Aruba, ‘përralla berishiane’ apo e vërteta e fshehur? Pse shqetësohen mediat e qeverisë

Deklaratat që kreu i Partisë Demokratike, Sali Berisha ka bërë gjatë një konference me gazetarët ku ka paraqitur disa akuza ndaj kryeministrit Edi Rama dhe qeverisë së tij, duke përmendur një takim në vitin 2019 në ishullin holandez të Arubës, të cilin ai e lidh me narkotrafikantët dhe grupe të shpallura si organizata terroriste nga agjencitë ndërkombëtare, kanë  “shqetësuar” mediat qeveritare.

Berisha deklaroi se ekzistojnë përgjime të agjencive të specializuara ndërkombëtare që konfirmojnë pjesëmarrjen e disa ministrave të qeverisë shqiptare në këtë takim, që sipas tij, ka pasur për objektiv diskutimin e çështjeve të lidhura me narkotrafikun dhe projektet e zhvillimit të Tiranës.

Akuzat bazohen në zbulimet e përfshira në një libër të sapobotuar në Itali, me autor gazetarin italian Nello Trocchi, i cili shkruan se në Aruba ka patur një takim të zyrtarëve të lartë shqiptarë me krerë të narkotrafikut me lidhje globale. 

Dhe sot kur figurat e larta politike që i kanë mbështetur këto media, “po hanë kokat e tyre” mes kabinetit qeverisës, e sidomos kur kryebashkiaku, lali Eri është hedhur para drejtësisë nga udhëheqësi i mazhorancës, Edi Rama, këto media kanë nisur të merakosen për ‘gabimet’ që opozita bën.

Mediat proqeveritare kritikojnë Berishën si shpikës të “tullumbaceve politike”, duke theksuar se dosja italiane e quajtur “Enigma” është arkivuar nga Prokuroria e Firences.

Sulmet kanë vazhduar dhe sot teksa në Gjykatën e Tiranës është zhvilluar një seancë gjyqësore mes Erion Veliajt dhe një biznesmeni italian të quajtur Gabriele Tarroni Longinotti.

“Veliaj e ka paditur në gjykatë qytetarin italian pasi dy vjet më parë ai ishte përdorur nga televizioni i familjes Berisha për të bërë deklarata kundrejt pagesave të premtuara ndaj tij, duke ilustruar skenarë të gatshëm për t’i recituar. Këtë e ka bërë dy herë: njëherë tek emisioni “Piranjat” dhe njëherë për një gazetar të “Syri”, që e ka intervistuar në Dubai.

Sot para gjykatës, qytetari italian ka depozituar një deklaratë noteriale ku jo vetëm pohon se nuk e ka takuar kurrë Veliajn, por gjithashtu pranon se të gjitha deklaratat i ka bërë kundrejt premtimeve për pagesë nga televizioni “Syri TV” i Shkëlzen Berishës.

Ajo që është interesante sot, është fakti që ky lajm, i cili përbën një skandal të rëndë politik dhe mediatik, është totalisht i izoluar nga faqet e shtypit shqiptar dhe televizionet e mëdha shqiptare. Asnjë lajm, asnjë koment. Ndërkohë, janë të gjithë të shqetësuar se kush ka qenë në Aruba në takim me Artur Shehun, një vlonjat demokrat mik i Sali Berishës, që ka bërë të mundur vizitën e parë të Berishës në Vlorë në vitin 2000, duke i vënë në dispozicion njerëzit e tij dhe që më pas ka qenë gjithnjë sponsor i PD.” shkruan media qeveritare në versionin e një editoriali.

Por “beteja e këtyre mediave për të mbrojtur Veliajn dhe për të sulmuar opozitën nuk ndalet. Një tjetër televizion i ka dedikuar një shkrim teksa të gjithë akuzat e Berishës, bazuar tek libri i publikuar nga gazetari italian e quan “përralla berishiane”.

“Prej ditësh, opozita po e fryn si tullumbace ekzistencën e një samiti të supozuar mes kriminelësh në vitin 2019 në ishullin holandez të Arubës, ku sipas saj, kanë marrë pjesë edhe përfaqësues (anonimë) të qeverisë Rama. Akuzat bazohen në zbulimet e përfshira në një libër të sapobotuar në Itali, me autor gazetarin italian Nello Trocchia, libër që shumica e analistëve që flasin për të, në fakt nuk e kanë lexuar kurrë. Por ne po, e kemi lexuar.

Nëse do ta kishin lexuar, do t’u duhej të përmendnin të paktën dy elementë thelbësorë që rrëzojnë përrallën berishiane. Elementi i parë është se vetë gazetari shkruan se takimi misterioz në Aruba përmendet në një dosje të quajtur “Enigma”, e hapur nga Prokuroria e Firences në vitin 2018 por që më pas, siç pranon vetë autori, është arkivuar. Dhe këtë e përsërit dy herë, për të shmangur çdo keqkuptim (faqe 233 dhe 240). Pra, as autoritetet italiane nuk i kanë dhënë peshë ekzistencës së atij takimi, e aq më pak mundësisë që ai të përbëjë provë për ndonjë vepër penale. Ndaj, dosja është arkivuar.”

Mirëpo pas 2 vitesh Longinoti paska ndërruar version, duke pohuar para gjykatës që gjithcka ka thënë kanë qenë gënjeshtra dhe se për këtë i është ofruar para.

Por meqenëse personi në fjalë nuk qenka i bindur dhe është i lëkundshëm nga deklaratat që i bën me vetëdijen e plotë, a mund të themi sot se italianit i është ofruar “ kompromis” për të ndryshuar version?

“Ne jemi të gatshëm të përballemi, jo vetëm me Longinotin, por edhe me ata që e kanë takuar këto ditë për të marrë atë që iu duhej.

Sa për hallin e mediave të mbetura besnike të Veliajt, halli i tyre nuk është as problemi jonë e as i publikut. Lali i tyre do të qëndrojë aty ku është, pavarësisht çdo përpëlitjeje publike.

Në këtë foto/screenshot, një komunikim i kohës kur Longinoti që sot flet për “blerje”, para disa kohësh na lutej t’ia merrnim dëshminë, dhe ankohej se mediat shqiptare nuk e lejojnë të flasë dhe se do të “luftojë për drejtësi.” Por e vërteta është se kur drejtësia blihet, ajo pushon së qeni drejtësi dhe kthehet thjesht në një pazar Longinotësh”, shprehet emisioni “Piranjat”.

Në këtë rrjet manipulimi, edhe figura të larta si Belinda Balluku kanë shërbyer si mburojë politike, duke pohuar në Kuvend se asnjë deputet nuk ka qenë në Aruba, ndërkohë që mbrojnë kryeministrin dhe Veliajn nga çdo përgjegjësi politike apo ligjore.

Balluku e cila në fjalën e saj nga Kuvendi është shprehur se asnjë nga deputetët e pranishëm nuk ka qenë në një takim në Aruba.

Sipas Berishës, Balluku u betua vetëm për të gjithë kolegët që ishin aty në parlament se nuk kanë qenë në Aruba, por shiti Ramën dhe dy të tjerë që mungonin.

Në këtë kontekst, beteja për të treguar të vërtetën mbi takimin e Arubës, lidhjet me narkotrafikun dhe investimet e dyshimta mbetet obligimi i opozitës, ndërsa mediat pranë qeverisë vazhdojnë të mbrojnë Veliajn dhe të minimizojnë çdo dëm politik për Ramën./POLITIKO.AL