Pacienti humbi jetën, mjekëve i pezullohet ushtrimi i detyrës

Gjykata e Fierit ka vendosur pezullimin e ushtrimit të detyrës ndaj dy mjekëve dhe ka caktuar detyrimin për tu paraqitur në policinë gjyqësore për një të tretë, në kuadër të hetimit për "Neglizhencën në trajtimin mjekësor" në lidhje me një rast tragjik të ndodhur në vitin 2022.

Prokuroria e Fierit ka regjistruar procedimin penal nr. 181 për veprën penale “Neglizhenca në trajtimin mjekësor”, parashikuar nga neni 96/2 i Kodit Penal. Sipas hetimeve, më 3 shkurt 2022, një shtetas i identifikuar si A.Sh., i cili kishte shkuar në spitalin e Patosit me dhimbje gjoksi, është dërguar më pas në Urgjencën e Spitalit Rajonal të Fierit dhe më vonë është kthyer në Patos ku ka ndërruar jetë.

Hetimet kanë zbuluar se mjekët që ndodheshin në turnin e natës nuk kishin dijeni për rastin e A.Sh., edhe pse ky i fundit ishte dërguar nga ambulanca e Patosit dhe kishte kërkuar ndihmë për dhimbje në gjoks. Pas hetimit të këtij rasti, Prokuroria ka kërkuar masën e sigurimit me karakter ndalues për dy mjekët, B.Dh dhe I.Ç, të cilët dyshohet se kanë shkelur detyrat e tyre profesionale, duke e lënë pa trajtim të duhur pacientin, dhe ndaj tyre është vendosur pezullimi i detyrës.

Për një tjetër mjek, shtetasin K.J., është caktuar masa e sigurimit "Detyrimi për tu paraqitur në policinë gjyqësore", pasi dyshohet për të njëjtën vepër penale.

Ky rast ka tronditur komunitetin dhe ka nxitur kërkesa për përgjegjësi më të madhe dhe mbikëqyrje të kujdesshme të shërbimit mjekësor në Shqipëri.

Njoftimi zyrtar

Neglizhuan në trajtimin e pacientit, Prokuroria Fier procedon mjekët dhe kërkon masë sigurimi ndaj tyre

Prokuroria pranë Gjykatës së Shkallës së Parë të Juridiksionit të Përgjithshëm Fier, mbi bazën e materialeve të kallëzimit të veprës penale, të ardhura nga Komisariati i Policisë Fier, ka regjistruar procedimin penal nr. 181 viti 2022 për veprën penale “Neglizhenca në trajtimin mjekesor” parashikuar nga neni 96/2 i Kodit Penal.

Nga hetimi i kësaj çështje ka rezultuar se, më datë 03.02.2022, salla operative është njoftuar se në spitalin e Patosit është dërguar pa shenja jete shtetasi A.Sh. Nga veprimet hetimore ka rezultuar se, i ndjeri kishte shkuar në spitalin Patosit në orët e para të mëngjesit dhe më pas është dërguar me ambulancë në Urgjencën e Spitalit Rajonal Fier dhe më pas është kthyer në Patos ku është ulur në një lokal dhe ka ndërruar jetë. Është marrë informacion për mjekët e turnit që ndodheshin në zyrën e mjekëve dhe nëse shtetasi A.Sh është paraqitur në orët e para të mëngjesit i shoqëruar nga ambulanca e Patosit me dhimbje gjoksi. Për këtë fakt, mjekët kanë mohuar dijeninë në lidhje me rastin dhe faktin që i ndjeri të jetë paraqitur në turnin e tyre.

Në funksion të këtij hetimi, krahas veprime hetimore që lidhen me natyrën e kësaj ngjarje, është administruar edhe akti i ekspertimit mjekoligjor, ku është arritur në përfundimin se nga ana e personelit mjekësor që ka trajtuar rastin gjenden elementë të neglizhencës mjekësore që kanë ndikuar drejtëpërdrejtë në ardhjen e pasojës.

Për sa më sipër, ekziston dyshimi i arsyeshëm që mjekët kanë neglizhuar në trajtimin e duhur të rastit, duke sjellë si pasojë vdekjen e të ndjerit.

Mbi kërkesën e Prokurorisë pranë Gjykatës së Shkallës së Parë të Juridiksionit të Përgjithshëm Fier, Gjykata me vendimin nr. 62-2024-6773 datë 21.12.2024 vendosi caktimin e masës së sigurimit:

1. Caktimi i masës së sigurimit me karakter ndalues “Pezullimi i ushtrimit të një detyre apo shërbimit publik”, parashikuar nga neni 242 i K.Pr.Penale ndaj shtetasit B.Dh, si i dyshuar për kryerjen e veprës penale “Neglizhenca në trajtimin mjekesor” parashikuar nga neni 96/2 i Kodit Penal.

2. Caktimi i masës së sigurimit me karakter ndalues “Pezullimi i ushtrimit të një detyre apo shërbimit publik”, parashikuar nga neni 242 i K.Pr.Penale ndaj shtetases I.Ç, si e dyshuar për kryerjen e veprës penale “Neglizhenca në trajtimin mjekesor” parashikuar nga neni 96/2 i Kodit Penal.

3. Caktimi i masës së sigurimit me karakter shtrëngues “Detyrimi për tu paraqitur në policinë gjyqësore”, parashikuar nga neni 234 i K.Pr.Penale ndaj shtetasit K.J, si i dyshuar për kryerjen e vepres penale “Neglizhenca në trajtimin mjekesor” parashikuar nga neni 96/2 i Kodit Penal

Në datë 25.12.2024 oficerët e policisë gjyqësore pranë Komisariatit të Policisë Fier kanë ekzekutuar urdhërin e Prokurorisë pranë Gjykatës së Shkallës së Parë të Juridiksionit të Përgjithshëm Fier datë 23.12.2024, dalë në zbatim të vendimit të Gjykatës së Shkallës së Parë të Juridiksionit të Pergjithshem Fier, nr. 62-2024-6773 date 21.12.2024.

Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë dhe hetimin e rasteve të subjekteve të posaçme që për shkak të cilësive të tyre neglizhojnë në trajtimin e duhur të rastit duke rrezikuar jetën dhe shëndetin e personave.