Nga Brukseli në FBI, si u kapën në skandale aleatët ndërkombëtarë të Ramës

Skandalet e viteve të fundit në rang zyrtarësh të lartë ndërkombëtare kanë prekur edhe figura që janë konsideruar si “miq të afërt” të kryeministrit Edi Rama.

Nga ish-diplomatë të Bashkimit Europian, te ish-agjentë të FBI-së e deri te ish-liderë ballkanikë, një sërë emrash të fuqishëm janë përballur me akuza, hetime dhe procese gjyqësore, duke ngritur pikëpyetje mbi lidhjet politike që kreu i qeverisë shqiptare ka kultivuar ndër vite.

Më i freskëti është rasti i Federica Mogherinit, ish-shefe e diplomacisë së BE-së, e cila ndodhet nën hetim për abuzim potencial me fondet e BE. Por, cilët janë emrat e tjerë të përfshirë skandale veç Mogherinit? Le të kujtojmë disa prej tyre. 

Federica Mogherini, ish-Përfaqësuese e Lartë e BE-së dhe aktualisht rektore e Kolegjit të Evropës, u përfshi së fundmi në një skandal financiar, pasi institucionet europiane nisën verifikime për keqpërdorim të mundshëm të fondeve gjatë viteve 2021–2022.

Mogherini është cilësuar shpesh si një aleate politike e Edi Ramës në Bruksel, duke mbështetur retorikën e tij për hapjen e negociatave dhe për “stabilitetin” në rajon. 

Charles McGonigal, ish-zyrtari i FBI-së
Një nga skandalet që preku drejtpërdrejt qeverinë shqiptare ishte arrestimi dhe më pas dënimi i ish-shefit të kundërzbulimit të FBI në New York, Charles McGonigal.

Dokumentet gjyqësore treguan se McGonigal kishte zhvilluar kontakte të fshehta me zyrtarë shqiptarë, përfshirë kryeministrin Rama, gjatë kohës kur ai akuzohej për lidhje të paligjshme financiare me oligarkë të huaj. Roli i tij në Shqipëri u bë objekt i një debati të gjerë politik, pasi vizitat, takimet dhe ndërhyrjet e tij përkonin me zhvillime të rëndësishme në energji dhe marrëveshje biznesi.

Sebastian Kurz, ish-kancelari i Austrisë, i dënuar për dëshmi të rreme
Një tjetër emër i lidhur publikisht me Ramën është  edhe ish-kancelari austriak Sebastian Kurz, i cili pas një sërë skandalesh u përball me drejtësinë dhe u dënua për dhënie të deklaratave të rreme. Kurz dhe Rama kanë pasur marrëdhënie të ngushta politike dhe publike, me Kurz që ka vizituar shpesh Tiranën dhe e ka promovuar Ramën si partner të besueshëm në rajon.  

Florian Coldea, ish-shef i shërbimit sekret rumun

Coldea ishte emëruar si “këshilltar i jashtëm” i Ramës për çështje sigurie.  
Sipas mediave në Rumani dhe Shqipëri, ai u vu nën hetim për korrupsion, pasi pati akuza se ka kërkuar shuma të mëdha parash (rreth 700,000 euro) për të ndikuar drejtësi në favor të një biznesmeni.  

Tony Blair, ish-kryeministër britanik

Blair nuk është arrestuar, por ka qenë pjesë e shumë skandaleve të mëdha financiare dhe lobuese si shpërthimi i Panama Papers (lidhje me kompanitë offshore për llogari të gruas së tij), kontrata lobimi me regjime autoritare, pagesa të dyshimta nga qeveri të huaja.
Organizata e tij, Tony Blair Institute, është kritikuar shpesh për mungesë transparence dhe për financime nga qeveri jo demokratike. Sakaqm, Rama ka pranuar publikisht se është këshilluar nga Tony Blair.

Kështu, sic shihet disa prej figurave ndërkombëtare që janë prezantuar për vite me radhë si partnerët më të afërt të kryeministrit shqiptar, po përballen sot me akuza serioze, procese gjyqësore ose dënime.

Lista e “miqve” në vështirësi po zgjatet, dhe secili prej këtyre rasteve shton pikëpyetje të reja për natyrën dhe qëllimin e këtyre aleancave. S.F