Vendimet që mori Kuvendi/ Zgjidhet drejtuesja e ILDKPI-së, kush është Evgjeni Bashari

Kuvendi ka zgjedhur me 100 vota pro Evgjeni Basharin si kryetaren e re të Inspektoriatit të Lartë të deklarimit të pasurive dhe konfliktit të interesave.

Ajo do të jetë në krye të institucionit që do të skanojë dhe hetojnë pasuritë e politikanëve dhe zyrtarëve të lartë për 7 vitet e ardhshme.

Evgjeni Bashari garonte për postin e kryetares së ILDKPKI-së përballë Helena Papës. Kandidatja Elena Papa mori vetëm 5 vota pro.

Kush është Evgjeni Bashari?

Evgjeni Bashari ka mbajtur më parë detyrën e Sekretares së Përgjithshme të ILDKP-së, ndërsa do të zëvendësojë në këtë detyrë Shkëlqim Ganajn.

Bashari ka punuar për një kohë të gjatë në shumë organizata ndërkombëtare. Ajo ka qenë eksperte pranë misionit EURALIUS, i cili asiston sistemin e drejtësisë në Shqipëri.

Inspektori i Përgjithshëm drejton Inspektoratin e Lartë të Deklarimit dhe Kontrollit të Pasurive dhe Konfliktit të Interesave për të kontrolluar deklarimin dhe legjitimitetin e burimeve të pasurive të deklaruara dhe konfliktit të interesave nga subjektet e parashikuara nga ky ligj në të gjithë territorin e Republikës së Shqipërisë.

Ai njofton, rast pas rasti, Presidentin, Kuvendin, Këshillin e Ministrave, Kryeministrin, ministrat, Këshillin e Lartë Gjyqësor, Këshillin e Lartë të Prokurorisë, Inspektorin e Lartë të Drejtësisë, Prokurorin e Përgjithshëm, Drejtuesin e Prokurorisë së Posaçme, Drejtuesin e Byrosë Kombëtare të Hetimit dhe drejtuesit e institucioneve qendrore për parregullsitë e vërtetuara në deklarimin e pasurisë nga punonjësit në juridiksionin e tyre.

Gjatë seancës së fundit për këtë vit, KuvendI zgjodhi me 92 vota pro Violeta Nikleka si anëtare e Këshillit Mbikëqyrës të Bankës së Shqipërisë.

Deputetët kanë votuar me shumicë votash pro dhe projektligjin “Për pensionet shtetërore suplementare të personave që kryejnë funksione kushtetuese dhe të punonjësve të shtetit.” 

Me 94 vota pro, 5 kundër dhe 5 abstenim, është votuar sot në Kuvend projektligji “Për miratimin e strukturës organizative, organikës dhe klasifikimit të pagave të personelit të Kolegjit të Posaçëm të Apelimit.”

Po ashtu, me shumicë votash me 94 vota pro, 6 kundër dhe 6 abstenim, është votuar dhe projektvendimi “Për miratimin e strukturës organizative, organikës dhe klasifikimit të pagave të personelit të Inspektorit të Lartë të Drejtësisë.”

Gjithashtu, me 95 vota pro, 5 kundër dhe 6 abstenim, Kuvendi ka votuar projektvendimin “Për zgjedhjen e Inspektorit të Përgjithshëm të Bankës së Shqipërisë.” Me shumicë votash në këtë post është zgjedhur Merita Bejtja.