Engjëll Agaçi thirret në SPAK

Sekretari i Përgjithshëm i Këshillit të Ministrave Engjëll Agaçi është paraqitur ditën e sotme në ambientet e Prokurorisë së Posaçme (SPAK).

Sipas News 24, Agaçi nuk ka pranuar të bëjë asnjë koment. “Nuk kam koment”, ka thënë ai kur ka dalè nga SPAK. 

Ende nuk dihet arsyeja pse është paraqitur në SPAK dhe për çfarë ka dëshmuar. 

Kujtojmë se Sekretari i përgjithshëm i Kryeministrisë, është paraqitur në fillim të këtij viti për të dëshmuar para Komisionit Hetimor për Inceneratorët, pasi emri i tij është lakuar nga opozita si i përfshirë në aferë. 

Ai hodhi poshtë pretendimet e opozitës se Këshilli i Ministrave ka miratuar 17 vendime brenda ditës për inceneratorin e Elbasanit. Në Komisionin Hetimor për Inceneratorët, ku foli për herë të parë pas 9 vitesh në atë pozicion, Agaçi u shpreh se Këshilli i Ministrave nuk ka miratuar asnjë procedurë dhe as ka kaluar në mënyrë të përshpejtuar 17 vendime.

Ai shtoi asokohe se procedurat e ndjekura për financimin e inceneratorit të Elbasanit janë sipas parashikimeve ligjore dhe se fondet për këtë projekt ishin parashikuar që në vitin 2015.

I pyetur nëse ka patur presion nga Kryeministri Edi Rama për miratimin e përshpejtuar të procedurave, e mohoi një gjë të tillë, ku tha se vendimi është marrë në një mbledhje të zakonshme të Këshillit të Ministrave.

Po ashtu, në mars, Partia Demokratike ka paditur Agaçin në Prokurorinë e Posaçme Kundër Korrupsionit dhe Krimit të Organizuar (SPAK) me motivacionin se ka kryer shkelje ligjore në mënyrë të vetëdijshme në koncesionin e Elbasanit.

Sipas PD, në datën 16 dhjetor 2014 u përshpejtuan 17 procedura brenda ditës që janë si më poshtë:

1. Më 16 Dhjetor 2014 mbahet gara për inceneratorin e Elbasanit ku kompania e vetme Albtek Energy shpallet fituese.
2. Koha e ankimimit që është 7 ditë u rrudh brenda datës 16 dhjetor.
3. Përcatkohet abuzivisht se nuk ka asnjë ankesë në 16 dhjetor ndërkohë që data duhet të ishte 7 ditë pune sipas ligjit.
4. Hartohet një draft kontratë për kompaninë fituese po në 16 dhjetor.
5. Dërgohet draft kontrata për mendim në ministrinë e Financave në 16 dhjetor. (Cani)
6. Dërgohet draft kontrata për mendim në ministrinë e zhvillimit ekonoomik, tregtisë dhe sipërmarrjes në 16 dhjetor (Ahmetaj)
7. Dërgohet draft kontrata për mendim në Ministrinë e Infrastrukturës dhe Energjisë në 16 dhjetor. (Gjiknuri)
8. Dërgon draft kontratën për mendim Ministrisë së Drejtësisë draft kontratën në 16 dhjetor. (Nasip Naço)
9. Dërgohet drafti për mendim tek APP në datën 16 dhjetor, kjo ia nis edhe Sekretarit të Përgjithshëm të KM në po të njëjtën datë. (Eduart Ahmeti)
10. Vjen përgjigja e draft kontratës të çuar për mendim nga Ministria e Financës brenda 16 dhjetorit.
11. Vjen përgjigja nga ministria e Zhvillimit Ekonomik, Tregtisë dhe Sipërmarrjes në 16 dhjetor.
12. Vjen përgjigja nga Ministria e Infrastrukturës dhe Energjitikës brenda datës 16 dhjetor.
13. APP merr aprovim pohues nga sekretari i përgjithshëm i KM, Agaçi, po me 16 dhjetor. Vjen përgjigja nga APP në lidhje me draft kontratën e dërguar po në datën 16 dhjetor.
14. Vjen përgjigja pozitive për draft kontratën edhe nga Ministria e Drejtësisë po në 16 dhjetor.
15. Hartohet si kontratë përfundimtare dhe negociohet mes palëve po në datën 16 dhjetor një kontratë me 40 faqe.
16. Firmoset kontrata mes ministrisë së Mjedisit dhe kompanisë fituese brenda datës 16 dhjetor.

17. Miratohet financimi i kontratës së lidhur me firmën në fjalë, pra Klodian Zotos, në mbledhjen e qeverisë në 17 dhjetor 2014, pra te nesërmen!