Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

“Gjermani e ka fajin!”

Politiko 27 Gusht 2018, 18:28

"Ai nuk është nga tanët, ai u takon këtyre këtu", thërret e nervozuar një grua e moshuar me entuziazëm, duke treguar fotografinë e Hitlerit. Ajo e ka fjalën për presidentin rumun Klaus Iohannis. "Ai nuk është rumun i vërtetë," shton një burrë me pantofla gome.

Gati njëqind vetë, kryesisht të moshuar, u mblodhën në Bukuresht para ndërtesës së Zyrës së Prokurorit të Përgjithshëm për të demonstruar kundër liberal-konservatorit Iohanis dhe pro qeverisë social-demokrate.

Presidenti Iohannis i përket pakicës gjermane në Rumani dhe është në detyrë që nga viti 2014. Më shumë se gjashtë milionë rumunë e zgjodhën atë si president pavarësisht një fushate shpifjesh gjatë periudhës zgjedhore.

Pamjet nga kjo demonstratë e vogël me tone radikale të djathta, po transmetohen vazhdimisht në kanalet televizive e lidhura me qeverinë. Mesazhi duhet të përhapet sa më tepër: Presidenti është një "i huaj" që vepron kundër interesave të rumunëve.

Fushatë kundër presidentit Iohanis

Demonstrata qe planifikuar si shenjë mbështetje ndaj veprimeve të policisë gjatë demonstratës masive para dy javësh ku morën pjesë mbi 100.000 rumunë për të protestuar kundër kurrupsionit dhe për drejtësi të pavarur. Policia e shpërndau demonstratën në mënyrë brutale duke përdorur shkopinj gome dhe gaz lotsjellës. Deri tani 700 demonstrues të plagosur kanë ngritur padi ndaj policisë.

Fakti që thirrjes për demonstratë në mbështetje të policëve brutalë iu përgjigjen vetëm rreth 100 vetë flet për vete. Po ashtu nuk të habit fakti që demonstruesit do të shpreheshin kundër presidentit, sepse ky e dënoi dhunën e policisë gjatë demonstratës së 10 gushtit. Ai e akuzoi po ashtu qeverinë e drejtuar nga social-demokratët se po sillet në mënyrë irracionale dhe po vepron kundër interesave të qytetarëve.

Shenjë shqetësimi

Fakti që përkatësia e Presidentit në pakicën gjermane në Rumani tani po përmendet gjithnjë e më shumë si argument kundër tij duke e lidhur atë me Gjermaninë naziste është padyshim një shenjë se kundërshtarët e tij po ndjehen të shqetësuar. Pak ditë më parë, kreu i fuqishëm i Partisë Socialdemokrate PSD, Liviu Dragnea, sinjalizoi nisjen e sulmit politik kur u shpreh për fillimin e procesit për shkarkimin e presidentit nga posti. Sipas tij Iohanis është përgjegjës për demonstratën masive, presidenti nuk vepron në interes të Rumanisë dhe duhet të akuzohet edhe për tradhëti të lartë.

Aludime të lidhura me Gjermaninë naziste

Politikanë të tjerë në senatit, si Liviu Pop, u shprehën se partia e minoritetit gjerman "Forumi Demokratik i gjermanëve në Rumani" e themeluar në vitin 1989 nga Iohanis, është një vazhdim i organizatës naziste të minoritetit gjerman në Rumani, prandaj nuk është habi që ai vepron kundër popullit rumun.

I ngarkuari i qeverisë gjermane për minoritetet gjermane Bernd Fabritius dhe përfaqësues të lartë të minoritetit gjerman në Rumani protestuan me vendosmëri ndaj kësaj fushate. Por me sa duket pa efekt. Sepse një ditë pas tyre, ministrja e Punës, Lia Olguta Vasilescu, e sulmoi sërish presidentin duke e quajtur "neamtz' - nemce.

"Neamtzul" - Gjermani e ka fajin, thërisnin edhe protestuesit e së shtunës pasdite (25.08.) dhe mediat proqeveritare po i shpërndajnë pamjet nga kjo demonstratë. Por ndërkohë artistë dhe gazetarë rumunë kanë nisur një fushatë në mediet sociale me hashtagun #neamtztoo - Edhe ne gjermanë. (DW)