Rama centralizon edhe ujin, nismat e qeverisë që po zhbëjnë pushtetin vendor

S. Gjidede

Nga fillimi i vitit që vjen, uji i pijshëm do të menaxhohet nga një operator kombëtar, si një mekanizëm që pretendohet se do të optimizojë furnizimin për qytetarët.

Kjo nismë u prezantua sot nga kryeministri Edi Rama, sipas të cilit 15 shoqëritë rajonale të ujit në vend do të integrohen nën drejtimin e një institucioni të vetëm, Operatorin Kombëtar të Ujit. 

Përmes kësaj platforme, në Operatorin Kombëtar të Ujit, 61 bashkitë e vendit do të jenë aksionere me 2 deri 5%, nga 49% që kanë aktualisht në 15 shoqëritë rajonale.

Kjo lëvizje e Ramës e paraqitur si reformë, në fakt duket si një hap i rradhës për centralizimin e puhstetit ekzekutiv në dëm të autonomisë vendore. 

Reduktimi i aksioneve nga 49% në 2-5% është një sinjal konkret që dëshmon se venbdimarrja për një shërbim jetik si uji po i largohet nga duart komuniteteve dhe po përqëndrohet në një institucion të kontrolluar nga qeveria. 

Deri tani, Rama e ka cilësuar pushtetin lokal si një strukturë të paaftë dhe po gjen mekanizma për ta zëvendësuar nga qeveria. 

Por, çfarë tjetër i mori Rama pushtetit vendor ?

Shkarkimi i drejtorëve të bashkive 

 

 

Pak javë më parë, Rama kërkoi publikisht shkarkimin e drejtuesve të bashkive në Vlorë e më pas 'zgjeroi' hartën edhe në zona të tjera pasi i akuzoi për neglizhencë gjatë sezonit veror. 

Por në vend të një procesi institucional, u vu re një ndërhyrje politike ku emërimet dhe shkarkimet u bënë nga grupe të deleguara të PS. 

Ekspertë të politikës e kanë parë këtë sjellje si një spektakël propagandistik për të mbuluar dështimet e pushtetit vendor dhe si një përpjekje për personalizimin e pushtetit në çdo hallkë të jetës publike.

Analisti Fatos Lubonja i konsideroi këto veprime si mesazhe antidemokratike në një deklaratë mediatike.

“Pyetja që lind është: si mund të ndëshkohen të gjithë lojtarët e një skuadre që ka arritur një rezultat ‘të shkëlqyer’ zgjedhor? Është e qartë se nuk është puna që i ka sjellë këtë rezultat, përkundrazi, vendi po përjeton një degradim të rëndë politik, ekonomik e kulturor,” tha Lubonja .

Edhe pedagogu i Shkencave Politike, Ermal Hasimja, e konsideroi shqetësues përvetësimin e pushtetit vendor nga kryeministri dhe mungesën e argumentimit ligjor për shkarkimet.

“Rama po përpiqet të zhvendosë përgjegjësinë e dështimeve te të tjerët dhe të paraqitet vetë si autoriteti i vetëm moral dhe politik në vend,” tha Hasimja, duke shtuar se kjo ndodh edhe në funksion të personalizimit gjithnjë e më të theksuar të fushatave zgjedhore.

Lirimi i hapësirave publike 

Rama ka urdhëruar së fundmi edhe lirimin e hapësirave publike nga ndërtimet pa leje, një kompetencë që tradicionalisht i takon bashkive. 

Shoqata për autonomi vendore ka reaguar disa herë për këtë qasje të kryeministrit duke kërkuar trasnparencë mbi kriteret e ndërhyrjes dhe dhe një rregullore të qartë që të mos anashkalojë rolin e pushtetit lokal. Madje, ata kanë paralajmëruar se ky model mund të krijojë precedent për ndërhyrje të tjera pa konsultim. 

Në këtë kontekst, bashkitë nuk po trajetohen si partnerë, por si zgjatime të një administrate me kontroll qeveritar. Andaj, edhe nisma për Operatorin Kombëtar të Ujit  vjen si në të njëjtën linjë, për të shërbyer si instrument politik dhe një modeli të qeverisjes ku vendimarrja është e centralizuar në duart e Ramës. Politiko.al/