më nxiti për të parë nëse topi i ping – pongut, dalë nga një grykë e errët, ndodhej në territorin e ballistëve apo atë të antiballistëve që mund të jenë edhe komunistë.

Dje, në gazetën “Dita” Spartak Braho i njohur rëndom si 'Baba Taku' kishte thënë, ndër të tjera“...Të zbresin nga piedestalet heronjtë dhe të ngjisim kolaboracionistët si Mit’hat Frashëri, Pater Anton Harapi, Hamit Matjani e kriminelë të tjerë...”

Pra për shokun Baba Tak, Frashëri, Harapi e të tjerë na qenkan kriminelë, të cilët ballistët si Agron Tufa duan t’i bëjnë heronj. Deklarata mu duk jo pak e çuditshme, aq më pak e ardhur fare pak kohë pasi qeveria e drejtuar nga kryetari i partisë, pjesë e së cilës ai është, me një ceremoni shtetërore nderoi dhe rivarrosi eshtrat e Mit’hatit. Kjo tregon se Braho është një njeri me dy standarde dhe sikurse historia na ka treguar ndër shekuj, deklaratat e njerëzve të tillë nuk duhen marrë seriozisht.

Përveçse përballë Tufës, i cili mund t’i përgjigjet edhe vetë, i miri Tak i del përballë me shpatën në dorën, e lirë nga kazma socialiste, dhe i vendos gjoksin edhe armiqve të tjerë, mes tyre Patër Harapit. Le të krahasojmë pak një fjalë publike të Pater Harapit kur ishte Anëtar i Këshillit të Regjencës me një dokument të firmosur nga Spartak Braho kur ishte Kryetar i Kolegjit Ushtarak.

Edhe komunistavet due t’ua tham nji fjalë, por kjartë e shkurt. Unë jam i bindun se pak janë ata shqiptarë, të cilët vërtetë e kuptojnë doktrinën komuniste, por tashma të gjithë po e shohin dhe po e njohin organizatën dhe veprën komuniste në Shqipni... Pse vallë komunistat veshen e ngjeshen me zellin atdhetar, kurse atyne mbi të gjithë u intereson doktrina e jo atdheu? Masat terroristike, mandej vëllavrasja, lidhnija e ngushtë deri në dependencë të plotë prej dorës së huej dhe përdorimi i çdo mjeti për qëllim nuk i lanë vend dyshimit. More me kobure në gjoks nuk bahet kush as vlla, as shoq por ja mizuer apo hypokrit.

Kuvendi i Shypniës, 13.01.1944

Ndërsa Braho është ai që ka firmosur dokumentin e mëposhtëm.

(dokumenti i dënimit me vdekje)

Me sa duket, problemi i të mirit Tak nuk qëndron përballë krimeve të 'kriminelit Harapi' që shërbeu si anëtar i Regjencës, post që, sikurse thotë vetë, e pranoi “për maninë e Shqypnisë” kur ishte përballë dy zgjedhjeve të cilat gjithashtu i përmend vetë “a me anarkista për të ba gjak, ase me hjekun dorë prej çashtjes kombtare”. Pater Harapi vazhdon: “Dhe pasi shpirti nuk ma tha të baj as njenën, as tjetrën, qeshë i shtrënguem të zgjedhi njenën dysh, a të baj nji marri tue e pranue këtë zyrë; ase të tregoj nji dobsi tue u largue.”...Problemi i antiballistit Tak qëndron në atë çka Pater Harapi ka thënë për komunizmin që para se ai të instalohej si një korb që pasi i vret njerëzit, i ha si kërrmëngrënës i mjerë.

Duket sikur Baba Taku po bëht një me çantën e tij të zezë ku pretendon se gjendet një vrasës dhe agjent i jugosllavëve. Ndoshta ai i druhet ndonjë tjetër çante të zezë të cilën e ka dikush tjetër dhe ku gjenden shumë si dokumenti i vendosur më lart.