Përfundojnë hetimet për tragjedinë e Gërdecit/ SPAK merr të pandehur Mediun, dy akuzat

SPAK ka përfunduar hetimet për tragjedinë e Gërdecit dhe ka vendosur të marrë të pandehur ish-ministrin e Mbrojtjes Fatmir Mediu.

Mbi këtë të fundit rëndojnë dy akuza, shpërdorim detyre dhe shpërdorim të detyrës në bashkëpunim me kuadrin komandues ushtarak.

Mediu u thirr sot në SPAK, ku iu komunikua akuza. Pas këtij momenti dosja do t’i dorëzohet për shqyrtim paraprak Gjykatës së Posaçme.

Ish-ministri i ka mohuar të gjitha akuzat që janë hedhur mbi të lidhur me tragjedinë e Gërdecit. Tragjedia e Gërdecit ndodhi më 15 mars të 2008-ës, ku një fabrikë për demontimin e armëve shpërtheu dhe u mori jetën 26 personave, ndërsa u plagosën qindra të tjerë.

Pak informacion për “dosjen Mediu”

Pasi ndodhi ngjarja, në vitin 2008, Prokuroria e Përgjithshme regjistroi procedimin penal ndaj shtetasit Fatmir Mediu në cilësinë e ish-Ministrit të Mbrojtjes.

Në përfundim të hetimeve paraprake, në datën 13.03.2009, Prokuroria e Përgjithshme paraqiti në Gjykatën e Lartë kërkesë për gjykimin e çështjes penale nr.3 viti 2008. Në këtë hetim shtetasi Fatmir Mediu u akuzua për kryerjen e veprës penale “Shpërdorimi i detyrës” kryer në bashkëpunim, parashikuar nga nenet 248 dhe 25 të Kodit Penal, si dhe për kryerjen e veprës penale “Shpërdorim i detyrës” në bashkëpunim me subjekt ushtarak-kuadër komandues, parashikuar në nenet 70/2 e 2 të Kodit Penal Ushtarak dhe neni 25 i Kodit Penal.

Kolegji Penal i Gjykatës së Lartë me vendimin nr.6, datë 14.09.2009, vendosi pushimin e procedimit penal në ngarkim të të pandehurit Fatmir Mediu, për shkak se ndjekja penale ndaj tij nuk mundet që të vazhdojë. Kolegji Penal ka arsyetuar se zgjedhja e shtetasit Fatmir Mediu deputet në Kuvend me vendimin e datës 01.08.2009 (rizgjedhja si deputet pas dërgimit të çështjes në gjyq) dhe mungesa e një autorizimi për procedim të Kuvendit të Shqipërisë për këtë person pas mandatimit si deputet, është një prej rrethanave ligjore të parashikuara nga neni 290/1, shkronja (e) të Kodit të Proçedurës Penale, në bazë të të cilit ndjekja penale e filluar në ngarkim të shtetasit Fatmir Mediu nuk mundet që të vazhdojë.

Pas ndryshimeve ligjore, ku deputeti nuk ka imunitet ndaj ndjekjes penale të tij, në datën 05.05.2021, Prokuroria e Posaçme paraqiti në Gjykatën e Lartë kërkesë për revokimin e vendimit të pushimit të çështjes penale ndaj shtetasit Fatmir Mediu dhe vijimin e procesit gjyqësor kundër tij.

Në qershor të 2020-ës, Gjykata e Lartë shpalli moskompetencë për rihapjen e çështjes ndaj ish-ministrit të Mbrojtjes Fatmir Mediu dhe e kaloi çështjen në kompetencë të GJKKO.

Kështu, Gjykata e Posaçme merr në dorë çështjen e ish-ministrit e Mbrojtjes. Prokuroria e Posaçme kundër Korrupsionit dhe Krimit të Organizuar njoftoi se ka kërkuar rihapjen e procesit gjyqësor ndaj ish-Ministrit të Mbrojtjes Fatmir Mediu, pas kërkesës së prindërve të 7 vjeçarit Erison Durdaj, një prej viktimave të shpërthimit.

Ish-ministri Fatmir Mediu dorëzoi rekursin në Gjykatën e Lartë ku kundërshton vendimin e Apelit të GJKKO, pasi ky i fundit vendosi që të rikthente për hetim në SPAK çështjen "Gërdeci". Por rekursi i tij u rrëzua.