Pjesëmarrja në samitin anti-Trump në Spanjë dhe qëndrimi i paqartë i Ramës

Çfarë ka ndodhur?

Kryeministri spanjoll udhëhoqi fundjavën që lamë pas një konferencë progresive në Barcelonë, ku mblodhi së bashku liderët botërorë që kundërshtojnë politikën e MAGA-s.

Mediat ndërkombëtare si Euronews shkruan se udhëheqësi spanjoll paralajmëroi për një valë reaksionare ndërkombëtare që do të nxiste gjuhën e urrejtjes, seksizmin, luftën dhe përçarjen, pa e përmendur shprehimisht Presidentin e SHBA-së, Donald Trump.

"Nuk ka rëndësi sa shumë bërtasin, apo sa gënjeshtra përhapin", tha Sánchez në fjalimin e tij. "Koha për reaksionarin dhe ultra të djathtën ka mbaruar".

Lista e të ftuarve përfshinte Presidentin e Afrikës së Jugut Cyril Ramaphosa, Presidentin kolumbian Gustavo Petro dhe Presidenten meksikane Claudia Sheinbaum. Të tre janë përplasur me Presidentin e SHBA-së Donald Trump për tarifat dhe migracionin, ndërsa Afrika e Jugut është përballur gjithashtu me akuza për racizëm "anti-të bardhë" - pretendime të përsëritura nga miliarderi i teknologjisë Elon Musk.

Një delegacion evropian përfshinte Zëvendëskancelarin gjerman Lars Klingbeil, Sekretarin e Jashtëm të Mbretërisë së Bashkuar David Lammy, udhëheqësen e opozitës italiane Elly Schlein dhe politikanin belg Paul Magnette. Mes tyre ishte edhe kryeministri Edi Rama, siç duket edhe nga foto.

Konteksti

Sánchez tha se konferenca e Barcelonës - e reklamuar jozyrtarisht si një përgjigje e krahut të majtë ndaj tubimit konservator CPAC - do të shërbejë për të bashkuar "forcat progresive" nën një flamur të vetëm.

Ndërsa asnjë nga udhëheqësit nuk e përmendi Presidentin e SHBA-së Donald Trump me emër, referencat për udhëheqësin amerikan u shfaqën vazhdimisht, së bashku me kritikat ndaj politikave të tij. Nga tarifat te lufta në Iran, zyrtarët bënë thirrje për një përgjigje progresive ndaj "një vale reaksionare".

Guvernatori i Minesotës Tim Walz, i cili kandidoi së bashku me Hillary Clinton kundër Donald Trump, iu drejtua një turme të madhe të shtunën gjatë Mobilizimit Global Progresiv inaugurues, duke e përshkruar Trump pa një plan të vërtetë.

Walz denoncoi një ndryshim në dukje autoritar nga Trump, duke sugjeruar "ne duhet ta quajmë atë që është. Ky është fashizëm. Ose të paktën është fashizëm kurioz siç do të ishte".

Presidenti i Brazilit Lula iu bashkua kritikave për luftën në Iran dhe përshëndeti vendimin e Spanjës për t'u mohuar forcave amerikane aksesin për të përdorur bazat ushtarake spanjolle për të sulmuar Iranin.

Çfarë deklaroi Rama pas takimit?

Duke folur në podkastin e tij “Flasim”, këtë të diel, Rama ndau përshtypjet nga vizita në Spanjë, apo si i erdhi ftesa për të marrë pjesë.

Ai i shmangu komentet se Sanchez po ndërton koalicionin anti-Trump.

"Pas Romës pata një vizitë në Barcelonë, ku me ftesë të kryeministrit Sanchez, mora pjesë në tryezën e përbashkët të Samitit, të quajtur në mbrojtje të demokracisë. Dhe para këtij Samiti, së bashku me delegacionin, u pritëm me nderim të veçantë nga Dhoma e Tregtisë së Katalonjës.

Dikur Shqipëria në Spanjë lidhej me paragjykime, ndërkohë sot Shqipëria është një destinacion kryesor turistik për të rinjtë spanjollë. Ndërsa marrëdhëniet politike mes dy vendeve janë në një nivel tjetër. Këto ndalesa nxjerrin në pah qartë se si partnerë seriozë, falë ecurisë dhe transformimit, ne gjendemi në një pikë ku kemi vetëm një rrugë, të ecim me shpejtësi përpara”, tha mes të tjerash Rama.

Pra, siç duket, Rama e shmang objektin e samitit ku ka marrë pjesë dhe nuk e përmend faktin e angazhimit majtist kundër të djathtës në botë.

Po ashtu, ai nuk përmend as që i ftuar kryesor në këtë organizim ishte Aleks Soros, djali i biznesmenit George Soros.

Rama pati një takim kokë më kokë mes tyre, takim që është bërë publik nga Alex Soros, i cili ka postuar pamjet, por vetë Rama nuk ka publikuar foto.

Sakaq, Alex Soros e ka shoqëruar me mbishkrimin “progressives in Barcelona” (progresistët në Barcelonë) foton me Ramën.

Çfarë ndodhi pas takimit?

Takimi i Ramës në Barcelonë nuk kaloi pa vëmendje as nga politika shqiptare.

Kreu i PD, Sali Berisha komentoi pjesëmarrjen e kryeministrit Edi Rama në këtë konventë dy-ditore të reklamuar si "CPAC progresiv", në Barcelonë.

Madje Berisha ashpërsoi tonet duke deklaruar se Rama fshehu pjesëmarrjen në samitin global në Spanjë sikur të ishte një prostitutë politike.

"Kur një kryeministër shkon në një vend, merr pjesë në një samit sikur të ishte klandestin, në një kohë kur ajo ishte ngjarje publike ndërkombëtare, e ftuar nga kryeministri spanjoll, me një numër të konsiderueshëm kryeministrash dhe kryetarë shtetesh.
Çfarë emri mund t’i vini ju një kryeministri të tillë që fsheh pjesëmarrjen e tij në një samit ndërkombëtar dhe e shet se ishte për një vizitë zyrtare në Spanjë?
A mund ta quani këtë një burrec, një langaraq, por mundet edhe një prostitutë amorale politike?", u shpreh Berisha.

Ai shtoi se prania e Ramës në samitin anti-amerikan është shpërdorim absolut i postit dhe detyrës.
"Ky është keqpërdorimi absolut, është shpërdorimi absolut i postit dhe detyrës. U përpoq ta maskojë me çdo kusht.
U përpoq të mashtrojë shqiptarët me çdo kusht. Ju e patë vetë. Dënoj me forcë një qëndrim të tillë poshtërues për një kryeministër", u shpreh Berisha.

Ndërsa në Barcelonë u artikulua hapur një bosht politik me ngarkesë të fortë ideologjike, në Tiranë kryeministri zgjodhi t’i anashkalojë këto tema dhe të flasë për gjëra dytësore.

Kjo sjellje krijon përshtypjen se publikut nuk i thuhet e gjithë e vërteta. Dhe kur transparenca mungon, lind natyrshëm pyetja: çfarë po fshihet dhe pse? /Politiko.al/