Studim: Bota do të përballet me temperatura ekstremisht të larta çdo dy vjet

Pothuajse çdo vend në Tokë mund të përjetojë vite jashtëzakonisht të nxehta deri në 2030-ën, sipas një studimi të ri që nënvizon kontributin e jashtëzakonshëm të emetimeve nga ndotësit kryesorë të botës.

Studimi i modelimit kombinoi të dhënat mbi emetimet historike dhe premtimet e bëra përpara samitit të klimës COP26 për shkurtime nga pesë emetuesit kryesorë - Kina, SHBA, Bashkimi Evropian, India dhe Rusia - për të bërë parashikime të ngrohjes rajonale deri në vitin 2030.

Studiuesit evidentuan se 92 përqind e 165 vendeve të studiuara pritet të përjetojnë temperatura vjetore jashtëzakonisht të nxehta, çdo dy vjet.

Alexander Nauels nga Climate Analytics, i cili ishte bashkëautor i studimit të botuar në revistën Communications Earth and Environment, tha se në vetvete ishte "shumë e habitshme".

"Kjo thjesht tregon vërtet urgjencën dhe se si po shkojmë në një botë që është shumë më e nxehtë për të gjithë," tha ai.

Autorja kryesore Lea Beusch, e Institutit për Shkencën Atmosferike dhe Klimatike në universitetin ETH të Cyrihut, tha se studimi gjeti "një gjurmë të qartë" të veprimeve të emetuesve kryesorë në shkallë rajonale.

"Unë mendoj se kjo është shumë e rëndësishme, sepse ne zakonisht flasim për këto sasi abstrakte të emetimeve, ose temperaturat globale, për të cilat ne dimë, por nuk mund t'i ndiejmë vërtet. Ndërsa ndryshimi rajonal i klimës është shumë më afër asaj që do të përjetojmë – ne do të përjetojmë këtë ngrohje në vendin tonë dhe këtë frekuencë në rritje të viteve jashtëzakonisht të nxehta”, tha ajo.

Studiuesit gjetën ndikimin më të madh për sa i përket shpeshtësisë së viteve jashtëzakonisht të nxehta në Afrikën tropikale.

Rritja më e madhe e përgjithshme e temperaturës është në zonat veriore me gjerësi të lartë gjeografike, të cilat po ngrohen me një ritëm më të shpejtë se tropikët.

Autorët theksuan se parashikimi për shpeshtësinë e viteve ekstreme mund të ndryshohet nëse vendet rritin ndjeshëm përpjekjet për të ulur ndotjen.

Burimi: Euroactiv