Mesazhet e politikanëve shqiptarë për festën e Fiter Bajramit

Politikanët shqiptarë kanë përcjellë mesazhet e urimit për besimtarët myslimanë në festën e Fier Bajramit. Presidenti Ilir Meta zhvilloi një takim me kreun e Komunitetit Mysliman të vendit, Bujar Spahiun. Në një prononcim të shkurtër për gazetarët, Meta bëri thirrje për më shumë solidaritet dhe harmoni.

“Kënaqësi të vizitoja kreun e Komunitetin Mysliman të vendit e t’i uroja jo vetëm atij por të gjithë besimtarëve tanë që Zoti tua shpërblejë gjithë ato sakrifica që kanë bërë gjatë kësaj periudhe dhe t’i uroj paqe, shëndetm mbarësi në familjet e tyre dhe në mbarë shoqërinë tonë.

Kjo është një festë e mrekullueshme që na fton sot të forcojmë më tej ndjenjën e solidaritetit e harmonisë me njeri tjetrin e të jemi më pranë të gjithë vëllezërve tanë e gjithë familjeve që janë në kushte më të vështira”, tha Kreu i Shtetit.

Ndërsa kryeministri Edi Rama ka zgjedhur ta urojë këtë festë me pamjet e xhamisë së re në Mullet.

Përmes një postimi në rrjetet sociale, edhe ish-kryeministri Sali Berisha ka uruar besimtarët, ku uron që të pranohet edhe sakrifica e tyre gjatë muajit të agjërimit.

Edhe kryetarja e LSI-së, Monika Kryemadhi, u takua me kreun e KMSH-së, Bujar Spahiu. Në një deklaratë për gazetarët, ajo tha se kjo është një ditë shumë e rëndësishme për të gjithë popullin dhe jo vetëm besimtarët myslimanë.

"Kjo ditë është shumë e rëndësishme për të gjithë komunitetin mysliman, por dhe popullin shqiptare sepse jemi një ndër vendet me harmoninë më të madhe fetare. Unë ju uroj gëzuar dhe mbarësi!-", tha Kryemadhi.

Edhe kryetarja e Kuvendit, Lindita Nikolla uroi besimtarët myslimanë, duke theksuar se shqiptarët duhet të festojnë bashkë, pavarësisht sfidave, si tërmeti, pandemia apo lufta. Nisur nga bashkëjetesa fetare në Shqipëri, Nikolla thotë se kjo është një vlerë e shtuar e vendit tonë.