Flash News

Këmbimi valutor, me sa shiten e blihen monedhat e huaja

Kthjellime në të gjithë Shqipërinë, ja si pritet të jetë moti sot

Konflikt mes të rinjve në Fushë-Krujë, 22-vjeçari plagoset me thikë

Koncerti i Kanye West me fondet e shtetit, OCCRP: Qeveria e përdori për të sfumuar protestat

Defekt në tragetin e linjës Durrës-Bari, bllokohen rreth 100 pasagjerë

E-TJERA

Pse goditja e Arben Ahmetajt u fokusua te Belinda Balluku

Politiko 28 January 2025, 13:30

Tabela e qitjes së intervistës së tretë të Arben Ahmetajt, këtë herë, përpos kryeministrit Rama ka qenë zëvendësja e tij Belinda Balluku. Ai ka artikuluar disa akuza konkrete për drejtuesen e sektorit të energjisë, rrugëve, porteve, e cila kontrollon disa institucione dhe ministra. Ndërsa Ramën e konsideronte gjatë gjithë intervistës tek Çim Peka live “si kreu i organizatës”, Belinda Ballukun e përshkroi si pronaren e një kompanie imagjinare “5B” të ngjashme me skemën e Veliajt, tek “5D”.

Ahmetaj i është rikthyer edhe njëherë temës të tunelit të Llogorasë, për të cilin pasi u anulua pa shkak tenderi i parë, çmimi u rrit me 50 milionë euro dhe për këtë u vendos gjatë një takimi në Turqi. “Unë kam qenë dëshmitar bashkë me Ramën dhe Belindën kur ndodhi kjo… Vetëm me këtë tunel të Llogarasë, janë gëlltitur baras me dy inceneratorë të Fierit dhe të Elbasanit dhe baras me 15 shkolla të mëdha”, tha Ahmetaj duke e etiketuar Ballukun si “plaçkitësja më e madhe e buxhetit të shtetit që prej kohës së Ismail Qemalit”.

Sipas tij, duke llogaritur tenderët e rrugëve, koston e gjeneratorëve Tigër 1 dhe 2 në Vlorë që s’janë ndezur kurrë, investimeve të gabuara në energjetikë, Balluku i ka shkaktuar buxheti të shtetit një dëm dyfish më të madh sesa tërmeti i vitit 2019. “Dhe mos harroni- tha ai- se kostoja e dëmeve të tërmetit ishte afro 1.1 miliard Euro”.

Edhe për koncesionin e shumë diskutuar të rrugës Thumanë- Kashar, Ahmetaj tha se e ka kundërshtuar Ballukun ta bënte në atë mënyrë. “Në vendim final është shfuqizuar urdhri i anulimit, pra, është rrëzuar ndërprerja e procesit të koncesionit. Vendimet e gjykatës nuk i kanë dhënë të drejtë plaçkitëses që të bënte një format të ri koncencioni.

Me vullnetin e saj ka bërë koncensionin dhe u ka ngarkuar shqiptarëve 1.3 miliardë euro, duke bërë një proces pa tender me vullnet të saj. Po pse mo ça janë qytetarët shqiptarë që duhet të paguajnë më shumë se europianët për rrugët? Si ka mundësi që qytetarët shqiptarë paguajnë 12 euro cent për tollet e rrugëve, dhe qytetarët europianë me tvsh të përfshirë paguajnë 7 euro cent?” tha ai.

Duke iu referuar etiketimit “5B” Ahmetaj shtoi se zv/ kryeministrja ka emëruar dhe kontrollon personalisht pesë ministra duke përmendur me emra vetëm atë të Mbrojtjes, Piro Vengu, të Brendëshëm, Ervin Hoxha dhe ministrin e Financave Petrit Malaj.

Ndryshe nga intervista e parë tek Çim Peka live ku targetin e goditjes e fokusoi tek Erion Veliaj, të cilin e etiketoi si ‘pronarin faktik të inceneratorit”, tani që ky i fundit ka marrë në mënyrë të pakthyeshme tatëpjetën, sulmi është fokusuar tek ajo që konsiderohet si njeriu më i fuqishëm pranë Ramës, Belinda Balluku.

Në intervistën e kësaj të hëne, Veliaj u pershkrua si një njeri që kishte kundërshtuar kanabizimin e vendit dhe për të cilin Ahmetaj nuk dëshironte që të përfundonte në burg apo t’i vuanin njerëzit e afërt. Madje ai vijoi se Balluku paguan njerëz që të shkojnë në demonstratat kundër Veliajt.

Ndërsa e gjithë intervista u karakerizua nga epietet, “plaçkitëse”, “e paditur”, “Bela mafia” për numrin 2 të qeverisë. E sikur këto të mos mjaftonin, ish zv/kryeministri ka thënë për pasardhësen e tij se për të gjitha ajo ka mbështetjen e SPAK-ut dhe Altin Dumanit. “Ajo thotë që sa të kem Altin Dumanin atje s’çaj kokën”, nënvizoi ai duke treguar se SPAK e ka hetuar Ballukun për fallsifikim diplome por i ka mbyllur më pas hetimet/ Lapsi.al