Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Fejesa e Remes

Politiko 8 Gusht 2017, 16:57

Alfred Lela

Kuvendi i ri i Shqipërisë do t'i ngjajë Asamblesë kombëtare të një vendi të sapo dalë nga pushtimi. Portrete të reja vajzash e djemsh, mbështetur mbi profile politike gjithaq të reja, do të kërkojnë të bëjnë vend në të sotmen dhe në kujtesën e një prej atyre institucioneve, që përndryshe do duhej të ishte aula më e veneruar e Shqipërisë.

Pas pushtimeve ndodh që asambletë e kombeve të mbushen me kërthinj politikë. Kjo për faktin e thjeshtë se të rinjtë e bëjnë luftën, ata kanë guximin por edhe idealizmin për të besuar te utopitë. Kush del gjallë nga lufta, shpërblehet. Ky është përshkrues sidomos i vendeve të prekura nga lëvizje të majta, revolucionare.

Shqipëria e pas Luftës II Botërore është një shembull që e njohim dhe mund ta interpretojmë.

Në legjislaturën e re të Kuvendit të Shqipërisë do të kemi 19, 20, 22 e 24 vjeçarë. Disa syresh. Por edhe 28, 29 apo 30 vjeçarë. Të kuptohemi në dy gjëra: rinia nuk është faj apo mëkat, dhe jo të gjithë të rinjtë e Kuvendit janë emërime. Ndoca syresh e kanë fituar me aktivitet politik vendin në parlament.

Kjo nuk i heq gjë faktit se, një pjesë e të rinjve dhe një pjesë e grave, nuk janë më shumë se kuota. Një sforco e dalë nga 30 përqindëshi. Një ars juvenilia e kryetarëve të partive dhe ideve të tyre të huazuara trashë. Në Kongresin Amerikan për shembull, njomështi të tilla janë në ekipet ndihmëse të senatorëve apo kongresmenëve dhe quhen interns (stazhierë). Ata e ushtrojnë politikën duke e mësuar atë, nuk e mësojnë duke e ushtruar.

E thamë: ne jemi një vend i cili vazhdimisht ndjen nevojën e të dalit nga një pushtim, apo të proklamimit të një çlirimi.

Reme Lala është një 22 vjeçare, deputete e zgjedhur e Kuvendit të Shqipërisë, e dalë nga zgjedhësit e Dibrës nën siglën e PDIU, partisë që drejtohet nga Shpëtim Idrizi dhe njihet kryesisht si si 'partia çame'. Lala përbën dhe do të përbëjë lajm për moshën, deputetësinë, mënyrën si, ku dhe sa fitoi, por edhe faktin se është e bija e një personazhi lokal, i njohur si 'enforcer' politik.

Kur të vijë shtatori, 22 vjeçarja do ta kuptojë se dritat e skenës do të bien mbi të me një projeksion, këndet e të cilit nuk i përkasin vetëm asaj. Reme Lala nuk do të gjykohet kurrë si Reme Lala. Pozitat e saj të forcës janë njëkohësisht edhe baza e dobësisë së madhe. Të trashëguar nga i ati, duket se ajo do të përdorë në Parlament edhe pak nga bravura e tij. Shoqëruar edhe me një kryeneçësi gege që i është dalluar edhe në fushatë.

Reme Lala duhet të dijë si të mos përbëjë lajm. Media, kjo gjahtare e paskrupullt e dritëhijeve dhe kundërthënieve, do të shohë te ajo një target të parapëlqyer, një zhan d'arkë të përmbysur, një që nuk ka dalë në 'luftë' për Francën, por për klanin.

Ajo ka bërë fiks të kundërtën. I ka dalë në pritë medias duke shpallur një fejesë me 1 mijë të ftuar në fshatin e lindjes. 'Alarmi' është te teprimi, dhe te fakti se është akti i parë si deputete. Fakti se ceremonia e fejesës është zgjedhur të jetë më e madhe se fshati ku do të mbahet, ngjan si një vendim i vetëdijshëm për t'i treguar katundit 'forcën' dhe për t'a lajmëruar Tiranën për 'ndjekësit'.

Tirana është mësuar me këtë. Të gjithë kanë ardhur me ndjekësit dhe janë larguar vetëm. Që prej Ahmet Zogut e këndej. Ky është një leksion që, studentja e shndërruar në deputete, Reme Lala, duhet të ketë parasysh.

Kuvendi i ri do të ketë hijen e një asambleje të dalë nga lufta, por shpejt do të fillojë të operojë me mjete të paqes. Në fushatë dhe në dasëm e kemi parë tashmë.

Si do të jetë në paqe Reme Lala?