Nga marrëveshja e ‘5 qershorit’ te rilindja e Gjykatës Kushtetuese, impakti i Yuri Kim në 2020-ën e shqiptarëve

Duke iu referuar ndikimit të gjithhershëm që ambasada amerikane ka në Tiranë, edhe këtë vit përmes veprimit të diplomates Yuri Kim, ka qenë i pritshëm një influencë e shtuar në terrenin tonë politik.

Kim erdhi zyrtarisht në Tiranë në 22 janar të këtij viti.

Prioritet

Që në daljen e saj të parë, Kim prezantoi tri priorietet kryesore gjatë punës si diplomate në Shqipëri.

“Së pari, do të punoj për të thelluar marrëdhënien tonë në fushën e mbrojtjes, që Shqipëria të bëhet aleate më e fortë dhe e aftë.

Së dyti, do vijoj të nxis zhvillimin demokratik të Shqipërisë, për të mbështetur përpjekjet tuaja për anëtarësimin në BE. Aspiratat europiane të Shqipërisë dhe reformat që ato kërkojnë do të sjellin më shumë begati dhe qëndrueshmëri për ju dhe rajonin.

Së treti, do të punoj për të nxitur eksportet dhe investimet e Shteteve të Bashkuara në Shqipëri, në mënyrë që të krijojmë më shumë vende pune dhe mundësi për amerikanët dhe shqiptarët”, renditi Kim.

Gjykata Kushtetuese

Kim ka qenë mjaft aktive në debate të ndryshme të politikës dhe procesit të reformimit të drejtësisë së re.

Ajo e ka reflektuar angazhimin jo vetëm përmes mesazheve, shpesh të forta dhe të drejtpërdrejta, por edhe me takime ‘kokë më kokë’ me drejtuesit politikë apo zyrtarë të tjerë të rëndësishëm.

Një rol me mjaft peshë Kim pati në nxitjen e institucioneve për ringritjen e Gjykatës Kushtetuese. Ajo la fillimisht një afat për funksionalitetin e saj deri në 31 korrik të 2020-ës, megjithatë presidenti Ilir Meta dekretoi një javë para kësaj date emërimin e anëtarit të 6-të të gjykatës, duke e bërë atë funksionale pas tri vitesh mungesë.

“Një lajm i madh dhe përmbushjen e një ndër kushteve të integrimit në BE”, e cilësoi Kim këtë hap të rëndësishëm.

Gjatë vitit, ajo ka apeluar vazhdimisht instancat për arritjen në këtë pikë. Shpesh, ambasadorja e SHBA-ve i kërkoi Këshillit të Emërimeve në Drejtësi të mblidhet dhe të dërgojë drejt Kuvendit e Presidentit listën përfundimtare me kandidatët për Gjykatë Kushtetuese. Po ashtu, i bëri thirrje Presidentit dhe Kuvendit të veprojnë me shpejtësi.

Reforma Zgjedhore-marrëveshja e 5 qershorit

Ambasadorja amerikane Yuri Kim i ka nxitur palët të mbyllin reformën zgjedhore dhe arritjen e marrëveshjes së 5 qershorit.

Bashkë me ambasadorin e BE, Luigi Soreca dhe atë britanik Norman Duncan, Kim u bë pjesë e mbledhjeve të Këshillit Politik, ku merrnin pjesë të gjitha palët politike në vend. Pas orëve të gjata, Kim njoftoi se në 5 qershor u arrit një draft marrëveshje mes palëve për reformën zgjedhore.

Ajo falenderoi qeverinë për përpjekjet dhe tha se topi ishte në fushën e opozitës.

“Drafti përmban masa të cilat janë adresuar nga ODIHR. Gjithashtu ajo përmban disa hapa domethënës që nuk ishin rekomanduar nga ODIHR por që bëjnë një hap përpara për zgjedhje të lira dhe të ndershme në Shqipëri.

Ka ardhur koha për opozitën dhe PD dhe mikun tim Lul Basha që të barazpeshojë të gjithë faktorët dhe ti thonë po për popullin shqiptar dhe ti thonë po për Shqipërinë në BE.

Topi është në fushën e tij, e ardhmja është në fushën e tij”, tha Ambasadorja Kim në daljen për mediat pas përfundimit të takimit të këshillit politik në rezidencën e Ambasadës Amerikane.

Zyrtarja amerikane arriti të bëjë bashkë politikën edhe në një ceremoni për Festën e Pavarësisë së SHBA-ve, 4 korrik.

