Këshilli bashkiak i Korçës rezolutë Ramës dhe Manjës, kërkon rishikimin e hartës së re gjyqësore

Këshilli bashkiak i Korçës ka miratuar një rezolutë drejtuar kryeministrin Edi Rama dhe ministrit të Drejtësisë, Ulsi Manja, lidhur me draft hartën e re gjyqësore, që konsiston në reduktimin e numrit të gjykatave.

Në rezolutën e miratuar thuhet se harta e re gjyqësore, e cila sjell mbylljen e disa gjykatave, rrit kostot e qytetarëve dhe institucioneve që iu shërbejnë, “ul efektshmërinë dhe efikasitetin e administratës e cila do të detyrohet të udhëtojë jashtë qytetit, për cdo gjykim që do zhvillohet në Gjykatë Apeli, apo çdo gjykim administrativ në shkallë të pare.”

Rezoluta sjell në vëmendje dy raste. E para, kur sistemi gjyqësor ka qenë i organizuar me “një gjykatë të vetme Apeli me seli në Tiranë, në një kohë me një numër gjyqtarësh shumë më të madh nga çka rezulton sot dhe me një numër më të vogël cështjesh në gjykim, dhe një organizim i tillë rezultoi i dështuar dhe solli rritjen e numrit te gjykatave të apelit nëpër rrethet gjyqësore ku u vendosen.”

Rasti i dytë është ai aktual, ku është vetëm një “gjykatë Apeli Administrativ me seli në Tiranë, e cila u krijua për të përshpejtuar dhënien e drejtësisë në gjykimin e çështjeve administrative, por në fakt rezultoi jo efektive dhe nuk përmbushi qëllimin për të cilin u krijua duke e çuar përfundimin e gjykimit në Apelin administrativ nga 4-5 vjet. Një gjë e tillë është konstatuar edhe nga ana e institucionit tonë për çështjet që kemi në gjykim pranë kësaj gjykate.”

Këshilli bashkiak shton në rezolutë se bashkia e Korçës, ka në Gjykatën Administrative të Apelit “çështje që pret të shqyrtohen që prej vitit 2016, pra më shumë se 5 vjet.”

“Draft harta e re gjyqësore shumfishon kostot e shpenzimeve gjyqësore për:

a. Qytetarët te cilët përveç pagesës së përfaqësimit në gjykim duhet të paguajnë edhe kostot e transportit dhe akomodimit të përfaqësuesit apo avokatit të tyre.

b. Institucionet, të cilat duhet të paguajnë kosto transporti dhe akomodimi për përfaqësuesit e autorizuar të tyre.

Ndikimi më i madh është tek efiçenca në punë. Aktualisht një jurist përfundon përfaqësimin e institucionit në një gjykim për rreth 1 orë, ndërkohë që nëse do t’i duhet të përfaqësojë institucionin pranë gjykatave në Tiranë i nevojitet më tepër së një ditë pune.

Këshilli i Bashkisë Korçë drejtohet me kërkesat si më poshtë:

1. Të rishikohet draft harta e re gjyqësore duke lënë në funksion Gjykatën Administrative të Shkallës së Parë Korçë dhe Gjykatën e Apelit Korçë.

2. Harta e re gjyqësore të marrë në konsideratë interesin më të lartë të qytetarëve duke ju referuar të kaluarës, gjendjes aktuale dhe perspektivës të rajonit juglindor”, thuhet në rezolutën e Këshillit Bashkiak.