Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Gjendja e skandalit permanent në Tiranë

Politiko 3 Shkurt 2018, 20:15

..Ose shembuj nga keq-qeverisja arrogante e Veliajt

Akil Kraja*

Tirana në drejtim të paditur? Në kohën e “hyper-informacionit” në kohë reale mund të thuhet me bindje të plotë se lajmi mbyt lajmin, skandali mbulon skandalin, deklarata mohon deklaratën, dhe përgjegjësit arrijnë gjithmonë t’i shpëtojnë përgjegjësive. Ja pse shqiptarët humbin shpresën. Të gjithë duket sikur i harrojnë apo i tolerojnë skandalet e njëpasnjëshme duke e pranuar logjikën ciklike: sot është më keq se dje, e nesër do të jetë më keq se sot, sepse ky vend nuk bëhet.

Kjo është gjendja e skandalit permanent. Një fatalitet që po pushton çdo qytetar. Një pesimizëm që ushqehet në çdo cep të vendit, përfshirë Kryeqytetin tonë. Nga ta fillojmë, vetëm gjatë javës që po lëmë pas, Bashkia Tiranë ka prodhuar skandalet e mëposhtme :

1) Erion Veliaj humbi shkallën e parë të gjyqit administrativ mbi pa-vlefshmërinë e 6 mandateve të këshilltarëve bashkiak të ndërruar pas zgjedhjeve legjislative të 25 qershorit. Pasojat janë të jashtëzakonshme. Beteja ligjore e kolegut këshilltar Topollaj dëshmon më së miri mungesën e thellë të respektit ndaj institucioneve dhe të njohurive ligjore të stafit bashkiak.

Gjykata thotë që 6 këshilltarë nuk duhej të kishin votuar në mbledhjet e këshillit bashkiak të këtyre gjashtë muajve të fundit për shkak se mandati i tyre nuk është marrë në respekt të ligjit. Pra buxheti 2018, rritja e çmimit të ujit, ndihma dhe apartamentet sociale, të gjitha vendimet e miratuara këto gjashtë muaj rezultojnë në parim të jenë të pavlefshme.

Me pak fjalë, “Bashkia Ra”!

A ka vallë një skandal më të madh se ky? E imagjinoni amullinë kontraktuale, fiskale e ligjore që krijon kjo situatë? Dëshmi ekstreme e arrogancës që ka pushtuar Bashkinë Tiranë nën drejtimin e një kryebashkiaku që mendon vetëm për “aparencën” dhe aspak për “përmbajtjen”, përfshi në çështjet më primare si ato që prekin ligjin dhe parlamentin vendor...

2) Erion Veliaj ka filluar së fundmi fushatën e mbjelljeve të pemëve duke pushtuar mediat çdo ditë me lopatë e kazëm në dorë. 6000 punonjësit e Bashkisë nuk mjaftojnë, ai duhet të jetë çdo ditë duke mbjellë vetë një pemë... Sikur kjo të mos mjaftonte, ai krijon një skandal personal duke iu referuar një prindi, një aktivisti e një qytetari si histerik vetëm e vetëm se kërkonte standarde, transparencë e një menaxhim më të mirë nga Bashkia e tij në këtë fushatë të rradhës.

Historia me pak fjalë është kjo: fëmijës i kërkohen para në shkollë nga mësuesja me kërkesë të Bashkisë për të mbjellë pemë në pyllin orbital. Prindi refuzon pasi thotë se për këtë i paguajmë taksat direkt bashkisë.

Veliaj, si Kryetar Bashkie i përgjigjet publikisht prindit duke deklaruar: “zoti faltë dikë që nuk është gati të japë 100 lek, se ai i ka mundësitë se është analist i paguar, por në sytë e tij ishte më e rëndësishme të bënte një kauzë histerike për pemën që do të oksigjenojë fëmijën e vet kundër kryetarit të bashkisë. Unë s’kam fëmijë, por vallai partia para fëmijës….”.

A ka skandal më të madh për një kryetar Bashkie që flet me këtë gjuhë ndaj një qytetari që paguan taksat? Ku është llogari-dhënia? Ku është respekti i të zgjedhurit ndaj sovranit që e voton? Ku është përulësia e nënpunësit i cili paguhet nga taksat e qytetarëve? A është kjo dëshmi e një arrogance të llahtarshme? A është kjo dëshmi e një sjelljeje nga më të ulëtat që kur i shkon për shtat i përdor fëmijët për pedo-politikë propagandistike e kur nuk i shkon për shtat i përdor si objekt batutash?

Të mos harrojmë, që zëvendësimi i palmave të thara në autostradë përpos shpenzimit fillestar të çuar dëm, tanimë do t’i kushtojë qytetarëve të Tiranës dhe Bashkisë Tiranë plot 2.5 milion euro për t’u zëvendësuar me pisha...

3) Erion Veliaj u fut në zgjedhjet vendore të vitit 2015 me një premtim madhor : moratorium për ndërtimet në Tiranë gjatë mandatit të parë. Premtimi nuk u mbajt dhe Tirana sot po kalon një fazë betonizimi intensive pavarësisht mungesës së theksuar së hapësirave dhe infrastrukturave publike cilësore.

