‘Luftë’ bravash në PD dy ditë para referendumit për shkarkimin e Bashës

Ndërsa na ndajnë edhe dy ditë nga referendumi i paralajmëruar në Kuvendin e 11 dhjetorit në mbarë vendin për shkarkimin e kryedemokratit Lulzim Basha, në PD duket se ka nisur një përplasje e re.

Në disa degë në rrethe sot është raportuar se janë kyçur me dry portat kryesore të degëve të Partisë Demokratike.

Kështu, pasi denoncimeve të këtyre ditëve se janë ndërruar bravat e FRPD –së dhe LDG-së në selinë qendrore të Partisë Demokratike në Tiranë, duket se këto akte janë përshkallëzuar edhe në rrethe, si në Elbasan, Shkodër, Sarandë.

Rasti i Elbasanit u denoncua nga deputeti Luçiano Boçi.

Më anë të një postimi në Facebook, Boçi thotë se urdhri për mbylljen e derës ka ardhur 'nga lart', teksa shton se  anëtarësia do ta shprehë vullnetin e saj në referendumin e 18 dhjetorit.

"Të kesh frikë nga anëtarësia. Edhe në Elbasan PD ndërron bravat e dyerve!!!??? Me urdhër nga lart kuptohet. Ndonëse po vrapojnë për të zyrtarizuar përçarjen, janë në panik nga……anëtarësia dhe verdikti i saj. E tmerrshme se si mund të përfundojnë në këtë derexhe. Po vota nuk është thjesht një letër që hidhet në një kuti. Vota është shpirt e mendje! Votën anëtarësia e ka shprehur e ka dhënë çdo ditë kudo, në familje, në klub, në biseda me njëri-tjetrin.

Po ne sa e sa herë i kemi ftuar i kemi thirrur të votojnë, duke rrahur gjoksin e duke thënë: sa shumë janë njërëzit tanë? Tani ju i përzeni, ju i refuzoni, i mbyllni derën e shtëpisë së vet?! Ju qofshi në marrëzinë tuaj! Dyert dhe mund t’i mbyllni po e vërteta e vullnetit të tyre nuk mund të kyçet. Anëtarësia do ta shprehë vullnetin e saj në referendum.  Mos keni iluzione se i ndaloni dot duke futur në xhep bravat! E shtunë dt 18 nga ora 08-17.00. PD i takon anëtarëve të saj", shkruan Boçi.

Më herët, në degën e PD në Shkodër hyrja kryesore është mbyllur me zinxhirë. Kjo situatë është denoncuar nga një prej anëtarëve të kryesisë së PD-së në Shkodër, Ervin Gjini, i cili i ka bërë thirrje kreut të PD-së në Shkodër Xhevdet Amulit që të distancohet pasi dega e PD-së nuk është pronë private. 

Disa javë më parë edhe deputeti demokrat, Luan Baçi denoncoi ndërrimin e bravave edhe në degën e PD-së në Fier. 

Në lidhje me këtë situatë ka reaguar edhe ish-Kryeministri Sali Berisha i cili ka postuar edhe fletën e votimit të referendumit.

 ‘Nuk ka vulë, bravë apo dryn që mund të pengojë vullnetin dhe votën e lirë të demokratëve!’, shkruan Berisha në Facebook.

Kujtojmë se akte të tilla vijnë pas vendimit në Kuvendin e 11 dhjetorit për referendum për zyrtarizimin e shkarkimit të Lulzim Bashës.

Megjithatë, Ivi Kaso, anëtari i Komisionit të Rithemelimit ka theksuar në Syri.tv se Referendumi do të zhvillohet pasi janë marë të gjitha masat. Sipas tij, selitë e kyçura të PD-së në qytete të ndryshme nuk e pengojnë dot zhvillimin e këtij procesi historik, pasi demokratët mund të përdorin edhe ambiente alternative.