Debati për Ballukun/ Për cilën Europë po flet Rama?

Deklaratat e kryeministrit Edi Rama në podcastin e tij, ku pezullimin e Belinda Ballukut e cilësoi “absurd, të paprecedentë në Europë”, hapin pa dyshim një debat të ri politik dhe juridik. 

Sot në podcastin “Flasim”, Rama tha duke iu referuar Venecias dhe Gjykatës së Strasburgut në lidhje me vendimin e GJKKO-së për pezullimin nga funksionet publike të ish-zv/kryeministres Belinda Balluku, se ministrat nuk mund të shkarkohen nga gjykata pasi është ndërhyrje e drejtpërdrejtë në kompentencat e kryeministrit dhe presidentit.

Madje, Rama e quajti vendimin e GJKKO një shpikje.

"Prokuroritë e Gjykatat nuk hyjnë fare në këtë mes dhe nuk e bëjnë kurrësesi këtë. Asnjëherë. Askund në Europë.

E nëse Shqipëria do të hynte në analet e historisë së drejtësisë europiane me një shpikje të tillë, kjo do të ishte, largqoftë, një shfaqje ulëritëse papjekurie demokratike dhe institucionale.

Uroj që Gjykata Kushtetuese t’ia kursejë këtë shfaqje Shqipërisë”, tha Rama.

Por, për cilën Europë po flet kryeministri?

Kjo për faktin se në Europën që njohim të gjithë, ministrat dorëhiqen edhe për një dyshim, apo për një faturë të parregullt. Ndërsa në “Europën” që përshkruan Rama, mesa duket, ministrat e pandehur janë viktima të drejtësisë dhe gjykatat shihen thuajse si faktor destabilizues.

Madje, siç sjell në vëmendje  kreu i grupit parlamentar i PD, Gazment Bardhi, në vende të ndryshme të Europës ministrat janë pezulluar apo dorëhequr për raste shumë më të thjeshta që nga hetimet për menaxhim të paqartë fondesh deri te konfliktet e interesit, duke treguar se pezullimi i një zyrtari të lartë politik nuk është aspak ‘i paprecedentë’, por standard normal i qeverisjes demokratike.”

Ironia qëndron pikërisht te përdorimi i konkluzionit "Askund në Europë”.

Nëse analizojmë këtë frazë të kryeministrit, është e vërtetë që jemi unikë: askund në kontinent nuk ka një kryeministër që del publikisht për të mbrojtur një anëtare të kabinetit, e cila zyrtarisht është shpallur e pandehur nga SPAK.

Në asnjë vend të BE-së nuk ka debat se “a lejohet” që drejtësia të prekë një zyrtar të lartë politik sepse ligji vlen njesoj për të gjithë.

Ndërsa në versionin e Europës që përshkruan Rama, duket se është gjykata ajo që ndërhyn në punët e qeverisë dhe se qeveria nuk duhet t’i nënshtrohet ligjit

Por kushdo që i njeh institucionet ndërkombëtare, e di se ato flasin për pavarësi të pushteteve, jo për imunitet politik ndaj hetimit.

Prandaj pyetja mbetet e drejtë: për cilën Europë po flet Rama?

Për Europën e standardeve, ku përgjegjësia politike paraprin drejtësinë, apo për një Europë imagjinare, ku gjykatat duhet të rrinë urtë që të mos “prishin terezinë e qeverisë”? S.F