SPAK udhëron arrestimin e 6 punonjësve të Bashkisë Durrës dhe 2 të kompanive private, abuzuan me tenderin prej 7 mln lekësh

Tetë persona janë arrestuar mëngjesin e sotëm me urdhër të SPAK-ut, mes tyre gjashtë zyrtarë të Bashkisë Durrës dhe dy punonjës të kompanive private për shkelje të barazisë në tendera.

Ndërsa për dy punonjës të tjerë të kompanive private është vendosur "arrest shtëpie" dhe "detyrim paraqitje".

Bëhet fjalë për një tender të zhvilluar nga Bashkia e Durrësit në periudhën maj-qershor 2020, me vlerë të fondit limit prej 7 083 000 lekë (pa TVSH).

Adriatik Velaj, Muhamet Likazhiu dhe Artan Taho në cilësinë e anëtarëve të grupit të specifikimeve teknike dhe përllogaritjes së vlerës së fondit limit, pranë Bashkisë Durrës akuzohen për “shpërdorimit të detyrës”.

Ndërsa  Kastriot Beqaraj, Gjergj Markola, Indrit Matmuja me cilësinë e anëtarit të Komisionit të Vlerësimit të Ofertave, pranë Bashkisë Durrës akuzohen për "Shkelje të barazisë së pjesëmarrësve në tendera apo ankande publike" kryer në bashkëpunim.

Në pranga kanë rënë dhe Albion Bushi e Riza Sulaj me cilësi administratorë, ortakë dhe punonjës të shoqërive R&R Group sh.p.k. dhe Klosi – R Company sh.p.k.

Ata  kanë konsumuar veprën penale të “Falsifikimit të dokumenteve”  duke dorëzuar dokumente të rreme për këtë procedurë prokurimi në mënyrë që të fitonin tenderin për blerjen e një zjarrfikëse.

Ndërkohë  dy punonjëset e kompanive private, Lulëzime Rami është lënë në “arrest në shtëpie" dhe Elona Ramin është vendosur  “detyrim për t’u paraqitur në policinë gjyqësore”.

SPAK po heton dy kompanitë private që morën pjesë në tender, pasi akuzohen për falsifikim dokumentesh përsa i përket procedurave të tjera të prokurimit ku këto subjekte kanë qenë pjesëmarrëse.

Njoftimi i SPAK:

Në procedurën e prokurimit me REF-57495-05-06-2020, të zhvilluar nga Bashkia Durrës, në periudhën maj – qershor 2020, me vlerë të fondit limit prej 7 083 000 lekë (pa TVSH), janë evidentuar shkelje ligjore, te kryera nga shtetasit A.V., M.L. dhe A.T., me cilësinë e  anëtarit të grupit të specifikimeve teknike dhe përllogaritjes së vlerës së fondit limit, pranë Bashkisë Durrës, të cilat formojnë elementët e veprës penale të “Shpërdorimit të detyrës”, parashikuar nga neni 248 i K.Penal dhe nga shtetasit P.B., Gj.M., I.M., me cilësinë e anëtarit të Komisionit të Vlerësimit të Ofertave, pranë Bashkisë Durrës, të cilat formojnë elementët e veprës penale të ‘Shkeljes së barazisë së pjesëmarrësve në tendera apo ankande publike’ kryer në bashkëpunim, parashikuar nga neni 258 e 25 i K.Penal.

Gjithashtu është krijuar dyshimi i arsyeshëm se, shtetasit A.B., E.R., L.R. dhe R.S., administratorë, ortakë dhe punonjës të shoqërive R&R Group sh.p.k. dhe Klosi – R Company sh.p.k., kanë konsumuar veprën penale të  “Falsifikimit të dokumentave” në bashkëpunim, parashikuar nga neni 186 paragrafi i dytë i K.Penal, duke dorëzuar dokumenta të falsifikuara në kuadër të kësaj procedure prokurimi.

Janë regjistruar si persona nën hetim, për veprën penale të “Falsifikimit të dokumentave”, parashikuar nga neni 186 i K. Penal edhe shoqëritë R & R Group sh.p.k., Klosi – R Company sh.p.k. dhe Ra – Mi Kompani sh.p.k., subjekte për të cilat vijojnë hetimet, përsa i përket procedurave të tjera të prokurimit ku këto subjekte kanë qenë pjesmarrëse.

Bazuar në kërkesën e Prokurorisë së Posaçme, Gjykata e Posaçme e Shkallës së Parë Për Korrupsionin dhe Krimin e Organizuar Tiranë, me vendimin nr. 90 akti datë 28.10.2021, ka vendosur:

Caktimin e masës së sigurimit “arrest në burg” për shtetasit: P.B., Gj.M., I.M., A.V., M.L., A.T., R.S., A.B.

Caktimin e masës së sigurimit “arrest në shtëpi” për shtetasen L.R. dhe “detyrim për t’u paraqitur në policinë gjyqësore” për shtetasen E.R.

Ekzekutimi i masave të sigurimit nga policia gjyqësore pranë Drejtorisë Hetimore, Drejtoria e Përgjithshme e Policisë së Shtetit, u bë i mundur sot më datë 29.10.2021.