Zbardhet deklarata e Këshillit të SA/ Nga reformat, zgjedhjet dhe integrimi, si vlerësohet Shqipëria; Theksi te dialogu mes partive

Ka përfunduar takimi i njëmbëdhjetë Këshilli i Stabilizim-Asociimit midis Shqipërisë dhe Bashkimit Evropian. Në deklaratën zyrtare thuhet se Këshilli i SA vlerësoi përpjekjet e Shqipërisë në disa fusha, si në shtetin e së drejtës, administratën publike, politikën ekonomike, arsimin dhe punësimin.

Ndërsa është ndalur te procesi i rivlerësimit të gjyqtarëve dhe prokurorëve, Këshilli i SA vlerësoi pozitivisht se organet e reja të drejtësisë në luftën kundër korrupsionit.

Për realizimin e reformave, Këshilli vlerëson se shumë domethënës është edhe dialogu konstruktiv dhe gjithëpërfshirës midis partive politike dhe bashkëpunimi në Parlament.

"Këshilli i SA theksoi rëndësinë e vazhdimit të përpjekjeve të reformës, veçanërisht në lidhje me emërimet e gjyqtarëve dhe hetuesve, si dhe procedimin e vazhdueshëm të çështjeve në pritje dhe forcimin e mëtejshëm të historikut të zbatimit të ligjiT", thuhet në deklaratë.

Sa i përket zgjedhjeve të 25 prillit ai shpreh nevojën për t'u ndjekur rekomandimet e OSBE/ODIHR dhe të Komisionit të Venecias.

"Këshilli i SA shënoi përparimin e bërë në përgatitjet praktike për zgjedhjet e ardhshme. Në këtë drejtim, Këshilli i SA ra dakord mbi nevojën për ndjekje të mëtejshme të të gjitha aspekteve që përfshihen në rekomandimet e OSBE / ODIHR, si dhe rekomandimet e Komisionit të Venecias në lidhje me zgjedhjet e ardhshme".

Brukseli nuk ka ende një datë konkrete për konferencën e parë ndërqeveritare me Shqipërinë.

"Këshilli i SA gjithashtu nënvizoi përafrimin e vazhdueshëm 100% të Shqipërisë me Politikën e Përbashkët të Jashtme dhe të Sigurisë të BE-së, duke vlerësuar se kjo përcjell një sinjal të fortë të orientimit strategjik të Shqipërisë dhe angazhimit ndaj synimit të saj për anëtarësim në BE dhe shërben si një shembull pozitiv për të gjithë rajonin", thuhet në deklaratë.

Këshilli i SA foli dhe për sfidat me të cilat u përball Shqipëria si tërmeti dhe pandemia. Gjithashtu risolli në vëmendje mbështetjen që BE-ja ka dhënë për vendin tonë.

BE i ka ofruar Shqipërisë dhe rajonit, me 1.15 miliardë euro të mobilizuara për rimëkëmbjen nga tërmeti dhe për zbutjen e pasojave të pandemisë.

"Në këtë kontekst, Këshilli i SA risolli në vëmendje mbështetjen e paprecedentë që BE i ka ofruar Shqipërisë dhe rajonit, me 1.15 miliardë euro të mobilizuara për rimëkëmbjen nga tërmeti dhe për zbutjen e pasojave të pandemisë.

Kjo e fundit përfshin mbështetje shëndetësore dhe ekonomike prej 3.3 miliardë € në total për rajonin, përfshirë 4 milion € për pajisje urgjente mjekësore për Shqipërinë, mbi 46 milion € për mbështetje socio-ekonomike dhe një kredi 180 milion € për asistencë makro-financiare.

Përveç kësaj, Plani Ekonomik dhe i Investimeve për rajonin përmban një paketë të konsiderueshme investimesh deri në 9 miliardë € dhe garanci që synojnë të mobilizojnë deri në 20 miliardë € për të mbështetur rimëkëmbjen ekonomike", thuhet më tej.

Në këtë takim kryeministri Edi Rama u shoqërua nga ministrja e Jashtme, Olta Xhaçka, Sekretari i Përgjithshëm i PS-së, Taulant Balla dhe Kryenegociatori për Shqipërinë në BE, Zef Mazi. Ndërkohë takimi u drejtua nga Përfaqësuesi i Lartë i Bashkimit për Punët e Jashtme dhe Politikën e Sigurisë, Josep Borrell, ndërsa i pranishëm ishte edhe Komisioneri për Politikën e Fqinjësisë dhe Negociatat e Zgjerimit, Olivér Várhelyi.