Dy skenarët e Sali Berishës për thirrjen e Kuvendit Kombëtar, çfarë parashikon statuti i PD

Pas një turi takimesh nga veriu në jug, Lezha është qyteti i fundit që ish kryeministri Sali Berisha pritet të mbajë këtë javë ‘Foltoren’ me demokratët.

Berisha e nisi aksionin politik brenda kësaj force politike, pas vendimit të Lulzim Bashes për përjashtimin e tij nga grupi parlamentar, si pasojë e përcaktimit “non grata” nga Departamenti amerikan i Shtetit në maj të këtij viti.   

“Foltorja”e konceptuar si një bashkëbisedime me bazën e demokratëve synon, siç e njoftoi vetë Berisha, mbledhjen e firmave të 1500 delegatëve të Kuvendit Kombëtar, për të kërkuar thirrjen e forumit më të lartë të PD. 

Në takimin e “Foltores” në Dibër, ish-kryeministri Berisha tha se janë mbledhur 2/3 e delegatëve për Kuvendin Kombëtar, ndaj duket se Lezha do të jetë tryeza nga ku Berisha do të komunikojë edhe datën kur pritet të thirret Kuvendi Kombëtar.

Nëse i referohemi statutit të PD, neni 42 thuhet se PD ka afat një mujor për mbledhjen e kuvendit nga momenti i depozitimit të firmave të grumbulluara.

“Data e zhvillimit të Kuvendit dhe rendi i ditës njoftohen të paktën një muaj përpara ditës së parë të Kuvendit”, thuhet në statut.

Që do të thotë se Kuvendi pritet të mbahet në fillim të dhjetorit.

Duket se Berisha i ka bërë mirë llogaritë pasi fillimi i dhjetorit koencidon me dy data simbolike për Partinë Demokratike.

Pra, Kuvendit parashikohet të mbahet ose në 8 dhjetor, dita e rinisë që shënon nisjen e protestave të studentëve kundër regjimit komunist duke kërkuar pluralizëm politik, ose në 11 dhjetor është dita e themelimit të PD.

Kështu deklaroi në Report Tv, edhe ish-anëtari i Këshillit Kombëtar të PD-së, Edvin Kulluri. Sipas tij, Kuvendi Kombëtar pritet të mblidhet në datën e themelimit të PD-së. Ai tha se rreth 80% e delegatëve janë dakord me iniciativën e Berishës për të thirrur Kuvendin Kombëtar.

Çfarë ka deklaruar Lulzim Basha për mbledhjen e Kuvendit Kombëtar

Që në krye të herës, kryetari i partisë Demokratike, Lulzim Basha është shprehur se sa të jetë në krye të partisë, nuk do të ketë asnjë kuvend për të kundërshtuar vendimet e amerikanëve.

Ndër të tjera kryedemokrati ka theksuar se ai nuk do të lejojë ngritjen e institucioneve paralele dhe bunkierëve brenda partisë.

“E vërteta është e thjeshtë unë kam thënë se detyra e kryetarit të PD-së është zbatimi i statutit, dhe neni 3 është i qartë. Ndaj kam thënë se kuvend kombëtar që të marrë në shqyrtim vendimet e qeverisë amerikane nuk ka për të pasur sa të jem në krye të saj. Ajo që duhet t’ju habisë ju, është se personi që bërtet statuti, i jep vetes kompetenca që nuk i ka.

Sali Berisha nuk ka mbifuqi mbi statutin, për të thirrur ndonjë institucion, dhe statuti ka të përcaktuar, Berisha mund të thërrasë institucione paralele me qëllim për ta kthyer partinë në bunker për halle personale, por jo n ë këtë rast. Institucione paralele dhe bunker nuk thërras dot. Kushdo qoftë ti drejtohet institucioneve të partisë dhe jo bunkerit. Nuk ka njeri që çdo institucion i partisë ka procesverbale për çdo takim dhe për çdo çështje demokratike”, është shprehur Basha. 

Edhe deputeti Ervin Salianji, i cili njihet si mbështetës i Bashës deklaroi pak ditë më parë në Syri.tv se nuk mjaftojnë 1400 firmat, por duhet edhe një objekt i njohur nga statuti që të mblidhet Kuvendi Kombëtar. E njëjta deklaratë erdhi më herët edhe nga kryetari i grupit parlamentar të PD-së, Alfred Rushaj.

Po në të njëjtën studio ndërhyri ish-Sekretari i Përgjithshëm i PD-së, Arben Ristani, i cili tha se ka dy mënyra kur mblidhet Kuvendi;  e para kur e thërret Kryetari dhe Këshilli Kombëtar dhe e dyta kur e thërret një e katërta e anëtarëve të Kuvendit. Sipas tij, askush nuk mund ta ndalojë, as Këshilli Kombëtar, siç pretendojnë mbështetësit e Bashës.

Si parashikohet në statutin e PD

Në nenin 43 pika 2 thuhet qartë se vendimin për mbledhjen e Kuvendit Kombëtar e merr Këshilli Kombëtar ose Kryesia e PDSH-së, me propozim të Kryetarit të PDSH-së. Kuvendi mund të mblidhet edhe kur e kërkojnë 1/4 e anëtarëve të PDSH-së ose 1/4 e anëtarëve të Kuvendit Kombëtar.

“Kuvendi Kombëtar mblidhet si rregull çdo katër vjet. Vendimin për mbledhjen e Kuvendit Kombëtar e merr Këshilli Kombëtar ose Kryesia e PDSH-së, me propozim të Kryetarit të PDSH-së. Kuvendi mund të mblidhet edhe kur e kërkojnë 1/4 e anëtarëve të PDSH-së ose 1/4 e anëtarëve të Kuvendit Kombëtar. Data e zhvillimit të Kuvendit dhe rendi i ditës njoftohen të paktën një muaj përpara ditës së parë të Kuvendit. Punimet e Kuvendit drejtohen nga një Komision i përbërë nga 5 anëtarë, i cili zgjidhet në fillim të Punimeve të tij, me propozimin e Kryetarit të Partisë”, thuhet në statut.

Nga ana tjetër, mbështetës të Bashës artikulojnë edhe një tjetër pikë të nenit 43 statutit të PD ku thuhet se dy forumet që thërrasin Kuvendin janë Kryesia dhe Këshilli Kombëtar, pra firmat e mbledhura nga Berisha duhet të kalojnë pikërisht nga këto 2 organet, të cilat vendosin nëse do ta mbledhin Kuvendin. 

Ish-kryeministri Berisha njoftoi se do të kërkojë mbledhjen e Kuvendit Kombëtar për të zhvilluar një referendum ndaj vendimit të Lulzim Bashës për përjashtimin e tij nga grupi parlamentar.