Zbardhet vrasja/ Arrestohet një grup vrasësish me pagesë, si bashkëpunuan për ekzekutimin e Behar Sofisë

Zbardhet vrasja e 66-vjeçarit, e ndodhur më 25 shkurt 2021.

Policia bën me dije se janë arrestuar një grup vrasësish me pagesë, të cilët kanë planifikuar dhe në bashkëpunim kanë kryer vrasjen e Sofisë.

Në këtë operacion janë vënë në pranga 4 persona të përfshirë në këtë vrasje kriminale.

“Pas një pune hetimore të pandërprerë, nga Sektori i Krimeve të Rënda Ndaj Jetës dhe Pronës, Sektori i Forcës së Posaçme Operacionale në DVP Tiranë, Departamenti i Policisë Kriminale në Policinë e Shtetit dhe Instituti i Policisë Shkencore, nën drejtimin e Prokurorisë pranë Gjykatës së Shkallës së Parë Tiranë, është finalizuar me sukses OPERACIONI POLICOR “PIRAMIDA”. Si rezultat është bërë e mundur zbardhja dhe dokumentimi ligjor me prova shkencore i ngjarjes së ndodhur në datë 25.02.2021, rreth orës 08:45, në bulevardin “Bajram Curri”, ku është qëlluar me armë zjarri në drejtim të shtetasit Behar Sofia.

Si rezultat i informacioneve të siguruara në rrugë operative, veprimeve të shpejta hetimore procedurale si dhe provave ligjore (shkencore) të siguruara në lidhje me këtë ngjarje, nga ana e specialistëve të Seksionit Hetimit të Krimeve Ndaj Jetës në Drejtorinë Vendore të Policisë Tiranë, është bërë e mundur kapja dhe arrestimi në flagrancë i autorëve të dyshuar të kësaj ngjarjeje, shtetasve:

· Ernejt Shyti, 24 vjeç, lindur dhe banues në Tiranë.

· Skënder Vathi, 54 vjeç, lindur në Arrameras, Fushë Krujë dhe banues në Tiranë.

· Leonar Xhixha, 30 vjeç, lindur dhe banues në Arrameras, Fushë - Krujë, i dënuar më parë për veprën penale “Vrasja me paramendim” ngelur në tentativë.

· Xhuljano Visha, 28 vjeç, i dënuar më parë për veprën penale “Vjedhja”.

Këta shtetas, në bashkëpunim me njëri – tjetrin, kanë organizuar vrasjen e shtetasit Behar Sofia duke siguruar mjetet, armën, si dhe kanë mbajtur nën mbikëqyrje lëvizjet e viktimës për disa kohë, deri në momentin e ekzekutimit të tij.

Shtetasi Ernejt Shyti, i cili ka pasur rolin e ekzekutorit në këtë ngjarje, menjëherë pas kryerjes së ngjarjes është larguar në drejtim të Malit të Zi.

Drejtoria e Përgjithshme e Policisë së Shtetit falënderon publikisht Policinë e Malit të Zi, për ndihmën e mënjehershme të ofruar për lokalizimin dhe kapjen e ekzekutorit Ernejt Shyti. Pas takimit operacional të organizuar në vendin e kalimit Hani i Hotit, të dy policitë kanë shkëmbyer informacion në kohë reale duke u finalizuar me kapjen dhe deportimin e tij.

Në fazën operacionale nga grupi hetimor janë sekuestruar prova të shumta materiale si automjete, aparate telefonike, karta sim etj.

Analiza e këtyre provave hap prespektivë për identifikimin edhe të autorëve të tjerë të përfshirë në këtë krim”, sqaron policia.

Nën drejtimin e Prokurorisë së Rrethit Gjyqësor Tiranë vazhdon me intensitet puna për dokumentimin e plotë ligjor të kësaj ngjarjeje, identifikimin dhe kapjen e personave të tjerë të përfshirë në këtë ngjarje.

Arrestimi i ekzekutorit

Është vënë në pranga ekzekutori i Behar Sofisë, i cili u qëllua me silenciator në qendër të Tiranës në 25 shkurt.

Autori i vrasjes, 23-vjeçari Ernejt Shyti është arrestuar në Malin e Zi dhe u soll dje drejt Tiranës, ku dhe është marrë në pyetje nga policia.

I riu ka pranuar autorësinë dhe se vrasjen e ka kryer me pagesë. 23-vjeçari jetonte në një banesë me qira së bashku me nënën e tij në rrugën ‘Bardhyl’, ndërsa u zbulua nga gjurmët e ADN-së që kishte lënë në rrobat e tij pasi ka kryer vrasjen.

Arrestimi i tij ka çuar në 4 numrin e personave të arrestuar për vrasjen e Sofisë.

Më herët janë arrestuar edhe tre persona të tjerë, identitetet e të cilëve nuk bëhen me dije ende të akuzuar si bashkëpunëtor të 23-vjeçarit.

Si ndodhi ngjarja

I veshur me kapele, syze e maskë anti-covid pasi ka bërë atentatin autori ka kaluar në këmbë urën e Lanës.

Më pas, ka marrë një biçikletë pranë kullave dhe është larguar drejt Kodrave të Liqenit, ku dhe ka ndërruar rrobat. Autori kishte tri ditë që ndiqte viktimën.