Bashkia ‘i zvarrit’ rinovimin e shtëpisë prej 2 vitesh, i përgjigjet kërkesës së francezit: Projekti nuk përputhet me planifikimin

Një ditë më parë një qytetar francez, me banim në Austri, dërgoi në adresën e Politiko.al një email ku denonconte zvarritjen prej vitesh nga institucionet shqiptare për të marrë lejen e rikonstruktimit të shtëpisë që ka në pronësi në një zonë të Tiranës, ku përpos banesës zotëron edhe një biznes.

Qytetari shprehet se prej më shumë se dy vitesh, arkitekti shqiptar dhe avokati i tij nuk kishin qenë në gjendje të merrnin leje për punimet e rinovimit duke i argumentuar arsye të ndryshme. Në këto kushte qytetari shprehet se pavarësisht se ka një banesë në Tiranë, detyrohet të qëndrojë dhe jetojë në hotel kur vjen në Shqipëri.  

"Deri më tani (në më shumë se 2 vjet prandaj) arkitekti im shqiptar nuk ka qenë në gjendje të marrë lejen e ndërtimit për punimet e rinovimit (edhe pse shumë e thjeshtë dhe pa vështirësi të dukshme administrative) dhe kështu që unë ende nuk kam akomodim në Tiranë. Kur shkoj në Tiranë, jetoj gjithmonë në hotel ...!", shkruhej në email-in e tij.

Pas denoncimit, Bashkia e Tiranës i është përgjigjur kërkesës së qytetarit përmes një email-i. Sipas konstatimit të Bashkisë së Tiranës, “projekti i propozuar nuk është në përputhje me dokumentet e planifikimit në fuqi, më konkretisht me Vendimin e Këshillit të Ministrave nr.408 datë 13.05.2015 për “Miratimin e rregullores së kontrollit të zhvillimit të territorit”.

Bashkia thekson se “Leja për Rikonstruksion të objektit, klasifikohet në në punime që kryhen nëpërmjet pajisjes Leje Ndërtimi (jo Leje Zhvillimi)... por me kushtin që shtesa e katit të parë të respektojë distancat e përcaktuara me Vendim të Këshillit të Ministrave nr.408 datë 13.05.2015 për për “Miratimin e rregullores së kontrollit të zhvillimit të territorit”.

Teksa liston shqetësimet dhe arsyet e zvarritjes së çështjes së rinovimit, francezi thekson se e gjitha nuk është asgjë tjetër veçse një tentativë e qeverisë në pushtet për të marrë nën kontroll përfitimet ekonomike nga pasuritë e paluajtshme, pasi aktualisht i gjithë ‘qyteti i është nënshtruar rinovimit të pasurive të paluajtshme”.

"Kjo gënjeshtër e madhe, ndërsa qyteti po i nënshtrohet rinovimit të pasurive të paluajtshme, në fakt fsheh një situatë kontrolli të plotë të çështjeve të pasurive të paluajtshme nga Partia Socialiste e zotit Edi Rama, e cila nxjerr përfitime ekonomike prej saj për të vendosur kontrollin e saj politik mbi Shqipërinë", shton më tej qytetari.