“Çopjat kanë kryer vrasje me porosi nga qeveria”, deklarata e fortë e ‘Fanes’ së Beratit në gjykatën britanike

Çfarë ka ndodhur?

Irfan Azizi ka deklaruar në Gjykatën e Magjistratëve në Westminster se ka qenë shënjestër e një atentati të rëndë më 29 nëntor 2020, ku ndaj tij u qëllua me rreth 30 plumba nga një kallashnikov, duke e lënë të plagosur.

Sipas dëshmisë së tij, organizatori i atentatit është Talo Çela, një ish-mik i kthyer në kundërshtar. Në të njëjtën dëshmi, siç shkruan Daily Mail, Azizi ka bërë edhe pretendime të rënda, duke thënë se Çopjat kanë kryer vrasje “me urdhër të Kryeministrit dhe Ministrit të Brendshëm”.

“Këta njerëz kanë bërë vrasje për Kryeministrin me urdhër të tij dhe gjithashtu për Ministrin e Brendshëm. Unë kam prova. Ata nuk të paralajmërojnë kur do të të vrasin, thjesht vijnë. Herën e parë që erdhën për të më qëlluar nuk më paralajmëruan dhe nuk më kërcënuan.”

Këto deklarata mbeten të pakonfirmuara nga autoritetet dhe janë pjesë e procesit gjyqësor të ekstradimit.

Konteksti

Deklaratat janë dhënë gjatë një procesi gjyqësor në Mbretërinë e Bashkuar, ku Azizi po kundërshton ekstradimin drejt Shqipërisë, duke pretenduar se rrezikon jetën e tij dhe të familjes nëse kthehet.

Ai ka argumentuar se ka qenë viktimë e një atentati dhe se zotëron informacion për përfshirje të grupeve kriminale në ngjarje të rënda.

Autoritetet britanike po shqyrtojnë dëshmitë e tij në kuadër të procedurës së azilit dhe ekstradimit, ndërsa pretendimet e tij nuk janë të konfirmuara si fakte gjyqësore.

Zanafilla

Ai që ishte dikur miku i tij, Talo Çela tentoi që ta vriste në Poshnje të Beratit, me urdhër të vëllezërve Franc e Hajdar Çopja.  Sipas dosjes së SPAK, Azizi ka shpjeguar se Talo Çela ishte informuar se ai ishte personi, i cili kishte dhënë makinat e përdorura në vrasjen e Emiljano Ramazanit dhe vëllait të tij, Bujar Çela.

Po ashtu, dyshonin se Azizi mund të kishte ndihmuar Nuredin Dumanin duke i dhënë makina të vjedhura për realizimin e ngjarjeve në Durrës ku kanë mbetur të vrarë anëtarë të organizatës kriminale Çopja. Kishin dyshime edhe që Azizi mund të ketë strehuar Nuredin Dumanin pas vrasjeve.

Përgjimet e Sky ECC zbuluan se Talo Çela kishte shkuar thuajse çdo ditë në Berat për gati 2 javë, për të vëzhguar lëvizjet e Irfan Hazizit dhe rrjedhimisht, për të organizuar atentatin e nëntorit të vitit 2020.

Nga bisedat e SKY ECC, Talo Çela shfaqet si koordinatori kryesor i atentatit duke dhënë udhëzime për eliminimin e Irfan Azizit.

Reagimi i opozitës

Kryetari i Partisë Demokratike, Sali Berisha akuzoi drejtpërdrejt Taulant Ballën për përfshirje në krime të rënda.

Nga konferenca me gazetarët, teksa iu referua dëshmisë së Azizit, kryedemokrati tha se ka dokumente zyrtare që provojnë lidhjet e Ballës dhe Ramës me Çelën.

“Është e dokumentuar me dokumente zyrtare se Taulant Balla ka bërë ndërlidhjen direkte për probleme elektorale midis kartelit Çela dhe Edi Rama. Është e faktuar me regjistrime se ai ka porositur vrasje,” u shpreh Berisha.

Çfarë ndodhi me Çopjat?

Grupi i njohur si Çopjat, i përbërë nga vëllezërit Hajdar Çopja dhe Franc Çopja, është goditur nga autoritetet shqiptare dhe ato ndërkombëtare në kuadër të hetimeve për krim të organizuar. Ndaj tyre janë ushtruar sekuestro për pasuri të konsiderueshme, përfshirë kriptovaluta, prona dhe llogari bankare, ndërsa pjesëtarë të grupit janë arrestuar dhe dënuar në vende të ndryshme të Europës për vepra të rënda kriminale.

Hajdar Çopja, kreu i grupit i njohur ndryshe si “Dari”, akuzohet për të paktën vrasjen e 6 personave. Hajdar Çopja u arrestua në vitin 2024 në Emiratet e Bashkuara, pas një përplasjeje që ka përfunduar me plagosje dhe është dënuar me 4 vite burg.

Franc Çopjas u arrestua në një nga Republikat Islamike, për t’u ekstraduar më vonë në Belgjikë, ku u dënua për një vrasje. Ndërsa Talo Çela mbetet në kërkim nga autoritetet shqiptare, edhe ai për një seri krimesh të rënda të cilat mbeten të pazbardhura.