12 orë në Tiranë, vizita e ‘eklipsuar’ e Erdogan

Presidenti i Turqisë, Recep Tayyip Erdogan zhvilloi dje një vizitë në Shqipëri, me një agjendë të ngjeshur.

Gjatë 12 orëve të qëndrimit të tij në Shqipëri,  (09.30-21.30) u nënshkruan shtatë marrëveshje bashkëpunimi përfshirë ato në fushën e medias, zbatimit të ligjit, emergjencave civile dhe kulturës.  Erdogan inauguroi kompleksin me 522 apartamente të reja në bashkinë e Kurbinit, qarku i Lezhës , të prekur nga tërmeti i 26 nëntorit 2019, të financuar nga Turqia me një fond prej 42 milionë eurosh.

Veç këtyre, Erdogan la pas vetes një pritshmëri të qartë për Tiranën zyrtare: Të merren masa të shpejta kundër gülenistëve.

Kjo u reflektua nga fjalimi i presidentit turk Recep Tayyip Erdoğan në seancën inauguruese të Kuvendit të Shqipërisë.

Erdogan cilëson “FETÖ” përgjegjës për grushtin e shtetit që kërkoi ta rrëzonte atë në vitin 2016 dhe i ka shpallur ata një organizatë terroriste. Ai tha se rrënjët e "FETÖ" janë të thella dhe ai pretendon se organizata përbën një kërcënim për sigurinë e Shqipërisë për shkak të pranisë së anëtarëve të dyshuar në arsim, fe dhe sektorin privat.

“Kemi paguar një kosto shumë të rëndë, presim që Shqipëria të marrë masa të menjëhershme”, tha ai, duke shtuar se shpreson që çështja të zgjidhet herën tjetër që të vizitojë Shqipërinë.

Si në fjalimin e tij në parlament, ashtu edhe në konferencën e tij të mëparshme për shtyp me kryeministrin Edi Rama, Erdogan theksoi investimet e ndryshme të Turqisë në Shqipëri. Këtu përfshihet një spital në qytetin qendror të Fierit dhe apartamentet e sapo inauguruara në Laç.

Sipas Erdogan, Turqia ka investuar 3.5 miliardë euro në Shqipëri përmes 600 kompanive që punësojnë më shumë se 15,000 njerëz.

Në fokus të fjalëve të tij ishte edhe mbështetja e Turqisë për Shqipërinë pas tërmetit të vitit 2019 dhe gjatë pandemisë COVID-19. Në këtë drejtim, Erdogan premtoi se do të furnizojë Shqipërinë me vaksinën e sapokrijuar turkovac të Turqisë.

Një konferencë për shtyp, një gazetare shqiptare e pyeti Erdogan se çfarë merr Turqia në këmbim për investimet që janë bërë në Shqipëri. 

“A duhet të shqetësohet Bashkimi Europian për interesin tuaj në Shqipëri,” tha gazetarja.

Pasi vlerësoi pyetjen, Erdogan tha: “Mendoj se ju doni që të na kundërvini ndaj njëri-tjetrit. Por ne nuk do jemi në kënde të kundërta”.

“Ligjet e vëllazërisë janë të ndryshme. Brenda ligjt të vëllazërisë ka mbështetje të tilla, që ëkto mbështetje bëhen detyrim për vëllazërinë. Por ka edhe një marrëdhënie bilaterale që bazohet te ligji i detyrimeve”, tha Erdogan.

Ndërsa Erdogan pohoi se kjo mbështetje vjen pa kërkuar asgjë në këmbim për hir të vëllazërisë mes popullit turk dhe shqiptar, fjalimi i tij në parlament tregoi një anë tjetër.

"Një parakusht për mbështetjen dhe vëllazërinë tonë," tha Erdogan, "është angazhimi juaj në luftën kundër FETÖ".

Në të kaluarën, Turqia ka shfrytëzuar lidhjet e saj me Shqipërinë dhe Kosovën për të goditur pasuesit e supozuar të Fethullah Gylenit, duke çuar në ekstradime dhe bastisje të mundshme të paligjshme në shkolla.

Këto raste, që përfshijnë më shumë se 100 persona, u përshkruan nga raportuesit e Kombeve të Bashkuara si "rrëmbime jashtë territoriale", dhe "kthime me forcë". 

Vizita e tij ngjalli edhe reagime duke pasur parasysh historinë e ndërlikuar të Shqipërisë me Perandorinë Osmane dhe faktin që vizita e Erdoganit përkonte me 554-vjetorin e vdekjes së Skënderbeut, heroit kombëtar të Shqipërisë.  

Gazetarët u penguan të mbulonin pjesën më të madhe të vizitës së Erdoganit pasi bllokimet e rrugëve i penguan ata të afroheshin në Laç. Në konferencën zyrtare për shtyp mund të merrnin pjesë vetëm gazetarët e akredituar nga Zyra e Kryeministrit dhe nuk u lejuan të sillnin apo përdornin kamera. Të gjitha pamjet e vizitës së Erdoganit u kontrolluan nga qeveria me pak mundësi që iu dha mediave të pavarura, shkruan Euractiv.

Gjatë vizitës së tij, me Ramën u nënshkruan gjithsej shtatë marrëveshje duke përfshirë bashkëpunimin ligjor, strategjik dhe kulturor mes dy vendeve. Një tjetër ka të bëjë me blerjen e dronëve ushtarakë nga Turqia.