Nga sot nafta 260 lekë/litri, a është koha për një tjetër protestë kombëtare?

Çmimet e karburanteve janë rritur sërish, duke shënuar nivelin më të lartë që prej muajit mars. Kështu, Bordi i Transparencës vendosi që nga sot nafta të shitet me 260 lekë për litër.

Ky fakt ka krijuar mjaft revoltë, ndërsa të shumtë kanë qenë ata që kanë bërë thirrje përmes rrjeteve sociale për rikthimin e protestave kundër rritjes së çmimeve së karburanteve, që si rrjedhojë sjell edhe rritje të produkteve dhe shërbimeve të tjera.

Aktivisti Adriatik Lapaj, i cili ishte edhe një ndër iniciatorët e valës së parë të protestave kundër rritjes së çmimeve ka apeluar për një tjetër protestë.

“KOHA PËR TË PROTESTUAR NË ÇDO CEP TË SHQIPËRISË

Kudo ku jemi, t'i ndalim makinat. Të shpallim 1 ditë të protestës kombëtare e të refuzojmë abuzimin me çmimet. Të ndalim makinat! Të mbyllim dyqanet! Të refuzojmë të nënshtrohemi!

Ne jemi ndoshta vendi i vetëm në botë që paguajmë 8 taksa dhe tarifa mbi çmimin e karburanteve!

Taksa:

370 lekë akcizë;

270 lekë taksë qarkullimi;

30 lekë taksë karbon;

100 lekë taksë riliçensimi.

Tarifa të tjera që paguhen për koncesionarët privatë:

30 lekë tarifa e markimit dhe ajo e skanimit;

20 lekë tarifa e kontrollit te pompave;

Në fund, mbi 4 taksat shtetërore dhe 3 konçesionarët, shtohet edhe tatimi mbi vlerën e shtuar(TVSH):

TVSH mbi naftën është 20 % e çmimit final, ose rreth 400 lekë për litër.

Kjo e çon barrën totale të taksave që ne paguajmë për një litër naftë plot 1220 lekë për litër.

Pra në një litër naftë, që sot në treg shitet 2580 lekë, rezulton se rreth 1220 lekë janë taksa”, shkruan aktivisti.

Thirrje bën edhe gazetari Mentor Kikia.

“Mos u dorezoni, po na provokojne!

Cmimi i karburanteve sot ka fluturuar afro 260 Leke. Kjo ka shkaktuar zemerim dhe indinjate te madhe ne popull.

Ne shume rruge makinat u fiken ne shenje proteste.

Lokalet u boshatisen nga klientet

Dhe se shepjti pritet qe njerezit te dalin ne rruge ne protesta edhe te dhunshme

Por kujdes, mos u mashtroni. Cmimi nuk eshte real. Ata thjeshte po bejne nje eksperiment social, si ai qe ka bere dikur Harry Fultz me mishin e nxenesve ne konvikt.

Ata duan te kuptojne se deri kur mund te na mbaje durimi.

Ndaj duroni, te mos reagojme, edhe kur te shkoje 3000 Leke, qe tua djegim eksperimentin”, shkruan Kikia.

Pas protestave kundër rritjes së çmimeve në muajin mars, shqiptarët bllokuan rrugët dhe u konfrontuan me policinë në grupe të vogla, ndërsa kryeministri Edi Rama u detyrua të premtojë ndërhyrje pas tensionit social në rritje, duke ngritur kështu Bordin e Transparencës.

Megjithatë, sërish ka patur mjaft akuza publike në lidhje me funksionimin e bordeve të çmimit të karburanteve dhe ushqimeve.