"Nuk e di, s'më kujtohet", deklaratat e dëshmitarit 'pa memorie'; çfarë tha Balla për 4 orë në GJKKO?

Çfarë ndodhi sot?

Në Gjykatën e Posaçme u zhvillua një seancë e tensionuar për dosjen “Partizani”, ku kreu i grupit parlamentar të PS, Taulant Balla, u paraqit si kallëzues dhe dëshmitar.

Seanca u dominua nga pyetje të përsëritura dhe ndërhyrje të trupit gjykues, me fokus në mënyrën se si janë siguruar provat dhe baza e kallëzimit.

Konteksti

Balla është kallëzues në dosjen ku janë të përfshirë Jamarbër Malltezi dhe kreu i PD Sali Berisha, për privatizimin dhe zhvillimin e kompleksit “Partizani”.

Ai pretendon se bëhet fjalë për një proces me elemente korrupsioni, favorizimi dhe pasurimi të paligjshëm, ndërsa mbrojtja e kundërshton duke kërkuar prova konkrete dhe dokumentacion.

Dyzimi i Ballës në dëshmi

Gjatë seancës u vu re një kontrast i përsëritur në përgjigjet e tij: nga njëra anë ai theksonte se kallëzimi bazohej në materiale dhe dokumente të mbledhura prej tij, ndërsa nga ana tjetër shpesh deklaronte mungesë kujtese ose pasiguri për detaje konkrete.

“Nuk më kujtohet, është 6 vite më parë, ndoshta po,” u shpreh Balla kur u pyet për një shkresë të Ministrisë së Mbrojtjes.

Në disa raste ai deklaroi gjithashtu se “s’e mbante mend” mënyrën e depozitimit të dokumenteve apo përmbajtjen e tyre, duke shtuar se duhej t’i verifikonte në kallëzim.

Në lidhje me dorëzimin e kallëzimit, Balla tha fillimisht se ishte dorëzuar dorazi në prokurori, ndërsa më pas shtoi se mund të ishte depozituar nga punonjës të Kuvendit.

Pyetje mbi dokumentet dhe bazën ligjore

Mbrojtja vijoi me pyetje të detajuara mbi ekzistencën e dokumenteve për shpronësime, marrëveshje shtetërore dhe vlerësimin e pronës. Balla deklaroi se një pjesë e referimeve i kishte marrë nga burime publike dhe se, sipas tij, prona ishte shpronësuar.

Ai shtoi se vlera e privatizimit i dukej qesharake, duke vlerësuar se mund të ishte “ndoshta 10 herë më e lartë”, duke shtuar se nuk ishte ekspert i vlerësimeve ekonomike.

Klodian Skënderaj: Thatë se e kam bërë kallëzimin si deputet dhe shtetas. Në dijeni tuaj kallëzimin që keni nënshkruar, e keni bazuar në dokumentacion mbështetës? Keni bashkëngjitur dokument?

Balla: Ç’kam pasur në dispozicion, e kam bashkëngjitur.

Skënderaj: Si i keni siguruar?

Balla: Një pjesë në rrugë zyrtare një pjesë nga qytetarët. Tri janë burimet, media, qytetarët, linja e posaçme e deputetit përmes shkresave.

Skënderaj: Si deputet ju ka ardhur ndonjë shkresë ju ka ardhur shkresë nga MM që ia keni bashkëngjitur kallëzimit? Kjo është shkresa?

Balla: Nuk më kujtohet, është 6 vite më parë, ndoshta po!

Skënderaj: Si u depozitua në prokurori kallëzimi?

Balla: Me sa mbaj mend është depozituar dorazi.

...

Mëngjesi: Na refero disa fakte që ke hetuar vetë, apo i ke parë nga dokumentacioni?

Balla: S’kemi të bëjmë me rast tipik të korrupsionit dhe fshehjes së pasurisë. Bëhet fjalë për një pronë të Ministrisë së Mbrotjes që privarizohet, kthehet prona, krijohet kompani, ndërtohet…. Faktet janë në nenet e Kodit Penal, mbi të cilat mbështetet arsyetimi im.

Mëngjesi: Një fakt a dokument, ku e bazon korrupsionin?

Balla: E mendoj kështu!

Ndërhyrjet e gjykatës

Gjatë seancës, trupi gjykues ndërhyri disa herë për të ruajtur rendin procedural, duke i kujtuar dëshmitarit rolin e tij në proces.

“Mbani vendin tuaj, jeni thjesht dëshmitar. Nuk lejohen komentet,” u shpreh gjykata në një moment të seancës.

Skënderaj: Mbani mend që jeni shprehur se pronarët janë kompensuar nga Italia fashiste dhe se kjo tokë është blerë nga Shefqet Vërlaci dhe Jako Mane?

Balla: I qëndroj asaj që kam thënë në kallëzim!

Balla: Vazhdoni!

Elsa Ulliri: Ndaloni komentet, e vendos gjykata kur vazhdon ose jo.

Balla: Tregohuni e drejtë, edhe këta bënë tërë kohën komente.

Përballja Balla-Malltezi

Seanca është shoqëruar me një përballje të drejtpërdrejtë me Jamarbër Malltezin, i cili e ka vënë dëshmitarin përballë një sërë pyetjesh mbi mënyrën e sigurimit të provave dhe njohjen e dokumenteve të çështjes.

Malltezi e ka pyetur Ballën mbi bazën e provave, afatet e procedurave dhe njohjen e dokumenteve, duke e sfiduar disa herë për saktësinë e deklarimeve të tij. Por, Balla ka këmbëngulur se kallëzimi është bërë në interes publik dhe si pjesë e detyrës së tij si qytetar dhe përfaqësues politik.

Nga ana tjetër, Malltezi e ka vijuar ballafaqimin me pyetje të detajuara mbi kronologjinë e ngjarjeve dhe dokumentacionin, çka e ka vendosur Ballën dëshmitarin në vështirësi për sqarime të plota mbi disa elemente të dosjes.

Malltezi: Një pjese e këtyre të dhënave janë të dhëna personale? Si janë marrë provat?

Balla: U jam drejtuar institucioneve në lidhje me procedurat që janë ndjekur, një pjesë kanë qenë edhe nëpërmjet qytetarëve.

Malltezi: A e dini kush është “Laë Farm Firm”?

Balla: Mund ta kem përdorur për konsulencë ligjore.

Malltezi: E keni angazhuar ju Alket Hysenin?

Balla: Ka qenë deputet. Nuk e kam angazhuar si zyrë avokatie, por mund të jem konsultuar me të.

Malltezi: Deputeti mund të ushtrojë aktivitet privat? Alket Hyseni?

Balla: Nuk e di.

Malltezi: Nga kush iu dha akses studios “H&A Laë”?

Balla: Nuk e di.

...

Gjatë gjithë seancës, mbrojtja këmbënguli në kërkesën për dokumente konkrete dhe fakte të verifikueshme, ndërsa Balla u mbështet kryesisht në kombinim mes materialeve të depozituara, burimeve publike dhe dyshimeve të ngritura prej tij./ Politiko.al