“Trekëndëshi i Djallit bashkë me Berishën”, pse Basha po e sulmon hapur Ilir Metën

Një deklaratë e kreut të PD, Lulzim Basha në Kuvend ka bërë shumë bujë.

Gjatë fjalës që mbajti teksa replikonte me kryeministrin Edi Rama, Basha sulmoi hapur për herë të parë presidentin Ilir Meta.

Ndërsa i përgjigjej Ramës, e përfshiu këtë të fundit, bashkë me ish kryeministrin Sali Berisha dhe presidentin Ilir Meta në ‘trekëndëshin e Bermudës’, që njihet ndryshe edhe si ‘Trekëndëshi i Djallit’ për vetë misteret që mbart.

"Je bere kaq i lexueshem me cdo fjali te gjithe e kuptojne ku e ke hallin. E ke hallin ti te PD? Ke hall ti se sa demokrate mbledh une? Te ka marre mallli ty? Thuaj me ka marre malli per Sali Berishen dhe Ilir Meten.

Shko dhe ti ne foltore zoteri ose fillo foltoren tende beni trekëndëshin e Bermudes dhe qani hallet bashke te tre nese i keni te njetat. Une jam ketu per te qare hallet e shqiptareve, as te tuat as te Berishes as te Metes”, deklaroi Basha.

Më tej, ai fajësoi Metën dhe Berishën, që Rama vijon të jetë kryeministër, ndërsa tha se “Edhe unë kam faj që je aty, por unë kam pjesën më të vogël të fajit, pjesën tjetër e kanë dy pjesët e trekëndëshit të Bermudës”.

Por, ndërsa Basha ka sulmuar Metën, kryeministri Edi Rama i është kthyer deputetes Monika Kryemadhi, bashkëshortja e presidentit Meta, teksa ka risjellë në vëmendje deklaratat e kryetares së LSI, Monika Kryemadhi, e cila i është drejtuar disa kohë më parë, duke i thënë “do të kafshoj veshin”.

“Duhet të heqësh dorë nga ajo lloj gjuhe, nëse nuk do që ta ndërprsim përfundimisht këtë mënyrë komunikimi.

Por, nuk ke faj, ke qënë aleat me një që kafshonte publikisht deri dje. Sa herë kafshon e si kafshon ti. Çfarë është kjo mënyrë e të folurit, kafshoj, kafshoj”-tha Rama.

Replikat Rama-Basha revoltojnë LSI-në

Debatet mes Ramës dhe Basha ngjallën revoltimin nga nënkryetari i LSI-së Petrit Vasili. Ai i bëri bërë thirrje kryetares së Kuvendit që të ndalojnë diskutimin e t’i japin fund ‘tangos politikes’ mes të dyve, për t’iu rikthyer zbatimit të rregullores.

“Kjo sallë do funksionojë me rregullat që kemi vendosur apo është pronë e çdo lloj tangoje politike, që ka kohë të tjera për t’u bërë. Hapni debatin për çështjet e rendit të ditës, kthejuni rendit të ditës”.

Kryeministri mori fjalën më pas në foltore duke i kthyer një përgjigje Vasilit: “Tani Tango na ka mbetur se Baftjarin nuk e kemi në programin e partisë”, tha Rama.

Pse Basha sulmon hapur Metën

Ndonëse pa përmendur emër, Basha shenjestroi Ilir Metën si një nga personat që duan ta largojnë nga drejtimi i PD, në kulmin e betejës së tij me ish liderin demokrat Sali Berisha, pasi e përjashtoi këtë të fundit nga grupi parlamentar i PD pak ditë më parë. 

Në një dalje për mediat të shtunën që kaloi, Basha përmendi ndër të tjera se veç Ramës dhe Berishës, ‘dikush’ tjetër kërkon ta shohë atë larg karriges së kryetarit.

“Unë nuk  i jam përgjigjur siç kam thënë dhe nuk kam ndërmend t’i përgjigjem gënjeshtrave flagrante që thuhen kundër meje dhe pastaj amplifikohen nga një makineri e tërë që është vënë në lëvizje për këtë punë, ku aksioner të fshehtë është dhe Edi Rama dhe dikush tjetër se ia bëjnë mu, e shohin të gjithë shqiptarët, sepse nuk është stili im në radhë të parë, nuk është rruga ime dhe nuk i shërben as demokratëve as Shqipërisë.

Vendimi im ka qenë vendim i një lidershipi të përgjegjshëm ndaj demokratëve, vendim që nuk mund të shmangej, vendim që duhet ta merrja dhe jo të hiqesha mënjanë dhe të shikoja PD të zhytej në humnerë.

Ky vendim është vendim i marrë. Është vendim i marrë jo për mua, për demokratët , është vendim që i qëndroj 100%”, tha Basha ndër të tjera.

Dyshimet se pas kësaj deklarate shënjestrohej Meta u forcua edhe më shumë sot.

Po të shtunën, Basha duke folur për reformën në drejtësi, theksoi se merita për miratimin e ligjeve kryesore të saj, siç ishte për shembull ngritja e Byrosë Kombëtare të Hetimit dhe Prokurorisë së Posaçme i takon Partisë Demokratike dhe jo presidentit Meta.

“Nëse ka një ligj që kaloi me votat tona nga 7 ligjet, është ligji për SPAK-un dhe BKH-në. Kjo për arsye sepse SHBA-të, ndryshe nga Romana Vlahutin, insistuan që amendamentet tona të përfshiheshin në ligjin e SPAK-ut dhe të BKH-së.

Dhe problemet që shikoni sot në të gjithë aspektet e tjera që mbulojnë 6 ligjet e tjera që kaluan me votat Rama-Meta në atë kohë, janë pikërisht rezultat i injorimit të amendamenteve të Partisë Demokratik”, u  shpreh Basha.

Për Ilir Metën, Lulzim Basha nuk ka folur për herë të parë me këtë lloj gjuhe. Një qëndrim të ngjashëm, madje mjaft të ashpër e ka dhënë edhe në fushatën e shkurtër për zgjedhjet parlamentare të 25 qershorit 2015. “SHPK-në e Ilir Metës do ta çojmë për skrap.

Kujtojmë se Meta ka dalë disa herë publikisht krah Berishës, i cili prej disa javësh ka nisur një tur takimesh me lëvizjen ‘foltorja’ që ka synim për të zhvilluar një referendum ndaj vendimit të Lulzim Bashës për përjashtimin e Berishës nga grupi parlamentar.