Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Fushata e ‘Top Channel’ kundër lojrave të fatit, në krah apo përballë Filip Çakulit?

Politiko 17 Prill 2018, 21:15

Televizioni ‘Top Channel’ ka nisur një fushatë kundër lojrave të fatit, të cilat në kundërshtim me ligjin vijojnë të mos respektojnë distancën e përcaktuar prej 100 metrash nga institucionet fetare, shkollat dhe universitetet. Në shumë lagje të Tiranës mund të gjesh dy, tre apo edhe më shumë pika bastesh, kazino dhe bingo, të cilat janë të mbushura me njerëz nga çdo moshë, duke përfshirë të miturit.

“Kumari, marrëzia vazhdon…”, ky ishte titulli i dokumentarit të realizuar nga gazetarja Beti Njuma dhe i publikuar më 15 prill në programin ‘Exclusive’ të TCH, ndërkohë që mbrëmjen e sotme, ky televizion ka publikuar një kronikë për numrin e lartë të basteve sportive dhe lojrave të fatit në qytetet e vogla të vendit.

Por një fakt që nuk mund të anashkalohet është se Autoriteti i Mbikëqyrjes së Lojrave të Fatit, institucioni përgjegjës për zbatimin e këtij ligji, drejtohet nga Zhani Çakuli, djali i Filip Çakulit, i cili drejton emisionin ‘Fiks Fare’.

Zhani Çakuli në këtë post u emërua nga kryeministri Edi Rama, vendim që shkaktoi reagim të ashpër nga ana e ish-kryeministrit Sali Berisha dhe që u pasua me përplasje publike dhe shkëmbime akuzash.

Ashtu siç kanë pohuar edhe drejtues të këtij televizioni, Filip Çakuli është një peshë e rëndë brenda Top Channel, ndërkohë që kronikat nuk përputhen me këtë pohim. Gjithsesi, në dokumentarin e publikuar dy ditë më parë theksohej se ishte politika ajo që ndikonte fuqishëm në moszbatimin e këtij ligji.

Kjo fushatë që lidhet me Filip Çakullin nuk është e para për ‘Top Channel’ sepse në media është raportuar për një tjetër vendim të pronares Vjollca Hoxha, e cila ka kërkuar që “Fiks Fare” të dalë nga borderoja e televizionit dhe të vetëfinancohet. Në të njëjtin artikull flitej për një ftohje të Hoxhës me Çakullin pas emërimit të Ben Blushit në postin e drejtorit Ekzekutiv, që solli edhe ndryshimin e linjës editoriale duke e pozicionuar televizionin kundër qeverisë së Ramës.

Sa i përket alarmit që ‘Top Channel’ po ngre për mosrespektimin e ligjit nga Autoriteti i Mbikëqyrjes së Lojrave të Fatit dhe ndërhyrjes së fortë të politikës në këtë çështje, pyetja që shtrohet është nëse televizioni po i del në krah djalit të Filip Çakulit, për t'i dhënë një dorë në zbatimin e ligjit, apo është vendosur përballë babait të tij?