Në fotot e publikuara nga ambasadorja Yuri Kim, u pa se në ceremoni morën pjesë kryeministri Edi Rama, kreu i bashkisë Tiranë Erion Veliaj, Presidenti Ilir Meta, Kreu i Kuvendit Gramoz Ruçi dhe kryedemokrati Lulzim Basha. Kjo ishte ndër të paktat herë që këta personalitete të politikës shqiptare u bënë bashkë.

Reforma në Drejtësi

Reforma në Drejtësi është gjithashtu një tjetër moment ku Kim është angazhuar gjatë këtij viti, duke e cilësuar si një implementim shumë të rëndësishëm për të ardhmen në Shqipëri. Shpesh u bëri thirrje palëve politike që të ndalojë së luajturi lojra, madje foli edhe për një marrëveshje mes palëve për sabotim të reformës në drejtësi.

"Shpresoj që fjalët për një marrëveshje prapa krahëve për të vrarë reformën në drejtësi në Shqipëri të mos jenë të vërteta. Reforma është e dhimbshme, e ngadaltë & jo perfekte por është e nevojshme, po bën përparim & duhet të vazhdojë", pati shkruar ambasadorja në një Tëitter.

Kjo deklaratë e fortë nga ambasada amerikane erdhi në një kohë kur SHBA-të janë investuar për reformën në drejtësisë prej më shumë se 4 vite. Qëndrimi zyrtar i ambasadores Kim vuri në pikëpyetje një marrëveshje të mundshme mes partive politike në Shqipëri, për të mos i dhënë drejtësisë forcën e duhur për të goditur korrupsionin dhe krimin e organizuar.

Ambasadorja ka zhvilluar takime edhe me drejtoreshën e BKH-së, Aida Hajnaj si dhe kreun e Prokurorisë së Posaçme, Arben Kraja.

Kim konfirmoi mbështetjen ndaj SPAK, ndërsa theksonte domosdoshmërinë e zbatimit të Reformës në Drejtësi.

Kritikat e Kim

Një tjetër moment është kur ambasadorja Yuri Kim kritikoi paaftësinë e politikanëve shqiptarë për të arritur në kompromise pa ndërhyrjen e të huajve.

Ajo tha se marrëveshja zgjedhore e 5 qershorit duhet të ishte e fundit e arritur në ambientet e një ambasade qoftë kjo dhe ajo Amerikane.

Shtetet e bashkuara të Amerikës vazhdojnë të mbështesin perspektivën europiane të Ballkanit Perëndimor, e veçanërisht të Shqipërisë dhe Maqedonisë së Veriut.

Po ashtu, zyrtarja e lartë ka dhënë mesazhe të fortë lidhur me politikën në Shqipëri. Ajo theksonte se shqiptarët janë të lodhur nga politika dhe kërkojnë mundësi më të mira për fëmijët.

“Shqiptarët janë të lodhur nga politika. Duan zgjidhe, jo të vazhdohet me një lojë faji, duan që udhëheqësit të punojnë së bashku për të mirën e popullit. Duan të kenë shanse, mundësi dhe jo korrupsion, mundësi që t’ju japin një të ardhme më të mirë fëmijëve të tyre. I sfidoj të gjithë në qeveri apo jo, në biznes që ta marrin parasysh këtë raport që të ndryshoni, të ecni përpara. Populli do rezultat, vizon jo ofendime. Besoj që udhëheqësit shqiptarë janë të aftë në këtë sfidë. SHBA do jenë të gatshme t’ju mbështesin”, u shpreh Kim në një postim të saj.

Udhëtimet nëpër Shqipëri

Kim që në krye të herët shprehu dëshirën e madhe për të njohur Shqipërinë dhe shqiptarët. Ndonëse 2020-ta ka qenë vit i vështirë dhe i mbushur me kriza në politikë, përpos mesazheve, Kim zgjodhi të udhëtojë dhe të shohë nga afër bukuritë natyrore shqiptare.

Ndonëse udhëtoi në jug të vendit, në Vlorë, Sarandë, Berat, apo në Shkodër, këtë të fundit e ka cilësuar si ‘pikën e saj të dobët’. Madje, këtë fakt e ka shprehur edhe përmes vizitave më të shpeshta se në vende të tjera.

“Ajo që kam mësuar për Shkodrës është fryma e pavarësisë, qëndrueshmëria juaj dhe sa herë dëgjoj historinë e Rozafës më bën të mendoj që Shkodra është vendi im, vendi që më përshtatet mua”, pati deklaruar Kim në një nga vizitat e saj.

Kim është një diplomate karriere, ka shërbyer në poste të larta drejtuese dhe ka një eksperiencë të gjerë në çështje që lidhen me sigurinë kombëtare nga Europa, në Azi e deri në Lindjen e Mesme.