“Me (pa) dashuri dhe qetësi”, si ishte 2020-ta e Ramës dhe Metës

Mes kreut të shtetit Ilir Meta dhe kryeministrit Edi Rama thuajse çdo ditë ka patur replika në distancë, me shtim akuzash të ndërsjella, deri në kërcënime.

Përplasja e mes tyre nisi pak pasi mori postin e Presidentit, me votat e PS dhe të LSI-së. Ato filluan për Sandër Lleshaj për ministër të Brendshëm.

Rama do propozonte Lleshajn për ministër në tetor të 2018-ës, ndërsa Meta e dekretoi në limitet e afatit që i jepte Kushtetuta pasi ai hoqi dorë nga gradat ushtarake që mbante.

Pas pak muajsh do të mbaheshin zgjedhjet lokale për drejtësinë e pushtetit vendor. Meta do të dekreton 30 qershorin dhe pasi opozita nuk pranoi të hynte në zgjedhjet, e çdekroi 30 qershorin por pa rezultat, PS mori të gjitha bashkitë.

Zgjedhjet u mbajtën, ndërsa mazhoranca si përgjigje për çdekretimin nisi një proces shkarkimi të Presidentit .

Shkarkimi që mund të ishte i pari i një Presidenti nuk ndodhi, ndërsa PS shënoi një betejë të humbur përball Presidentit, që vijon të qëndrojë në post pasi Komisioni i Venecias rrëzoi akuzat e Edi Ramës për shkelje.

Emërimet në Kushtetuese, që vijon të jetë e zbrazur që në fillimit të 2018, do të shënonte acarimin e radhës. Meta deklaronte në atë kohë, që PS-ja përmes Arta Vorpsit tentoi ti rrëmbente një anëtar në këtë gjykatë.

Çështja kaloi sërish në Komisionin e Venecias, që për herë të dytë i dha të drejtë Ilir Metës. Sot në vend të Arta Vorpsit që kërkonte mazhoranca, në Kushtetuese është Marsida Xhaferllarit. Ndërsa ky konflikt do të shënonte një ngjarje jo të zakonte në politikën shqiptare, atë të mbajtjes së referendumit në 2 mars nga Presidenti.

Në protestën e 2 marsit, Meta drejtoi akuza të rënda ndaj qeverisë si "grusht shteti përmes sistemit të drejtësisë,” "shkelje e Kushtetutës”, "lidhje me krimin e organizuar ndërkombëtar”.

Kryeministri e cilësoi protestën e thirrur nga Meta”një manifestim të madh të mos-arsyes njerëzore që nuk parashikohet nga Kushtetuta dhe ligji”.

Në kulmin e retorikës së ashpër që karakterizon marrëdhëniet Meta-Rama, Partia Socialiste kërkon të kufizojë veprimet e Presidentit, përmes një ligji. Drafti në fjalë i heq Ilir Metës disa kompetenca, që kanë të bëjnë me ekskluzivitetin e tij për emërime në qeveri por dhe gjyqësor.

Edi Rama ka akuzuar shpesh Presidentin se është futur në fushatë, në ndihmë të opozitës. Ndërsa vetë Presidenti nuk e fshehte se nuk e do më Ramën kryeministër, edhe pse në të shkuarën e ka mbështetur me pushtet.

Përplasja e tjetër e ashpër mes Metës e Ramës është Kodi Zgjedhor. Fakt është që Presidenti akuzoi më shumë qeverinë ndërsa këtë ashpërsim të retorikës së Ilir Metës, Rama e quan fushatë për vota për LSI-në, madje për këtë e ka akuzuar se edhe takon element kriminalë, gjatë muajit tetor.

Kodi Zgjedhor është kulmi i momentit i marrëdhënieve të acaruara Rama-Meta. Vetë kryeministri në vend të Bashës e ka ktheu Metën në kryefjalën e tij, në takime elektorale nëpër Shqipëri.

“Fakti që Meta është kthyer në një lolo nuk do të thotë që ka qenë një lolo në të shkuarën”, ka thënë Rama.

