Qeveria miraton kredinë studentore, kriteret e përfitimit

Qeveria ka miratuar kredi studentore për vitin e ri akademik në mënyrë që studentët për përballojnë shpenzimet e shkollimit. Ministrja Evis Kushi tha se skema e re synon t’iu mundësojë studentëve mbulimin e tarifave të studimit dhe kostove të jetesës gjatë studimeve të larta.

Kredia do të jepet për studentë të cilët nuk kanë përfituar bursë ose që nuk janë përjashtuar nga tarifa vjetore. Ajo do të jepet me dy këste dhe do të përllogarisë tarifën e universitetit si dhe një shumë parash që shkon ekuivalent me pagën minimale.

Kriter kryesor për përzgjedhjen janë vlera e kredisë, ndjekja e studimeve në programet prioritare si edhe rezultatet në nota.

1. Kredia studentore jepet pa kolateral fizik

2. Kredia studentore jepet për mbulimin e kostove vetëm për ndjekjen e një programi studimi

3. Financimi i kredisë bëhet me këste, të paktën dy herë në vit, pas konfirmimit nga IAL që studenti ka shlyer tarifën e vitit dhe ka frekuentuar procesin mësimor

4. Shlyerja e kredisë nis jo më herët se 3 vite pas nënshkrimit të kontratës së kredisë për studimet e ciklit të parë, jo më herët se 2 vite pas nënshkrimit të kontratës së kredisë për programe studimi cikli i dytë dhe e treta jo më herët se 5 vjet pas nënshkrimit të kontratës së kredisë, për rastet e kredisë së marrë për program studimi të integruar të ciklit të dytë

5. Norma e interesit të kredisë të jetë e pandryshueshme, gjatë gjithë kohëzgjatjes së kontratës së kredisë.

Studentët që përfitojnë kredi studentore, nuk duhet të jenë përfitues nga politikat e mëparshme, si bursë apo përjashtim nga tarifat, me qëllim që të zgjerohet sa më shumë numri i përfituesve.

Studentët përfitues do të përzgjidhen bazuar në disa prioritete, si:

1. vlera e kredisë

2. ndjekja e studimeve në programet prioritare,

3. rezultatet e mëparshme gjatë studimeve, etj.