"Djalin e urren", zbardhet dëshmia e gruas së Jetnor Zhabolit; prej 1 viti e gjysmë jetojnë me kamera

Prokuroria e Tiranës ka kërkuar “arrest me burg’ për Jetnor Zhabolin, 35-vjeçari i cili mbajti të mbyllur në banesë nënën e tij, bashkëshorten dhe vajzën e mitur.

Zhaboli u arrestua dy ditë më parë, ndërsa në banesë u gjetën të instaluara kamera të cilat 35-vjeçari i përdorte për të monitoruar familjaret. Po ashtu, ai kishte vendosur edhe bllokues valësh në mënyrë që asnjëra prej tyre të mos tentonte të kërkonte ndihmë apo të largohej nga banesa.

Ndërkohë, janë zbardhur dëshmitë e bashkëshortes dhe nënës së tij.

Në prezencë të një psikologu, gruaja e 35-vjeçarit ka deklaruar se jeton si në burg prej një viti e gjysmë. Për më tepër ajo është dhunuar dhe nuk ka kallëzuar për shkak se e do burrin e saj.

“Ka një vit e gjysëm që jeton në banesë me kamera, pa dritë, nuk del vetëm, nuk ka telefon dhe e mban të izoluar në banesë”, thuhet në deklaratën e saj.

Gjatë gjithë kësaj kohe ajo nuk di gjë as për familjen e saj pasi ai ia ka ndërprerë komunikimet. Ai i ka marrë edhe çdo mjet identifikimi. Gruaja tregon se dy ditë para se të arrestohej tek shtëpia e vjehrrit partneri e ka goditur me shkelm në shpatull pasi e akuzon se flet me muret. Gjatë dhunës kanë qenë prezentë edhe fëmijët.

“Nuk merr asnjë medikament pasi nuk ka pranuar asnjëherë që ka probleme shëndetësore. Nuk ka qenë i dënuar. Me vajzën sillet mirë, ndërsa me djalin e moshës 3-vjeçare nuk e afron, e shikon si të racës së saj, e urren, e shikon në një mënyrë me përçmim”, thuhet në dosje.

Për gjendjen e rëndë të djalit ka folur edhe mamaja e të arrestuarit. Ajo është shprehur para policëve se Jetnori me gruan njihen prej 15 vitesh dhe se është shumë e kënaqur nga nusja, por prej 1 viti djali ka pasur probleme shqetësuese emocionale dhe mendore.

“Ka shqetësime sikur dëgjon zhurma në mure të banesës, përgjime. Për këtë shkak kanë bërë kontrolle dhe me specialistë dhe nga kontrolli nuk ka dalë ndonjë gjë”, është shprehur ajo.

Nëna thotë se e ka kontrolluar vetë banesën bashkë me bashkëshortin, por nuk ka zhurma dhe të gjitha janë sajesa të djalit të saj.

“Thotë se dëgjon zhurma nga muret sikur dëgjon zhurma nga muret gjë që nuk është e vërtetë. Fik dritat e lë shtëpinë pa drita dhe rri shtëpia pa drita”, tregon mamaja.

E ëma thotë se për shkak të sëmundjes, ai është bërë shumë xheloz për gruan, pavarësisht se sipas saj, ajo është shembullore.

“Ka kamera sigurie të vendosura nga Jetnori, nuk i ka numëruar, por ka shumë kamera në brendësi ka, dera ka shumë brava. Unë kam frikë se Jetnori i ka marrë çelësat vetë. Vetëm ai i ka çelësat e shtëpisë, dhe mund të ndodhi që mund të bie ndonjë zjarr më ngelin nipërit brenda. Jetnori ka vënë shumë brava në derë se ashtu ja thotë sëmundja që ka dhe çelësat i ka vetëm ai. Nusja ka një vit që nuk ka shoqëri, nuk ka as telefon, jo më të dali, nuk e le Jetnori të dali, e bën çdo lëvizje të kontrolluar”, thotë ajo.