Shkarkimi i Spiropalit, 'dëm kolateral' apo ishte i paralajmëruar

Elisa Spiropali, ishte një nga tre 'kurbanët' e kryeministrit Edi Rama një ditë më parë kur reformoi kabinetin qeveritar. 

Pas rreth 5 muajsh si ministre e Jashtme, Spiropali u shkarkua dhe nuk mori asnjë post tjetër brenda kabinetit. Pas bujës së shkarkimit të Belinda Ballukut si zv.kryeministre dhe ministre e Infrastrukturës dhe Transportit, pa zhurmë nuk kaloi as largimi i Spiropalit, që deri diku ishte i paralajmëruar, por ka zëra se "eliminimi" i saj ka qenë edhe i kushtëzuar.

Nëse kthehemi disa javë pas në kohë, kujtojmë se Rama kishte shprehur rezerva për ecurinë e diplomacisë shqiptare nën drejtimin e Spiropalit.  

Në një nga mbledhjet e grupit parlamentar të PS, në 16 Janar, kryeministri i tha se në dikasterin që drejtonte ajo duket sikur punoin vetëm 3 veta: ministrja, sekretarja dhe roja.

“Sa i përket ligjit për diplomacinë publike. Ministria e Jashtme është si Televizioni Publik Shqiptar. Është një tjetër dështim i madh i yni. E kam thënë dhe po e them. Nuk është një institucion në funksion të këtyre sfidave sepse nuk është reformuar asnjëherë. Edhe një ligj që e bëmë nuk ishte ligj apo reformë, ishte tualet.

Makijazh! Ligji duhet të hapë rrugën për reformë, për të futur ajrin e pastër. Shqipëria ka sot njerëz plot jashtë në diasporë. Diaspora është pjesë e elektoratit të rëndësishme. Gradat janë marrë peng nga spikerat e politikës së jashtme të televizionit, as televizion nuk është se ata as nuk dalin. Sa herë shkoj në atë ministri, më duket sikur atje është vetëm ministri, sekretarja dhe roja”, i tha Rama Spiropalit. 

Nga ana tjetër, largimi i Spiropalit shihet edhe si dëm kolateral, pasi gjatë analizës së  ndryshimeve në qeveri, analisti Armand Shkullaku tha se shkarkimi i saj nga posti i ministres së Jashtme, ka qenë porosi e Belinda Ballukut, për shkak të rivalitetin që kanë pasur me njëra-tjetrën.

"Kjo është një qeveri nga halli, këta janë bishtat e Belindës. Kjo tregon që, Mamica u dogj. Lavdet për liderin nuk të bëjnë punë, të bën punë pushteti që ke me grupet kriminale, me paratë që qarkullon dhe me votat që mbledh. Mamica iku dhe në të gjitha duhet ta pranojmë që ka ikur sepse e ka vënë kusht Bela.

Të gjithë e dimë që, ka pasur një rivalitet mes Belindës dhe Elisa Spiropalit, sepse ajo është e bindur që ka folur kundër Belës etj", tha analisti. 

Në të njëjtën linjë u shpreh mbrëmë edhe gazetarja Klodiana Lala.

Ajo tha se Rama i është nënshtruar Balukut dhe se Spiropali është kurban i saj.

“Së pari mendoj se zoti Rama ishte i detyruar ti bënte këto lëvizje, për shkak se e kishte lakun në fyt, rasti Balluku, AKSHI dhe hetimi i disa deputeve. Kështuqë nga këto rrethana, zoti Rama ishte i detyruar për ndryshime në qeveri.

Rama i është nënshtruar Ballukut, Spiropali ishte kurban i saj. Spiropali ndodhej në Kosovë, e ka shkarkaur pa e pritur të kthehet. Kanë patur rivalitet të fortë me njëra tjetrën, për shkak të një pushteti që kanë dashur të mbajën brenda PS", u shpreh Lala. 

NDRYSHIMET

Albana Koçiu bëhet zv.kryeministre - zëvendëson Belinda Ballukun

Enea Karakaçi bëhet ministër i Infrastrukturës dhe Energjetikës - zëvendëson Belinda Ballukun

Besfort Lamallari bëhet ministër i Brendshëm - zëvendëson Albana Koçiun

Toni Gogu bëhet ministër Drejtësie - zëvendëson Besfort Lamallarin

Ferit Hoxha bëhet ministër i Jashtëm - zëvendëson Elisa Spiropalin

Ermal Nufi bëhet ministër i Mbrojtjes - zëvendëson Pirro Vengun

Eriona Ismaili bëhet ministër për Marrëdhëniet me Parlamentin - zëvendëson Toni Gogun.

S.Gj