Rasti Veliaj/ Nga hetimi në gjykim, ç’pritet tani dhe si ndikon kjo brenda PS

Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka dorëzuar dosjen e kryebashkiakut të Tiranës, Erion Veliajt për gjykim në Gjykatën e Posaçme të Shkallës së Parë.

Në dosjen e SPAK janë renditur 13 akuza që rëndojnë mbi Veliajn dhe 12 të tjera mbi bashkëshorten e tij, Ajola Xoxa. 

Në përfundim të hetimeve paraprake, ka rezultuar se çifti Veliaj dhe Xoxa, në bashkëpunim mes tyre, në 9 raste të veçanta, kanë marrë përfitime të parregullta në formën e shumave monetare dhe pasurive të paluajtshme, nga subjekte tregtarë dhe organizata jofitimprurëse, të cilët nga ana e tyre kanë marrë leje ndërtimi dhe përfituar fonde publike nga Bashkia Tiranë.

Por, çfarë do të thotë ky hap?

Përfundimi i hetimeve nga SPAK ndaj kryebashkiakut të Tiranës dhe bashkëshortes së tij, ka ndezur një debat të nxehtë mbi drejtësinë, transparencën dhe pavarësinë institucionale.

Mes zërave që e shohin SPAK si një institucion që më në fund po guxon të prekë “të paprekshmit”, ka edhe shumë të tjerë që e akuzojnë këtë organ për veprimtari selektive dhe për mungesë transparence.

Rasti Veliaj është ilustrimi më i mirë i kësaj dileme. Hetimi ka qenë i gjatë, i mbyllur dhe i mbushur me pikëpyetje procedurale.

Sekuestrimi i telefonave pa mandat gjyqësor, për shembull, ngre shqetësime serioze për respektimin e të drejtave themelore të individit.

Kanë qenë avokatët e Veliajt, ata të cilët kanë deklaruar publikisht se kontrollet dhe sekuestrimi i telefonave janë kryer pa mandat gjyqësor, duke e cilësuar këtë si shkelje të procedurës ligjore në fuqi

Nëse SPAK përdor metoda që bien ndesh me ligjin, atëherë rrezikon të shndërrohet nga mbrojtës i drejtësisë në instrument të presionit politik.

Çfarë pritet dhe si ndikon në PS

Nëse Gjykata e Posaçme vendos fajësinë e Erion Veliajt, ky do të ishte një precedent i rëndësishëm në historinë e drejtësisë shqiptare.

Kjo do të shkaktonte pasojat politike brenda PS-së. Kjo pasi dënimi i një prej figurave më të afërta me Edi Ramën do të krijonte çarje të brendshme, sidomos mes grupimeve që mbështesin Veliajn si pasardhës të mundshëm.

Po ashtu, në opinionin publik, PS mund të perceptohet si një parti e cila ka toleruar korrupsionin në nivele të larta.

Në pritje të gjykimit, rasti Veliaj mbetet një nga dosjet më të ndjeshme të trajtuara nga Prokuroria e Posaçme.

Vendimi i Gjykatës së Posaçme pritet të ketë ndikim jo vetëm në fatin juridik të kryebashkiakut të Tiranës dhe bashkëshortes së tij, por edhe në dinamikat e brendshme të Partisë Socialiste dhe perceptimin publik ndaj institucioneve të drejtësisë.

Se si do të zhvillohet procesi dhe çfarë pasojash do të sjellë, mbetet për t’u parë në vijim. /S. Gj