Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Filmi për komandantin Adem Jashari shkakton polemika në Serbi

Politiko 9 Mars 2018, 22:24
Filmi për komandantin Adem Jashari shkakton polemika në Serbi

Njëzetë vjet pasi komandanti i Ushtrisë Çlirimtare të Kosovës Adem Jashari u vra në një betejë të armatosur, do të realizohet një film për jetën e tij dhe kjo gjë ka shkaktuar tashmë polemika në Serbi.

Regjisori shqiptar i Kosovës Luan Kryeziu ka filluar punën për një film për komandantin e Ushtrisë Çlirimtare të Kosovës, Adem Jashari, i cili u vra bashkë me 58 të afërm të tij, ndërsa luftonte në një betejë tre ditore me forcat serbe në mars të vitit 1998. Jashari, një nga themeluesit e UÇK-së, është një figurë e rëndësishme në historinë e kohëve të fundit për shqiptarët e Kosovës dhe shihet si hero i luftës së tyre për pavarësi dhe Kryeziu tha se realizimi i filmit ishte një “përgjegjësi kombëtare dhe profesionale” si edhe projekti i tij më i madh deri më tani.

“Duke pasur parasysh se kemi të bëjmë me një figurë të madhe kombëtare, kujdesi dhe angazhimi rritet dhe është po aq i detyrueshëm sa edhe përgjegjësia për cilësinë e punës,” tha Kryeziu për BIRN. Kryeziu tha se skenari është duke përfunduar, me kujdes të veçantë dhe duke i kushtuar vëmendje saktësisë historike. “Ne jemi orientuar në bazë të informacioneve nga familja, sepse ai informacioni është më i qëndrueshëm dhe më i besueshëm,” tha Kryeziu, duke shtuar se informacionet janë siguruar gjithashtu nga njerëz që kanë punuar me familjen dhe nga historianët.

Asnjë aktor nuk është zgjedhur ende për të luajtur rolin kryesor në film, atë të Adem Jasharit, i cili ishte 42 vjeç kur u vra në fshatin e tij Prekaz. Por çështja shkaktoi polemika në Kosovë dhe në mediat serbe pas një deklarate nga Kryeziu i cili tha se aktori serb Rade Serbedzija, një yll i madh në kohën e Jugosllavisë, i cili ka luajtur gjithashtu në filma të Hollivudit si “Harry Potter and Deadly Hallows” dhe “Mision i pamundur 2”, ishte i interesuar të luante rolin e komandantit të UÇK-së. Serbedzija e mohoi këtë, duke thënë se mediat serbe kishin të drejtë kur i referoheshin Jasharit si “kriminel”. ”Është totalisht e pakuptimtë të më kërkohet të luaj atë rol, ashtu siç është e pakuptimtë të besohet se unë do ta pranoja një ofertë të tillë,” tha Serbedzija për TV N1 të enjten. Megjithatë, Kryeziu tha se ai nuk donte që Serbedzija të luante rolin e Jasharit.

“Është mëse normale që ai të ndihet keq për refuzimin tim, por nuk e kuptoj se si një artist i një niveli të tillë mund ta quajë Adem Jasharin dhe familjen e tij terroristë,” tha ai. Ai u shpreh se do të ishte një privilegj që çdo aktor në botë të luante një rol të tillë dhe se në të ardhmen Jashari do të shihet si “një simbol paqeje dhe i dashurisë për liri”. Autoritetet e Beogradit nën sundimin e Slobodan Millosheviçit e konsideronin UÇK-në si një grup terrorist dhe e cilësuan Jasharin si një nga liderët e saj. Duke kujtuar betejën e armatosur të marsit 1998, në të cilën gra dhe fëmijë u qëlluan për vdekje, si edhe ushtarë të UÇK-së, gjenerali jugosllav Nebojsa Pavkoviç tha se ishte “një aksion normal policor kundër një krimineli të njohur”.

Por vrasja shkaktoi një rritje të mbështetjes për UÇK-në dhe inkurajoi shumë shqiptarë të rinj të Kosovës që t’i bashkoheshin forcës guerilase, raportoi BBC. Ende nuk është caktuar asnjë datë për përfundimin e filmit, por regjisori Kryeziu shpreson se përgatitjet teknike do të përfundojnë këtë vit. Ai tha se projekti po merr mbështetje nga institucionet shtetërore të Kosovës, por gjithashtu nga publiku. “Unë besoj shumë tek mbështetja e të gjithëve, pasi filmi konsiderohet të ketë interes kombëtar,” tha ai. /BIRN/

Të fundit