Durrës/ Lejuan kalimin e paligjshëm, pezullohet nga detyra inspektorja e policisë, 2 në pranga

Një punonjëse e policisë së Durrësit me detyrë inspektore është pezulluar nga detyra pasi lejoi kalimin e një shtetasi drejt Italisë duke shmangur kontrollin e rojeve kufitare.

Policia njofton se për dy persona të tjerë A. B dhe L. M është caktuar masa e sigurisë “Arrest me burg” për veprën penale “Ndihma për kalim të paligjshëm të kufijve”.

Sipas informacioneve nga policia, të tre kanë ndihmuar shtetasin shtetasin M. B. t’i shmanget kontrollit të rojeve duke udhëtuar si pasagjer në sediljen e pasme të automjetit më të cilin udhëtonin. Inspektorja nuk ka bërë kontrollin e personave që ishin duke udhëtuar në mjet.

Personi i cili kaloi kufirin pa kontroll është arrestuar në Itali.

Njoftimi i plotë:

Drejtoria Rajonale e AMP Durrës kreu ekzekutimin e vendimit nr. 611, datë 04.10.2022 të Gjykatës Shkallës së Parë Durrës, e cila në funksion të procedimit nr. 1690/2022 ka vendosur masën e sigurisë “Pezullim i ushtrimit të një detyre a shërbimi publik” ndaj;

– Inspektor A. B., me detyrë punonjëse policie në DVKM Durrës, e dyshuar se ka konsumuar elementët e veprës penale “Shpërdorim Detyre”, parashikuar nga neni 248 i Kodit Penal.

Gjithashtu, në kuadër të këtij procedimi, Gjykata e Shkallës së Parë Durrës ka caktuar masën e sigurisë “Arrest në burg” edhe për shtetasit;

– A. B., i dyshuar se ka konsumuar elementët e veprës penale “Ndihma për kalim të paligjshëm të kufijve”, parashikuar nga neni 298/2 i Kodit Penal.

– L. M., i dyshuar se ka konsumuar elementët e veprës penale “Ndihma për kalim të paligjshem të kufijve”, parashikuar nga neni 298/2 i Kodit Penal.

Shtetasit e mësipërm, në bashkëpunim me njëri tjetrin, më datë 07.09.2022 kanë ndihmuar shtetasin M. B. t’i shmangej kontrollit të rojeve kufitare për të kaluar në mënyrë të paligjshme nëpërmjet Pikës së Kalimit Kufitar në Portin e Durrësit, duke udhëtuar si pasagjer në sediljen e pasme të automjetit më të cilin udhëtonin.

Punonjësja e policisë A. B., e cila ishte e planizuar me detyrë në përpunimin e udhëtarëve, nuk ka kryer detyrën e saj funksionale për kontrollin e personave që udhëtonin në automjet, duke bërë të mundur që shtetasi M.  B. të kalojë kufirin. Ky i fundit është kapur më pas nga autoritetet e policisë italiane dhe është kthyer Inad.