I mori 8 mijë euro klientit për të ndikuar tek drejtësia, GJKKO dënon avokatin Besart Logu

Dënohet me 2 vjet burgim avokati Besart Logu, pasi Prokuroria e Posaçme kundër Korrupsionit dhe Krimit të Organizuar njoftoi se Gjykata e Posaçme e Shkallës së Parë për Korrupsionin dhe Krimin e Organizuar ka shpallur fajtor për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”.

Gjykimi u zhvillua me rregullat e gjykimit të shkurtuar, dhe trupi gjykues, i përbërë nga gjyqtarët Atalanta Zeqiraj, Flojera Davidhi dhe Erjon Bani, vendosi të dënojë Logun me 2 vjet burgim, që më pas u ul me 1/3 sipas nenit 406 të Kodit Penal, duke e çuar dënimin në 1 vit e 4 muaj.

Gjykata urdhëroi pezullimin e ekzekutimit të burgimit dhe vendosi që ai të jetë në provë për një periudhë 2 vjet e 8 muaj, me kusht që të mos kryejë vepër tjetër penale dhe të mbajë kontakte me shërbimin e provës.

Për më tepër, Logut i është hequr e drejta për të ushtruar profesionin e avokatit për një periudhë 9 muajsh, ndërsa të gjitha shpenzimet procedurale gjatë hetimit dhe gjykimit i ngarkohen atij.

Në përfundim të gjykimit, Gjykata ka vendosur:

Deklarimin fajtor të Besart Logut për veprën penale të “Ushtrimit të ndikimit të paligjshëm ndaj personave që ushtrojnë funksione publike” dhe dënimin e tij me 2 vjet burgim.

Uljen e dënimit me 1/3, duke e dënuar me 1 vit e 4 muaj burgim, sipas nenit 406 të Kodit të Procedurës Penale.

Pezullimin e ekzekutimit të dënimit me burgim, duke e vënë të pandehurin në provë për një periudhë prej 2 vjet e 8 muaj, me kusht që të mos kryejë vepra të tjera penale dhe të mbajë kontakte me shërbimin e provës, në përputhje me nenin 59 të Kodit Penal.

Heqjen e së drejtës për të ushtruar profesionin e avokatit për një periudhë prej 9 muajsh, sipas nenit 39 të Kodit Penal.

Ngarkimin e të pandehurit me shpenzimet procedurale të kryera gjatë fazës së hetimit dhe gjykimit.

Provat materiale që përdorën në gjykim përfshijnë DVD dhe CD të përgjimeve ambientale audio dhe video të datave 09.12.2024 dhe 13.12.2024, të cilat janë bërë pjesë e fashikullit të gjykimit.

Ky vendim mund të apelohet në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga dita e marrjes dijeni të vendimit të arsyetuar.