Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Ejani në Roskovec!

Politiko 19 Mars 2019, 19:31

Zef Zefi

Toskana me provincat janë shkundur nga një gjumë i rëndë këto ditë: Firenze Arrezo, Grossete, Livorno, Lucca, Massa, Pisa, Pistoia, Prato dhe Siena, prej gati një jave, janë rilindur me ethet e "bashkëqeverisjes me popullin". Direktiva ka kaluar Adriatikun dhe ka mbërritur në brigjet e Tirrenit, duke vënë në lëvizje gjithë rajonin e Toskanës. Slogani imperativ "...hajdeni në Roskovec për të parë Toskanën..." ose më saktë jetoni në Roskovec për të jetuar Toskanën, tani është bërë kryefjalë e ditës në gjithë hapësirat e saj publike dhe spotet publicitare.

-Albanez jeni ju, -më ndaloi një toskan, akoma pa më zënë këmba mbi "pasarelën" Ponte Vecchio. Nuk gabohej toskani. Gjurmët e pulës në këndet e syve për shqiptarët e rritur nën komunizëm nuk lënë vend për mëdyshje. Falë menusë socialiste; turshi e marmalatë.

-Po, urdhëroni. Albanez jam.

-Nga Ros'hoveci?

-Boh, Ros'hoveci?-u mëdysha. Po mbërrita shpejt te ngrënia e tingullit "k" nga toskanët.

Aaa, Roskoveci! Jo për at'Zot. Nuk jam prej Roskoveci.

-E njeh, e ke parë Roskovecin, dmth me sy të lirë?

-Po mor' qysh jo.

Toskani u bë ma flatra. "Potrá darmi un'informazione gentilmente? Ankthi i tij më ngjante me ato të Amerikano Vespuçit.

-Patjetër, mos ki dert'.

-Na ka ardhur fletëpalosja, derë më derë (porta a porta) sipas Kryetarit të qeverisë suaj se për të parë Toskanën duhet të shkohet në Roskovec, -vijoi toskani me të folmen tipike fiorentine,-dhe ajo që është më e rëndësishme, se për të jetuar Toskanën, duhet jetuar atje, dmth né Roskovec. Besoj ta ka zënë veshi se 3.8 milion toskanë kanë bërë gati valixhet dhe makinat për atje në Roskovecin e shqipeve?

-Jo për zotin, jo. "Ma cosa è questa faccia strana che fa" -pse të iku fytyra,-pyeste toskani.

I thashë asgjë. "Më tronditën pak shifrat. Më topisin shifrat.

-Si të them më ndodh si Stendalit me artet, po kalon. Toskani u qetësua. I thashë se Roskoveci ka afërsisht 21 mijë banorë. Toskana 3.8 milion -Aq më mirë, - u gëzua toskani. -dmth paska hapsirë për të gjithë toskanët.

-Hapësirë?! -Sipërfaqe- sqaroi ai.

-Sipërfaqja e Roskovecit, që thua ti, është 118 km katror, kurse e Toskanës 23 mijë kilometra katrore, pak më pak se krejt Shqipëria. Kupton?

-No,-tha toskani më i sigurtë se kurrë, për vete, po i pasigurtë për mua, nëse kishte gjetur albanezin e duhur per informacionin apo ndonjë komik të dështuar që endet vërdallë Firences.

-"Va tutto bene, sicuro?" I thashë po, boll "tutto bene" jam.

-Po më duhet t'u sqaroj se të fusësh Toskanën në Roskovec, është njëlloj si të fusësh globin në një kokërr vezë, ose si i themi ne shqipot si të fusësh xhaminë në thes. Ndërsa të vendosësh 3.8 milion banorë në 118 km katrorë, i bie që toskanët të kthehen të gjithë në liliputër të "...çudirave".

Toskani mbeti pak si i trandur, po i sigurtë se kur lajmet shpëndahen "porta a porta" (derë më derë) duhet të jenë pak më të rëndësihme se opinioni i një emigranti.

-Sinqerisht unë besoj kryeministrin tuaj, - tha toskani.

-Nuk të mbetet hatri besoj.

-Aspak. Mbeç' me shendet,- i thashë.

-Shendet paç,-tha toskani.