Ironia e analistit me tallavanë e Ramës: Kur kërcen o ho ho, kur paguan o bo bo!

Kënga e fushatës zgjedhore të socialistëve është kthyer në ‘hitin’ e preferuar të Ramës, i cili sa herë që vendoset në sfond tingulli i tallavasë, e lë trupin të lirë të dëfrehet.

Analisti dhe gazetari Lutfi Dervishi ka ironizuar së fundmi rastin e një qytetareje që kërceu me kryeministrin Rama. Në nëj postim në Facebook, Dervishi teksa e konsideron një fushatë koreografike, shkruan se kryeministrit me deputetët dhe kandidatët e tij për kryebashkiakë, i kanë harruar hallet e shqiptarëve me tingujt e tallavasë.

Dervishi shprehet se fushatat janë një rast për të qarë hallet e qytetarëve ose për të gjetur zgjidhjen e tyre, dhe jo për të kërcyer.

Duke marrë si shembull qytetaren e cila kërceu me Ramën, shkruan se kur kërcen ndjen kënaqësi, po kur vjen puna te faturat ‘zë kokën me duar’.

Postimi i plotë:

Fushatë koreografike

Kërcen kryeministri. Kërcen shefi i grupit parlamentar të shumicës. Kërcejnë kandidatët për kryetar bashkie. ç’është ky gaz e kjo hare? Çfarë ka ndodhur që kërcet lodra nga e hëna në të hënë?

Mos vallë u zbulua burimi i shumëpritur i naftës në Shpirag dhe lamtumirë halle?

Mos është  gjetur thesari me flori i Ali Pashë Tepelenës?

Mos vallë  10 mijë indianë/sri lankas kanë shprehur dëshirën të  punojnë gjatë sezonit turistik në Shqipëri dhe zgjidhëm hallin e largimit të fuqisë punëtore?

Mos kemi gjetur dhe kapur gjithë zullumqarët e incineratorëve?

Mos arritëm të kuptojmë se pse zhvlerësohet euro dhe dollari përballë lekut?

Mos është marrë vendimi që të përshpejtohet anëtarësimi i Shqipërisë në BE?

Mos ka mbaruar lufta në Ukrainë? Se sikundër është turp që të protestosh kur bëhet luftë, turp duhet të jetë edhe t’ia marrësh valles kur pritet që lufta të futet në fazën finale ?

Pse nuk ka ditë që të mos kemi valle?

Njerëzit,  që në kohërat e lashta, kanë kërcyer për të shprehur gëzimin dhe lumturinë. Kanë kërcyer në dasma, kanë kërcyer për t’u dëfryer, kanë kërcyer për të harruar hallet.

Pyetja është pse po kërcejmë në fushatë?  Fushatat janë rasti për të qarë hallet dhe për t’u dhënë zgjidhje.

Mesa duket ose nuk ka asnjë hall për të zgjidhur në këtë vend, ose kemi gjetur zgjidhjen e halleve- vallen.

është rasti për të kujtuar thënien: kur këcen o ho ho, kur paguan o bo bo.

Aheng ok. Por aheng falas ta harrojmë