‘Hijet’ e dyshimta për Portin e Durrësit: Si u përfshi kompania “Eagle Hills” në skandalin e Zagrebit dhe Indisë

Marrëveshja e Portit të Durrësit ka ngjallur debate mes forcave politike në Shqipëri. Kompania ‘Eagle Hills’ e cila pritet të ndërtojë portin e jahteve me apartamente luksoze, në pronësi të sheikut Muhamed Alabar, është parë si e dyshimtë dhe me lidhje të forta me biznesmenët serbë.

Mediat kroate kanë shkruar një artikull mbi kompaninë e Alabar, duke marrë si shembull rastin e Zagrebit kryeqytetit kroat. Sipas mediave kroate, e njëjta kompani që do të zbatojë projektin në Portin e Durrësit, ka dashur të ndërtojë Manhatanin e Zagrebit.

Kryebashkiaku i Zagrebit asokohe, Milan Bandiç, donte t'u jepte arabëve gjithçka që ata kërkuan, duke përfshirë pronësinë e tokës më të shtrenjtë dhe më të madhe.

Në memorandumin e publikuar nga Zagrebi, thuhej se “Qyteti i Zagrebit me shpenzimet e veta do të sigurojë një titull pronësie me të drejtë regjistrimi në emër të kompanisë së synuar, të përcaktojë parakushtet hapësinore dhe planifikuese, siguron parakushtet për dalje nga aktet e nevojshme që mundësojnë zhvillimin e projektit, madje edhe që ‘Eagle Hills’, në përputhje me rregullore të veçanta, nëse është e nevojshme, mund të inicojë ndryshime në plan”.

Ndërhyrja e opozitës kroate prishi planet e Alabar, duke kthyer mbrapsht planin për ndërtimin e 'Manhatanit të Zagrebit'.

Por kush është Muhamed Alabar?

Kompania kryesore e Alabar quhet Emaar Properties dhe në fakt nuk i përket Alabar, por aksioneri i shumicës është Emiri i Dubait. Ajo u themelua në vitin 1997 dhe afera e parë e madhe lidhej me biznesin e tyre në qytetin indian të Mohali, në provincën Punjab.

Edhe atje sheikët padyshim kishin kontrata shumë të dyshimta me autoritetet lokale për ndërtimin e një projekti me 1670 vila. Por shpejt doli se sheikët - për të mbledhur para për investimin e tyre - po shisnin pronat indiane , të cilat nuk u përkasin fare.

Njerëzit paguanin për vilat, por nuk mund të hynin në pronën e tyre sepse të drejtat e pronësisë mbi tokën pretendoheshin nga palë të treta, megjithëse pushteti vendor pretendonte se gjithçka ishte rregulluar.

Në Indi, e njëjta kompani ishte në qendër të një skandali në vitin 2010, kur rezultoi se fshati sportiv, i cili supozohej të ndërtohej për Lojërat e Komonuelthit, nuk ishte përfunduar fare. Më në fund, në vitin 2011, u ngrit një aktakuzë kundër Emaar MGF dhe dy kompanive të tjera simotra të lidhura me Alabar para një gjykate në Indi për krim të organizuar, konspiracion, mashtrim.

Një nga marrëveshjet e para të prishura ishte për bashkëpunimin ekskluziv të dy kompanive, APIIC shtetërore dhe Emaar Properties nga Dubai. Memorandumet e mëvonshme ranë dakord që Emaar Properties t'ua dorëzonte punimet tre korporatave të tjera, por gjithashtu që ato do t'ia dorëzonin shitjen Stylish Homes.