Sikur kjo të mos mjaftonte, Veliaj miratoi së fundmi në Këshill uljen me 50% të taksës së ndërtimeve të reja për pallatet e mëdha që kanë qëllime zyrash deri në 30.000m2. Nëse e llogaritim këtë ulje me një çmim prej 1500eurosh/m2 minimalisht, atëherë i bie që nga 3.6 milion euro taksa (1500e/m2 x 30.000m2 x 8%) ndërtuesi fatlum do të paguajë tanimë 1.8 milion euro.

Ka dhuratë më të bukur për të filluar vitin: edhe leje ndërtimi për kullë edhe 1.8 milion euro skonto...?!

4) Erion Veliaj ka deklaruar që përpos faktit që Tirana po merr hije vieneze nëpërmjet vendosjes së disa stolave plastikë në sheshin Skënderbej, kryeqyteti tanimë është dhe ndër më të pastrit në Ballkan. Këtë gjykim le ta bëjnë vetë qytetarët.

Por ajo që është realisht shqetësuese, është heshtja e pothuajse një “bashkëpunëtori” në skandalin e inceneratorëve të mbetjeve denoncuar këto ditë nga Partia Demokratike. Të tre inceneratorët të mbetjeve të Tiranës, Elbasanit e Fierit janë nën të njëjtën dorë dhe një kompani që nuk ka patur asnjë eksperience të qenësishme në menaxhimin e plehrave.

Veliaj nuk reagoi në asnjë çast duke mohuar deklaratën e të enjtes së Ministrit Ahmetaj ku ai deklaronte se inceneratorët janë në pronësi të Bashkive; ai nuk e mohoi faktin që në landfillin e Sharrës do të ndërtohet një incenerator nga një kompani fantazëm bazuar në Hollandë; nuk reagoi mbi faktin që Bashkia Tiranë do ta paguajë këtë kompani që plehrat e Tiranës të digjen aty; nuk reagoi mbi faktin nëse është e vërtetë apo jo që ky incenerator ka një kapacitet djegieje më të madhe se prodhimi i mbetjeve në Tiranë...

E njëjta heshtje pothuajse “bashkëfajësie” si me rastin e vdekjes tragjike në landfillin e Sharrës së 17 vjeçarit Ardit Gjoklaj. E njëjta heshtje si me rastin e ligjit të importit të mbetjeve. Nga ku pyetja, Kryetari i Bashkisë mbron interesat e inceneratorëve apo të qytetarëve të Tiranës? A ka një skandal më të madh sesa një Kryetar Bashkie që hesht për çështjen e menaxhimit dhe të djegies së mbetjeve në një ndër qytetet më të ndotura të Europës?

5) Erion Veliaj shfaqet pothuajse në çdo dalje mediatike i shoqëruar me fëmijë, i veshur sportiv, i qeshur e si një njeri realisht i aksesueshëm e korrekt, me pulovra me drerë apo mushama me ngjyra. E me të drejtë qytetarët pyesin veten pse vallë ky investim krejt atipik në veshje?

Veshjet e Veliajt mund të shpjegohen vetën me një arsyetim propagandistik pasi sa më i madh të jetë skandali, aq më i madh nevojitet dhe kamuflimi. Sa më e madhe gënjeshtra, aq më e madhe propaganda. Aksiomë e çdo politikani të shkollës së rilindjes propagandistike shqiptare.

Ai kërkon të tregohet sa më “njerëzor” në një kohë kur nuk është i tillë. Pas shembjes me urgjencë, të nxituar, në kaos, pa sqaruar as kompensimin e as strehimin alternativ - madje duke përdorur dhe dhunë – të banorëve në Shkozë, në zgjatimin e bulevardit të ri, apo dhe në Selitë etj., forcat bashkiake e policore Tiranë u vërsulën kësaj radhe disa familjeve në zonën e liqenit të thatë. Afati shumë i shkurtër prej vetëm disa ditësh dhe mos sqarimi i çështjes së kompensimit e detyroi një nga familjarët në fjalë të ngjitej mbi çati e të kërcënonte me vetë-flijim.

Ligji duhet zbatuar pa përjashtime dhe akoma më shumë në zonën e liqenit. Por nëse gjendet kuraja për t’u marrë qytetarët e thjeshtë, pse në paralel nuk zbatohen rregullat dhe për vilat e të paprekshmeve ndërtuar në zonën e liqenit në kundërshtim me po të njëjtat rregulla mbi të cilat bazohen këto shëmbje? Dy standarte për të njëjtin rast?

A mund të shëmbet shtëpia e një familjeje me një lajmërim disa ditësh dhe pa i dhënë asnjë alternativë strehimi fëmijëve? A e di Veliaj që dhe të burgosurit për krimet më të rënda, vetëm nga fakti që janë “njerëz”, kanë të drejtë për një strehim? As dhe krimineli pra nuk lihet në qiell të hapur e në rrugë, e jo më një familje me fëmijë. Pra, Kryebashkiaku le të vishet me pulovra me drerë, ai nuk mund të ja dalë të fshehë fytyrën e tij të vërtete dhe arrogancën e të plotfuqishmit që arrin kulmin me dhunën ndaj shitësve ambulantë...

Kjo është gjendja e skandalit permanent në qytetin e Tiranës. Një qytet ku arroganca e keq-qeverisjes po prodhon vetëm skandale e propagandë boshe, dita ditës, javë pas jave, me fëmijë në krah e lopata në dorë... ju duket si déjà-vu?!

*Këshilltar i PD në Bashkinë e Tiranës.