‘Veçimi’ – forma moderne e pandëshkueshmërisë

Nga Marsh Logu

Më 26 dhjetor, SPAK njoftoi se kishte mbyllur hetimet për dosjen 5D dhe kishte dërguar për gjykim drejtorët e Bashkisë Tiranë dhe individët privatë të lidhur me ta.

Por, në listën e emrave të dërguar për gjykim mungonte ai i kryetarit të Bashkisë Tiranë Erion Veliaj, ish-nënkryetarit Arbjan Mazniku dhe ish-kryeparlamentarit Gramoz Ruçi. Këta të fundit dalin të përfshirë në këtë dosje dhe gjyqtarët e hetimeve paraprake të të dy shkallëve kanë urdhëruar hetimin e tyre.

Si për të justifikuar këtë mungesë, prokurorët e posaçëm njoftuan se kishin vendosur ndarjen dhe veçimin e disa akteve dhe kishin regjistruar procedimin penal me nr. 75/1 të vitit 2024. Me fjalë të tjera Veliaj, Mazniku dhe Ruçi do të hetohen në kuadër të kësaj çështje të re.

 Pra Redi Molla dhe Mariglen Qato mund të dënohen për kontratat dhe përfitimet që kanë marrë nga Bashkia Tiranë, ndërsa titullari, miratuesi dhe nënshkruesi i këtyre kontratave do të vazhdojë të jetë nën hetim.

Ditën e sotme, SPAK njoftoi se kishte mbyllur hetimet për dosjen e Toyota Auris dhe kishte dërguar për gjykim një prokuror, një oficere të policisë gjyqësore dhe një individi privat.

Por, edhe në këtë rast mungon emrat e 4 prokurorëve, 3 gjyqtarëve dhe 1 ministri që rezultojnë të përfshirë në këtë dosje. Sërish mungesat u justifikuan me veçimin e akteve dhe regjistrimin e një procedimi të ri penal me nr. 26/1 të vitit 2024.

Se si mund të ngresh akuzë dhe të marrësh të pandehur dikë se ka ushtruar ndikim të paligjshëm dhe ka korruptuar gjyqtarë e prokurorë, ndërkohë që vetë këta gjyqtarë e prokurorë nuk akuzohen a merren të pandehur, ky mbetet një mister i madh, që vetëm teoria e veçimit mund t'i japë përgjigje. Se si mund të ngresh akuzë për një OPGJ dhe avokat se ka ushtruar ndikim të paligjshëm a korruptuar prokurorët, kur del qartazi se ata janë tërhequr pasi për zgjidhjen e çështjes ishte angazhuar ministri, edhe kjo mbetet pa përgjigje.

Veçimi pra duket të jetë forma moderne për të amnistuar disa prej "të paprekshmëve" duke iu garantuar pandëshkueshmëri. Profesionistët e ligjit e dinë që copëzimi apo veçimi i hetimeve nuk e ndihmon zbardhjen e së vërtetës.

Përkundrazi. Dhe për këtë mund t'ju sjell dy shembuj të njohur. Afera e inceneratorëve u nda dhe u veçua aq shumë sa nuk merret më vesh nëse hetimet janë mbyllur apo vazhdojnë akoma, megjithëse në të tre rastet rezultonin të përfshirë të njëjtit funksionarë publikë dhe individë privatë.

E njëjta gjë ndodhi me dosjen e laboratorit të drogës në Xibrakë. Aktet u veçuan dhe u regjistrua një procedim i ri penal me nr. 335/1 i vitit 2016, i cili pas 2 viteve u pezullua, duke mos i dhënë kështu përgjigje dyshimeve të ngritura për përfshirjen e vëllait të kryeministrit Edi Rama.

 U desh një kallëzim i ri i Gazment Bardhit që dosja të shpluhurosej, të regjistrohej procedimi penal nr. 88 i vitit 2024 dhe të rifillonin hetimet e mbetura jetim nga paraardhësja e SPAK, ish-Prokuroria e Krimeve të Rënda.

Formula veçim, pezullim dhe harrim. Kjo duket të jetë mënyra që po amnistohen funksionarët e lartë të politikës, drejtësisë dhe familjarët e tyre, të përfshirë në dosje të bujshme penale. Ka ndodhur më parë dhe gjasat janë që po ndodh sërish.

Është kaq e thjeshtë dhe kaq e dukshme sa çdo përpjekje për ta justifikuar veçse i ekspozon më shumë në sytë e publikut.