Nga meshat, dasmat, mortet e konferencat, si i ndryshoi pandemia ritualet tona

Pandemia Covid-19 ndryshoi në Shqipëri dhe në të gjithë botën zakonet, ritet, mënyrën e festimeve, dasmat, varrimet dhe shumë tradita të tjera që i kishin rezistuar kohës.

Distanca fizike dhe një sërë masash të tjera që imponon koronavirusi sollën anullimin e festave të ndryshme.

Dasmat

Agjensitë e dasmave u përballën me një anullim të pronotimeve. Komiteti Teknik i Ekspertëve vendosi që në krye të herës ndalimin e ceremonive të tilla. Nuk munguan as dasmat që u zhvilluan në fshehtësi, për të cilat u gjobitën pronarët e lokaleve.

Ritet e festave dhe meshat

Ritet fetare nuk u praktikuan si në kushte normale, ato u kryen në shtëpi për të shmangur grumbullimet e njerëzve. Meshat në shumë vende janë kryer online. Besimtarët kanë festuar vetëm me familjet e tyre.

 

Ditëlindjet

Nuk ka më festë, as për ditën e lindjes. Mbyllja e bareve dhe restorantëve për të pandaluar përhapjen e virusit bëri të pamundur zhvillimin e festave “gjigande” të ditëlindjeve. Dita më e rëndësishme u festua vetëm me personat e familjes.

Cermonitë mortore

Një prej traditave mijëravjeçare është dhe respektimi i personave që ndërrojnë jetë. Masat për parandalimin e koronavirusit nuk lejojnë asnjë përveç familjarëve të marrin pjesë në ceremonitë e varrimit. Gjithashtu u ndaluan edhe drekat mortore, pra një lamtumirë në distancë.

 

Fushata elektorale

Disa muaj para zgjedhjeve të 25-prillit u njoftua se partitë politike do të zhvillojnë si asnjëherë më parë fushatë elektorale online. Ky vendim u mor për të shmangur grumbullimet dhe përhapjen e virusit.

Veprimtaria parlamentare

Një tjetër masë në kuadër të pandemisë ishte edhe zhvillimi online i mbledhjeve të komisioneve parlamentare. Gjithashtu protokollet e sigurisë u aplikuan edhe në seancat plenare të Kuvendit.

E njëjta gjë u aplikua edhe për konferencat ndërkombëtare. Pavarësisht vështirësive ato u zhvilluan në platfomat online për shkak të pandemisë.