Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Edi Rama si Gruevski: “të prera, të ngjitura, të montuara”

Politiko 18 Maj 2018, 21:03

Edi Rama si Gruevski: “të prera, të ngjitura, të

Emad Mehmeti

Në vitin 2014 i ashtuquajturi “super – ministri” i Edi Ramës, Saimir Tahiri kishte nisur aksionin policor për të ç’rrënjosur kanabisin nga Lazarati. Fshat ky i njohur thuajse në tërë botën për bimën narkotike. Ndërkohë që thuhej se po zhdukej kanabisi që aty, e gjithë Shqipëria u mbush me kanabis. Por, Tahiri – Rama vazhdonin të këmbëngulnin se mbjellja e kësaj bime nuk bëhej më, duke u konsideruar kjo një çështje e mbyllur prej tyre.

Teksa Qeveria Rama fliste për kanabis të asgjësuar, skandali u plasi në duar. Doli se Ministri më i fuqishëm i tij, Saimir Tahiri, të ishte i lidhur me banda kriminale. Edhe pse kjo mohohej prej tyre, falë Prokurisë italiane të Katanias dolën në dritë fakte kompromnetuese.

Sa menduam se përfundoi ky skandal që na bëri të turpërohemi të gjithë shqiptarëve, erdhi dorëheqja e Tahirit gjoja për të qetësuar gjakrat politike, por për fat të keq te dera priste një tjetër skandal. Doli se edhe vëllai i Ministrit të ri të Policisë, Agron Xhafaj, përveç se ishte gjykuar për drogë në Itali, sipas pretendimeve të publikuara nga PD-ja me zë dhe me figurë përmes një dëshmitari, ai kishte vazhduar të kryente këtë punë të jashtëligjshme. Pas kësaj kur nga të gjithë pritej se Qeveria Rama do reflektojë me maturi, fillimisht duke shkarkuar Famir Xhafajn – derisa të përfundonte procesi hetimor ndaj vëllait të tij, e më pas të thotë se kjo çështje duhet të shkojë deri në fund me hetimet, ai mori rolin e Kryeprokurorit publik. Me një ndërhyrje direkte ndaj organeve hetuese, pasi tha se gjithçka ishte e sajuar dhe montuar ndaj Agron Xhafajt.

Kur jemi te injorimi i përgjimeve politike, shqiptarëve të Maqedonisë ju kujtohet ish – kryeministri i Maqedonisë, Nikolla Gruevski, i cili karrierën e tij politike e ndërtoi mbi dy themele: antishqiptarizmin dhe PR-in e mirëorganizuar. Kur jemi të pjesa e dytë, pra tek marrdhënia me publikun, në këtë pikë mund të themi se Rama e ka kaluar Gruevskin.

Pos kësaj, del se kanë edhe diçka të ngjajshme këta të dy. Kur në vitin 2015 kryeministri aktual, Zoran Zaev, filloi me publikimin e “bombave” që shpërfaqnin qeverisjen kriminale dhe korruptuese të Gruevskit dhe Ahmetit, Gruevski nuk reshti duke thënë se përgjimet e publikuara ishin “të prera, të ngjitura e të montuara!” Këtë “ves” të Guevskit tashmë e kanë marrë edhe kryeministri Rama dhe Ministri, Fatmir Xhafaj. Ata, ende pa folur Prokuroria zyrtarisht – dolën dhe thanë se gjithçka ishte një sajesë e montuar nga fillimi e gjer në fund, për këtë Rama përmendi edhe institucione të specializuara ndërkombëtare që kishin hulumtuar nëse audio e publikuar nga PD – për rastin Xhafaj ishte reale, por se sipas tij kishte dalur të jetë e rrejshme.

Mirëpo, këtë e ka relizuar një Institut pa emër e pa adresë, kështu të paktën e la të kuptohej Rama, pasi nuk përmendi as vendin e as emrin e ndonjë instituti që kishte realizuar këtë hetim për përgjimin. E përse ky nxitim për Institute pa emër nëse ndjehen të pastër?

Të shpresojmë se Gruevski e Rama kanë vetëm kaq pak gjëra të përbashkëta. Sepse nëse Gruevski mohoi gjithçka, doli se shumëçka prej pretendimeve të ngritura nga opozita e atëhershme e Zaevit ishin të vërteta.

Megjithatë, është e vërtetë se kanabisin nuk na e solli Edi Rama në Shqipëri, por kjo bimë narkotike ishte aty. Pra, gjendej në tokat shqiptare, mirëpo për dallim prej paraardhësve të tij politik, duket se Qeveria e Ramës “i ka futur duart direkt” në kanabis. Dhe kur kemi një klasë politike e cila përfolet se është e ndërlidhur ngushtë me drogën, çfarë duhet të bëjmë ne shqiptarët jashtë kufijve? Kur do ta shohim ne një Shqipëri të fortë e demokratike – që do të na ndihmonte edhe neve? Sepse, dihet mirëfilli se Shqipëria e ka obligim kushtetues të përkujdeset për shqiptarët jashtë territorit të saj, por kur kemi politikanë në dukje të shantazhuar nga krimi dhe mafia, si të presim ne shqiptarët jashtë kufijve që do të na mbrojë Tirana zyrtare, kur shihet ashiqare se politikanët atje – janë në hall se si të mbrojnë veten e tyre nga pisllëqet e bëra?!

*Autori është kolumnist nga Shkupi dhe shkruan për Almakos, portalin më të madh në gjuhën shqipe në Maqedoni.