Virusi, Kosova dhe Shoqëria e Hapur

nga Alban Zeneli*

Çdokush që e lexon këtë fillim do të thotë se ç’lidhje kanë, virusi që ka të bëjë me shëndetin e njerëzve, Kosova një shtet që sapo ka dalë nga lufta dhe e vazhdon akoma me mjete të tjera, dhe Shoqëria e Lirë (Shoqëria e hapur), në mendimin tim një ide që ka të bëjë se si e shohim sot zhvillimin e shoqërisë njerëzore.

Kemi një armik shëndeti, një shtet dhe një ide.

Në pamje të parë këto nuk kanë asgjë të përbashkët.

Në një analize jo shumë të thellë, duke marrë në konsideratë dhe statistika, e sidomos faktorin kohë për secilën do të dalim në një përfundim që kanë shumë gjëra që më së shumti i afrojnë.

a)Virusi, një rrezik që e ka ndjekur njeriun që në krijimin e tij, herë pas here ka ndryshuar mënyrën e jetesës, por dhe ka qenë shkak i zbulimeve për tu përballur me të, zbulime që e kanë arritur në zhvillimin e shkencës më herët, por sot dhe të teknologjisë. Ky zhvillim i teknologjisë dekadat e fundit po shkon përpara me hapa më të shpejtë se integrimi apo përshtatja e shoqërisë me këto përparime. Shoqëritë shpesh janë dhe skeptike, e realiteti i sotëm, pra Virusi po e tregon më së miri këtë pasiguri.

Ky mosintegrim ose përshtatje vjen nga shumë faktorë, por ajo që është e rëndësishme po bëhet shkak për një hapësirë boshe e që shfrytëzohet nga interesa deri diku okulte si dhe përhapjen e teorive konspirative. Të përhapësh panik me teori konspirative ditët e sotme është sa miopi, por dhe dashakeqësi më e pakta.

E them këtë për një argument të thjeshtë e të kuptueshëm për të gjithë, teoritë konspirative kanë qenë reale në kohë kur teknologjia ishte shumë e pazhvilluar, po sot kur bota është totalisht e hapur e nuk ka më të fshehta e ku gjithkush mund të shohë të lexojë e të dëgjojë gjithcka,

konspiracioni është pa kuptim.

Pra, sot Virusi është aktual, të gjithë po e shohin po e dëgjojnë e për fat të keq shumë po e provojnë, e disa me pasoja fatale. Jashtë konspiracionit ky është realitet e me këtë realitet po përballet e gjithë bota e civilizuar dhe e pacivilizuar.

Patjetër që kjo është një sfidë ose më saktë një luftë, e si në çdo luftë duhet të kemi një strategji për t’u përballur e për ta fituar.

Në fillim duhet të pranojmë “armikun” më pas duhet ta njohim të gjithë për të marrë hapat e nevojshëm të planifikimit e të planizimit të fitores ndaj tij.

Si përfundim duhet të pranojmë REALITETIN!

b) Kosova shtet i çliruar këto 20 vite me ndihmën e paçmuar të aleatëve tanë strategjikë e partnerëve.

Lufta çlirimtare e shqiptarëve të Kosovës dhe ndërhyrja e forcave të Aleancës solli çlirimin e Kosovës në vitin 1999.

Që nga ajo kohë kanë rrjedhur shumë ujëra.

Sot ne kemi një Kosovë të pavarur me një rezolutë 1244 në kurriz, me veriun e pamenaxhueshëm, krijimin e asosacionit të komunave serbe e me disa shtete anëtare të OKB që nuk e njohin pavarësinë e saj.

Me pak fjalë ky është REALITETI që përballen sot të gjithë.

Sepse kemi ardhur në këtë situatë nuk e analizojmë, se është një debat shumë i gjatë dhe nuk dalim askund, ashtu siç nuk kemi realizuar ato objektiva që mendoj kishin partnerët tanë por dhe i gjithë populli i Kosovës.

Analiza ime jo e thellë për të mos hyrë në debate shterpë nuk është për të dhënë faktorët apo aktorët që çuan në këtë aktualitet, por për të mos u marrë me teori konspirative por me pranimin e realitetit ashtu siç është.

Duke njohur situatën ku ndodhet dhe pranimin e saj, zgjidhja bëhet më e lehtë dhe më me pak kosto.

Nuk mund të marr përsipër të jap formula zgjidhje por t’i marrim me rradhë faktet.

Ku ishte Kosova? Ku është Kosova e ku do shkojë?

Ku ishte, besoj e dime (pa konspiracion).

Pyetja shtrohet: Ku është e ku do shkojë? Ku është, kjo është pyetja. Nëse pranohet realisht situata ku ndodhet, atëherë dhe ku do shkojë është e lehtë për zgjidhje me më pak kosto dhe afatgjatë.

Sa më shpejt ta kuptojmë realitetin dhe zgjidhja për Kosovën do të jetë optimale.

Si përfundim dhe Kosova duhet ta pranojë Realitetin.

c) Shoqëria e Lirë (Shoqëria e Hapur) në mendimin tim është një realitet i sotëm i kushtëzuar me kohën ku po jetojmë.

Shoqëria njerëzore ka kaluar apo jetuar në kohë e etapa të ndryshme dhe gjithmonë më të veçantat e saj që nga lindja e njeriut e deri më sot ka kërkuar forma, mënyra e mjete për të jetuar e mbijetuar e në cdo ndryshim, me apo po luftë kanë ndryshuar kulturat e shumëçka tjetër.

Shoqëritë që kanë rezistuar ndryshimeve apo zhvillimeve për shkaqe të ndryshme kanë mbetur gjithmonë prapa.

Shumë ndryshime apo zhvillime dhe ato të shkencës e të teknologjisë më së shumti kanë ardhur me sakrifica nga shoqëri apo kombe të ndryshme. Dhe sot vijmë në një realitet të ndryshëm në mbarë botën. Sot debati më i “madh” për Shoqërinë e hapur ka të bëjë me këndëvështrimin për “moralin” po për ironinë tonë si rezultat i zhvillimeve të ndryshme, politike, ekonomike dhe teknologjikë ka ndryshuar dhe botëkuptimi për moralin.

Ne kemi jetuar në një sistem diktatorial dhe botëkuptimi për moralin ka qenë shumë i ndryshëm me atë që është sot, por akoma nuk është i afrueshëm me shoqëri ku në duam të aspirojmë që të bëhemi anëtarë. Ne aspirojmë që të bëhemi një shoqëri ku të ekzistojë e drejta, ku shteti ynë të jetë demokratik e të bëhemi pjesë e një shoqërie të hapur, por kjo nuk mund të bëhet nëse NE nuk njohim Realitetin brenda NESH.

NE duhet të pranojmë atë që kërkojmë, shoqëri të emancipuar të zhvilluar në çdo aspect, e sa më shpejt ta pranojë, shoqëria jonë aq më shpejt do të bëhemi pjesë e shoqërive ku ne duam të shkojmë.

Ta bëjmë realitet shoqërinë tonë më të hapur, apo më të lirë, ose ti vemë çdo emër që na vjen për shtat.

Si përfundim Virusi, Kosova, Shoqëria e hapur kanë një të përbashkët REALITETIN.

Sa më shpejt ta kuptojmë e ta pranojmë, pa hipokrizi e pa konspiracion, të tre shoqëritë do të fitojnë.

*Ish-deputet i Kuvendit të Shqipërisë