Ish-koordinatorja e PD: Incidenti ndaj Berishës eklipsoi samitin, protesta, grusht në fytyrën e shtetit

Ish-koordinatorja e Partisë Demokratike, Reila Bozdo, ka reaguar pas incidentit që ndodhi dje në protestën e thirrur nga demokratët, ku Gerti Shehu goditi krydemokratin Sali Berisha.

Në një postim në Facebook, Bozdo shkruan se qeveria tentoi të japë një kundërpërgjigje për protestën e cila ishte një akt shumë i fortë, një ‘grusht në fytyrën’ e shtetit.

Bozdo shprehet se akti i paprecedentë ndaj kryedemokratit ishte pikërisht kundërpërgjigje e pushtetit për protestën simbolike të PD-së. Bozdo shkruan se grushti ndaj doktorit eklipsoi samitin, për të cilin edhe sot mediat e Ramës nuk flasin për rezultate konkrete.

Postimi i plotë:

Nuk e kam takuar personalisht doktorin siç ka bërë shumica partiake që i shkonte në zyrë rregullisht edhe kur ai ishte “i tërhequr”. E kam takuar doktorin vetëm në aktivitete publike, por për shumë vite e kam studiuar sjelljen e tij politike dhe po ashtu karakterin aq sa mund të kuptohet në distancë.

Sot ndjeshmëria për grushtin ndaj tij ishte e madhe. Më ngarkoi emocionalisht aq sa për një të afërm të së njëjtës moshë.

Akt i hidhur. I ndyrë.

Mu kujtuan sot edhe kohët kur shpesh është folur për sulme të mundshme ndaj Lulzim Bashës si kryetar i opozitës.

Sot ndodhi vërtet.

Kush e bëri dhe pse, ndoshta nuk do ta zbulojmë kurrë, por simbolika duhet lexuar.

Pse një grusht sot?

Protesta sot ishte një akt shumë i fortë, i cili mori si kundërpërgjigje një akt dhune të pa ndodhur më parë.

Çdo veprim ka një kundërveprim.

Pse shkoi në këtë pikë?

Le të arsyetojmë pak:

Çfarë ishte protesta sot, simbolikisht? Protesta sot ishte një “grusht në fytyrën” e pushtetit. Një datë e zgjedhur enkas për mesazh.

Çfarë simbolizon goditja ndaj Doktorit sot? Kundërveprim ndaj simbolikës së protestës me mesazhin “më godet në fytyrë, të godas në fytyrë”.

“Sy për sy dhe dhëmb për dhëmb”, “më godite, të godas”, a është ky shpjegimi për atë që ndodhi sot? Ndoshta…

Nga ana tjetër grushti ndaj doktorit eklipsoi samitin. Si është e mundur që pushteti i cili zotëron mediat sa herë do, sot nuk po mundet të na tregojë arritjet e samitit?

Një puzzle që ende nuk po formohet…

Si e mendoni ju?