“Mashtrim me pasoja të rënda”, arrestohet çifti i shpallur në kërkim, në pranga edhe dy të tjerë

Policia e Tiranës ka arrestuar 4 persona të shpallur në kërkim për vepra të ndryshme penale.

Në njoftimin e policisë thuhet se janë arrestuar dy bashkëshortët Zamir Kalej, 53 vjeç dhe Bukurije Kalej, 48 vjeçe banues në Shkodër të dënuar me 5 vite burg për për veprën penale “Mashtrim me pasoja të rënda” kryer në bashkëpunim.

Gjithashtu në pranga ka rënë edhe shtetasi Albano Beqiraj, 29 vjeç i dënuar me 4 vite burg, për veprën penale “Sigurimi i kushteve dhe mjeteve materiale për të kryer vrasje”.

Ndër të tjera është arrestuar edhe shtetësja me inicialet R.S., pasi ka qenë me masë sigurie “Arrest në shtëpi”, për veprën penale “Vjedhja”, por gjatë kontrolleve nga shërbimet e Policisë, nuk është gjetur në banesë.

Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore.

Njoftimi i plotë:

Vijon puna për kapjen e personave të shpallur në kërkim kombëtar.

Kapen dhe ndalohen 4 shtetas të shpallur në kërkim për vepra të ndryshme penale.

Në vijim të punës për kapjen e personave të shpallur në kërkim, nga strukturat e DVP Tiranë u bë kapja dhe ndalimi i shtetasve Zamir Kalej, 53 vjeç dhe Bukurije Kalej, 48 vjeçe (bashkëshortë), banues në Shkodër. Këta dy shtetas ishin shpallur në kërkim nga Drejtoria Vendore e Policisë Shkodër, pasi Gjykata e Rrethit Gjyqësor Shkodër e ka dënuar secilin prej tyre me 5 vjet dënim, për veprën penale “Mashtrimi me pasoja të rënda” kryer në bashkëpunim.

Ndërkohë, specialistët për Hetimin e Krimit në Komisariatin e Policisë Nr. 4 bënë kapjen dhe ndalimin e shtetasit Albano Beqiraj, 29 vjeç, i cili, me vendimet penale të Gjykatës Shkallës Parë për Krimet e Rënda Tiranë dhe Gjykatës Apelit për Krimet e Rënda Tiranë, është dënuar me 4 vite burgim, për veprën penale “Sigurimi i kushteve dhe mjeteve materiale për të kryer vrasje”.

Po nga specialistët për Hetimin e Krimit në Komisariatin e Policisë Nr. 4 u bë kapja dhe ndalimi, për veprën penale “Largim i të burgosurit nga vendi i qëndrimit”, i shtetases R. S., 20 vjeçe, pasi ka qenë me masë sigurie “Arrest në shtëpi”, për veprën penale “Vjedhja”, por gjatë kontrolleve nga shërbimet e Policisë, kjo shtetase nuk është gjetur në banesë.

Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore.