Arlinda Pogaj, PR-ja e fshehur e Gonxhes dhe menaxherja e tenderëve që sulmon opozitën

Blendi Gonxhja, ministri i Turizmit, Kulturës dhe Sporteve, mohoi deklaratën e kryedemokratit Sali Berisha se Gilmando Dani, viktima e atentatit në Rinas, kishte shërbyer si truprojë e tij.

Gonxhja paralajmëroi padi ndaj kreut të PD, ndërsa ky i fundit u shfaq i gatshëm për një përballje në gjykatë, teksa ritheksoi akuzat ndaj Gonxhes për përfshirje në banda kriminale.

Deklarata e Gonxhes është shpërndarë disa herë nga Arlinda Pogaj, drejtoresha e Operartorit të Blerjeve të Përqëndruara. Në profilin zyrtar të Pogajt, vihen re artikuj që i referoheshin kundërpërgjigjes së Gonxhes për Berishën.

  

Por, kush është Arlinda Pogaj?

Emërimi i Pogajt në krye të Operatorit të Blerjeve të Përqëndruara është parë si një lëvizje strategjike nga Blendi Gonxhja, ministri që ka përgjegjësi për OBP-në, për të kontrolluar një mekanizëm kyç tenderash publikë.

Para se të bëhej administratore e OPB, Arlinda Pogaj ka mbajtur më parë postin e juristes në Drejtorinë e Përgjithshme të Shërbimeve të Transportit Rrugor, kur asokohe ishte në krye Gonxhja.

Gonxhja, nga ana e tij, e ka vlerësuar pozicionin e Pogajt si pjesë të reformës që sipas tij po “rriste transparencën” dhe kursimet në blerjet publike. Në konferencë për 1-vjetorin e OBP, ai deklaroi se OBP kishte kursyer 20.4 milionë euro nga buxheti i shtetit duke i dhënë meritat Pogajt.

Partia Demokratike ka denoncuar Blendi Gonxhën, për manipulim me tenderët nga Operatori i Blerjeve të Përqendruara, drejtoreshën e këtij institucioni, Arlinda Pogën, se kanë ndarë tenderë të paracaktuar me miqtë e tyre, duke përfituar miliona euro nga buxheti publik.

Sipas denoncimit të PD, tenderët që arritën në 26.1 milion euro, janë ndarë në mënyrë të favorshme për kompani të lidhura me deputetë dhe figura të tjera të lidhura me partinë socialiste, përfshirë Dajti-Park 2007 shpk dhe kompani të familjes Sinani.

Sot, Pogaj, është kthyer në PR i Blendi Gonxhes që i përgjigjet në sinkron të plotë sulmeve të ‘shefit’ të saj ndaj opozitës.

Skandalet e OBP nën drejtimin e Pogajt

Pogaj është përfshirë në disa skandale lidhur me abuzimet në tendera dhe klientelizëm.

OBP nën drejtimin e Pogajt, shpalli fitues kompaninë “Inerti” shpk për ndërtimin e kompleksit të poligonit të qitjes dhe palestrës për forcat speciale të Burgjeve, me një kontratë prej 194 milionë lekësh pa TVSH (rreth 2 miliardë lekë të vjetra me TVSH), të financuar nga buxheti i shtetit.

Siç shkruan Boldnews, tenderi me fond limit 296,3 milionë lekë, u zhvillua më 19 shtator 2025, me pjesëmarrjen e 14 kompanive. Por menjëherë pas përfundimit, OBP skualifikoi 13 prej tyre me arsyetime teknike që ekspertët i konsiderojnë të fabrikuara dhe selektive, duke shpallur fituese pikërisht “Inerti” shpk.

Kompania njihet për lidhjet e saj me rrjetin ekonomik të bashkisë së Tiranës dhe figura të njohura të partisë socialiste, duke përfshirë administratë të afërt me Erion Veliajn, që prej vitesh kontrollon pjesë të konsiderueshme të kontratave publike në ndërtim, mirëmbajtje dhe shërbime. Sipas Qendrës Kombëtare të Biznesit, “Inerti” ka marrë pjesë në dhjetëra tendera shtetërorë dhe bashkiakë vitet e fundit, ndërsa burime pranë OBP-së dhe bashkisë tregojnë se pas kompanisë qëndrojnë persona të afërt me ish-drejtorë dhe administratorë që kanë përfituar më parë nga tenderat publikë.

Diferenca mes fondit limit dhe ofertës fituese të “Inerti” është rreth 100 milionë lekë, çka ngre dyshime për manipulim të konkurrencës, shmangie të ofertave më të ulëta dhe maksimizim të fitimit për përfituesit e paracaktuar.

Ky tender nuk është rasti i parë ku përmendet emri i Arlinda Pogajt.

Në muajt e fundit, OBP ka shpërndarë dhjetëra kontrata në sektorë si ushqimi, ndërtimi dhe shërbimet, shpesh drejt kompanive me lidhje familjare ose biznesi me drejtues të bashkisë Tiranë dhe figura të mazhorancës. Tenderi i poligonit të qitjes është pjesë e një marrëveshjeje mes OBP-së, Drejtorisë së Burgjeve dhe kompanive të afërta me rrjetin e Veliajt, për të siguruar rrjedhë financiare dhe rritje ndikimi ekonomik në prag të zgjedhjeve lokale.

Skualifikimi masiv i operatorëve, kriteret e manipuluara dhe shpallja e fituesit të paracaktuar tregojnë për një skemë të strukturuar të korrupsionit, ku Arlinda Pogaj vepron si “menaxhere politike e tenderave”, ndërsa kompanitë e lidhura me Veliajn përfitojnë miliona nga fondet publike.