Gjatë këtij viti, u përfolën edhe për një “pranverë” të re mes tyre. Mazhoranca në Komisionin Parlamentar të Ekonomisë pranoi pas tri refuzimesh propozimin e presidentit, për kreun e ri të Kontrollit të Lartë të Shtetit, Arben Shehu.

Më herët, shumica i kishte ‘rrëzuar’ kandidaturat e Metës si Vitore Tushën, Bahri Shaqirin dhe Petraq Milon për drejtuesin e KLSH, që deri tani është mbajtur nga Bujar Leskaj. Kjo dakordësi u lexua si një afrim i radhës mes dy krerëve të lartë.

Dvorani

Pak ditë më pas, Këshilli i Lartë Gjyqësor vendosi me shumicë votash shkarkimin e Ardian Dvoranit, si anëtar i Gjykatës së Lartë.

Me këtë vendim, Dvorani humbi detyrën si drejtues i këshillit të Emërimeve në Drejtësi, vendim që vinte pas një beteje të gjatë mes tij dhe Presidentit, Ilir Meta. Madje, ky i fundit e ka akuzuar atë për vendime të njëanshme në favor të qeverisë gjatë proceseve për reformimin e sistemit të drejtësisë.

"Takim bërrylash"

Në fillim të qershorit, ata u ulën në një tryezë, në mbledhjen e Këshillit Kombëtar të Integrimit.

Para takimit, ata u fotografuan të buzëqeshur, pa shtrëngim duarsh, por me takime bërrylash për shkak të pandemisë. Megjithatë, pak më vonë, kryeministri Rama e shpërndau në profilin e tij në instagram duke e komentuar si “Luftë bërrylash”, foton dhe raportet me presidentin.

Ndryshimet e Kodit Penal

Një tjetër moment paqeje mjaft e komentuar si ‘pranvera’ e re Rama-Meta ishte dekretimi i ndryshimeve në Kodin Penal, nismë e qeverisë për shkak të pandemisë Covid-19. Duke komentuar veprimin e tij, presidenti deklaroi në atë kohë se ndryshimi ishte i nevojshëm, dhe nëse nuk do të jepte ‘ok’, qeveria sërish do miratonte ndryshimet.

Këto ndryshime parashikonin dënime me burg për të gjithë ata që kryejnë me dashje veprime duke përhapur koronavirusin.

Nuk kaluan shumë kohë, kur marrëdhënia e tyre acarohet sërish. Përplasjet për pandeminë dhe akuzat për keqmanaxhim vazhdojnë të jenë kryefjalë e shigjetimit nga ana e presidentit ndaj qeverisë.

Po ashtu, një pikë tjetër debati mes presidencës dhe qeverisë ka qenë kthimi me dekret nga a e Presidentit Meta për rishqyrtim në Kuvendin ligje të shumta sipas tij për shkak të shkeljeve të konstatuara. Bëhet fjalë pëor ligje si “Korporatën e Investimeve Shqiptare”, ligjin për Gjendjen Civile. “Për metrologjinë”, ‘Për Policinë e Shtetit’, të ndryshuar”, për ndarjen e vendit në 4 rajone etj.

Shumica socialiste po përgatit një ligj për Presidentin ku pritet që t’i kufizojë edhe të drejtën e dhënies së dekoratave, ndërsa kryeministri u shpreh se Meta ka thyer cdo protokoll për dhënien e tyre. Situatën e dhënies së dekoratave nga Ilir Meta, Edi Rama e cilësoi farsë, komedi dhe turp. Madje, nuk ka munguar edhe një krahasim me Enver Hoxhën dhe ironitë se po imagjinon si të bëhet hero.

Kështu, marrëdhënia mes Edi Ramës dhe Ilir Metës prej kohës kur të dy ishin në të njëjtën parti ka qenë “dashuri dhe urrejtje”, por me zgjedhjet elektorale në prag përplasja e fortë mes Kryeministrit dhe Presidentit ka kaluar në një nivel të ri dhe pritet të vijojnë me akuza te ndërsjella.